പറവൂര്: ആരോടും പ്രീണനമില്ലാതെ എല്ലാവര്ക്കും പ്രയോജനപ്പെടുന്ന തരത്തിലുള്ള വികസനമാണ് താന് ലക്ഷ്യമിടുന്നതെന്ന് പറവൂരിലെ എന്ഡിഎ സ്ഥാനാര്ത്ഥി ഹരി വിജയന്. തെരഞ്ഞെടുപ്പു കമ്മറ്റി ഓഫീസില് വിളിച്ചു ചേര്ത്ത വാര്ത്താ സമ്മേളനത്തില് സംസാരിക്കുകയായിരുന്നു അദ്ദേഹം.
മുപ്പത്തി അഞ്ച് വര്ഷമായി മുടങ്ങിക്കിടക്കുന്ന ദേശീയപാത 17ന്റെ നിര്മ്മാണം പൂര്ത്തീകരിക്കുന്നതിന് പ്രഥമ പരിഗണന നല്കും. താന് വിജയിച്ചാല് എംഎല്എ എന്ന നിലയില് കിട്ടുന്ന ശമ്പളം മുഴുവന് ക്യാന്സര് രോഗികളുടെ ചികിത്സക്കായി വിനിയോഗിക്കും. താലൂക്കാശുപത്രി മള്ട്ടിസ്പെഷ്യാലിറ്റി ആശുപത്രിയായി ഉയര്ത്തും. പറവൂരിലെ ജനങ്ങളുടെ ചിരകാല സ്വപ്നമായ ഗവ: കോളേജ്, ആധുനികരീതിയിലുള്ള സ്റ്റേഡിയം തുടങ്ങിയവയ്ക്ക് മുന്ഗണന നല്കും .
കഴിഞ്ഞ പതിനഞ്ച് വര്ഷം വി.ഡി.സതീശന് പറവൂരില് നടത്തിയ വികസനം ഫ്ളക്സ് ബോര്ഡില് മാത്രമായിരുന്നു എന്ന് ഹരി വിജയന് കുറ്റപ്പെടുത്തി. ഏറെ കൊട്ടിഘോഷിച്ച ചാത്തനാട് കടമക്കുടി പാലം, പഴമ്പിള്ളിത്തുരുത്ത് സ്റ്റേഷന്കടവ് പാലം, ചെറായി ചാത്തനാട് തീരദേശ റോഡ് എന്നിവയുടെ നിര്മ്മാണം പൂര്ണ്ണമായും നിലച്ച അവസ്ഥയിലാണ്. ഒരു മാറ്റത്തിന് ജനങ്ങള് ആഗ്രഹിക്കുന്നു അത് എന്ഡിഎയ്ക്ക് അനുകൂലമാണെന്നും ഹരി വിജയന് പറഞ്ഞു. വാര്ത്താ സമ്മേളനത്തില് ബിഡിജെഎസ് മണ്ഡലം പ്രസിഡന്റ് സി.എന്. രാധാകൃഷ്ണന് , തെരഞ്ഞെടുപ്പ് കമ്മറ്റി കണ്വീനര് കെ.ആര്. രമേഷ് , ബിജെപി മണ്ഡലം വൈസ് പ്രസിഡന്റ് സോമന് ആലപ്പാട്ട് എന്നിവര് പങ്കെടുത്തു.
