കൊച്ചി: തെരഞ്ഞെടുപ്പ് ആവശ്യത്തിനായി വാഹനങ്ങള് വിട്ടുകൊടുക്കാത്ത സര്ക്കാര് വകുപ്പ് മേധാവികള്ക്കെതിരെ അറസ്റ്റുള്പ്പടെയുള്ള നിയമനടപടികള്ക്ക് ജില്ല തെരഞ്ഞെടുപ്പ് ഓഫീസ് തയ്യാറെടുക്കുന്നു. മുന്കാലങ്ങളില് നിന്ന് വ്യത്യസ്തമായി വാഹനങ്ങള് നല്കുന്നതില് പല വകുപ്പുകളും കാണിക്കുന്ന അലംഭാവമാണ് കടുത്ത നടപടിക്ക് പ്രേരിപ്പിച്ചിരിക്കുന്നത്. ആവശ്യപ്പെട്ട വാഹനങ്ങള് ഇന്നുകൂടി ലഭ്യമാക്കിയില്ലെങ്കില് നാളെ മുതല് അറസ്റ്റും വാഹനം കണ്ടുകെട്ടലും നടത്താനാണ് തീരുമാനം. ജില്ലയില് തെരഞ്ഞെടുപ്പ് ആവശ്യങ്ങള്ക്കായി നൂറുകണക്കിന് വാഹനങ്ങളാണ് ആവശ്യം.
തെരഞ്ഞെടുപ്പ് ദിനത്തിനാവശ്യമായ പ്രവര്ത്തനങ്ങള്ക്ക് ബസുള്പ്പടെയുള്ള വാഹനങ്ങള് വാടകയ്ക്ക് എടുക്കാന് വ്യവസ്ഥയുണ്ടെങ്കിലും ദൈനംദിന പ്രവര്ത്തനങ്ങള്ക്ക് വകുപ്പുതല വാഹനങ്ങള് ഉപയോഗിക്കുകയാണ് പതിവുരീതി. ഓരോ തിരഞ്ഞെടുപ്പിലും കൂടുതല് പരിഷ്കാരം ഈ രംഗത്തുണ്ടാകുന്നതിനാല് അവയുടെ മാന്യമായ നടത്തിപ്പിന് കുടുതല് വാഹനങ്ങള് ആവശ്യമായി വരുന്നുണ്ട്.
താലൂക്കുകളില് ഡിഫേസ്മെന്റ് സ്ക്വാഡ്, വിവിധ ആവശ്യങ്ങള്ക്കുള്ള പ്രത്യേക സ്ക്വാഡുകള് തുടങ്ങി ഒട്ടേറെ പുതിയ സംരംഭങ്ങള് അടുത്തകാലത്തായി തിരഞ്ഞെടുപ്പുമായി ബന്ധപ്പെട്ട് കമ്മിഷന് ഏര്പ്പെടുത്തിയിട്ടുണ്ട്. ഇവയ്ക്ക് ആവശ്യമായ വാഹന സൗകര്യം ചെയ്തുകൊടുക്കേണ്ട ബാധ്യത ജില്ല തിരഞ്ഞെടുപ്പ് ഓഫീസിനാണ്.
അവശ്യവിഭാഗങ്ങളുടെ വാഹനം അത്യാവശ്യഘട്ടങ്ങളിലൊഴികെ എടുക്കില്ലെന്ന് അറിയിച്ചിട്ടും താരതമ്യേന തിരക്കുകുറവുള്ള വകുപ്പുകളും വണ്ടി വിട്ടുനല്കാന് വിമുഖത കാണിക്കുന്നുവെന്നാണ് വിലയിരുത്തല്. ഈ സാഹചര്യത്തിലാണ് ജനപ്രാതിനിധ്യ നിയമത്തിലെ വകുപ്പുകള് പ്രകാരം അറസ്റ്റുള്പ്പടെയുള്ള നടപടികളിലേക്ക് കടക്കുന്നത്.
