തിരുവനന്തപുരം: നേമം മണ്ഡലത്തിന്റെ വികസന കാഴ്ചപ്പാട് പങ്കുവച്ച് ബിജെപിയുടെ എന്റെ കേരളം പദ്ധതിക്ക് തുടക്കമായി. പാര്ട്ടിയുടെ പ്രകടനപത്രിക ജനാഭിപ്രായം മാനിച്ച് തയ്യാറാക്കാനാണ് ബിജെപി ഇതിലൂടെ ലക്ഷ്യമിടുന്നതെന്ന് പൂജപ്പുരയില് നടന്ന പരിപാടിയിലെ മോഡറേറ്ററായ അഡ്വ അഞ്ജനാ ദേവി പറഞ്ഞു. കേരള രൂപീകരണത്തിന് ശേഷം ഇന്നുവരെ ഒരു രാഷ്ട്രീയ കക്ഷിയും ജനങ്ങളോട് അഭിപ്രായം തേടിയിട്ടില്ല. അവരുടെ സ്വപ്നങ്ങളും പ്രതീക്ഷകളും പങ്കുവയ്ക്കാന് എന്റെ കേരളത്തിലൂടെ അവസരമൊരുക്കുകയാണ് ബിജെപി ചെയ്യുന്നതെന്നും അഞ്ജന പറഞ്ഞു.
എന്റെ കേരളം പദ്ധതിയുടെ ഭാഗമായി നടന്ന സംവാദത്തില് ബിജെപി സംസ്ഥാന അദ്ധ്യക്ഷന് കുമ്മനം രാജശേഖരന് വോട്ടര്മാരോട് വീഡിയോ കോണ്ഫറന്സിങ് സംവിധാനത്തിലൂടെ സംവദിക്കുന്നു
മണ്ഡലത്തിലെ കുടിവെള്ള പ്രശ്നത്തെ കുറിച്ച് പൂജപ്പുര സതീഷ് സംസാരിച്ചു കൊണ്ടാണ് ചര്ച്ചയ്ക്ക് തുടക്കമിട്ടത്. രണ്ട് പ്രധാന നദികള് കരമനയാറും കിള്ളിയാറും ഒഴുകുന്ന മണ്ഡലമാണിത്. എന്നാല് കാലാകാലങ്ങളായി മാറിമാറി ഭരിച്ച മുന്നണികള് ജനങ്ങളുടെ കുടിവെള്ളം മുട്ടിച്ചതായി അദ്ദേഹം പറഞ്ഞു. ഇതില് നിന്ന് മോചനം നല്കാന് ബിജെപിക്ക് കഴിയുമോ എന്നായിരുന്നു സതീഷിന്റെ ചോദ്യം. മണ്ഡലത്തിലെ രൂക്ഷമായ മാലിന്യപ്രശ്നമാണ് ടിവി താരം സ്നേഹലത ഉയര്ത്തിക്കാട്ടിയത്. മാലിന്യനിര്മാര്ജനം വഴിമുട്ടി മണ്ഡലത്തിലെമ്പാടും പകര്ച്ചവ്യാധികള് പടരുകയാണ്. ജനജീവിതം ദുസ്സഹമാക്കും വിധം മാലിന്യപ്രശ്നം രൂക്ഷമാണ്. ഇതിന് പരിഹാരം വേണമെന്നായിരുന്നു സ്നേഹലതയുടെ ആവശ്യം.
മണ്ഡലത്തിലെ ആശുപത്രികളുടെ ശോചനീയാവസ്ഥയും തദ്വാരാ ജനങ്ങള്ക്കുണ്ടാകുന്ന കഷ്ടപ്പാടുകളുമാണ് യുവപ്രതിനിധി നന്ദു എസ്. നായര് ചൂണ്ടിക്കാട്ടിയത്. പ്രാഥമികാരോഗ്യകേന്ദ്രങ്ങള് ശരിയായി പ്രവര്ത്തിക്കുന്നില്ല. ഉള്ള ആശുപത്രികളാകട്ടെ വേണ്ടത്ര ഡോക്ടര്മാരോ മറ്റു സ്റ്റാഫുകളോ ഇല്ലാതെ ബുദ്ധിമുട്ടുന്നു. ഇത് പരിഹരിക്കാന് എന്തു ചെയ്യുമെന്നാണ് നന്ദു ചോദിച്ചത്. കരമന-കളിയിക്കാവിള ദേശീയപാതയുടെ അശാസ്ത്രീയമായ വീതികൂട്ടലും അതില് നിന്നുണ്ടാകുന്ന ദുരന്തങ്ങളും ആറന്നൂര് ശ്രീകുമാര് പങ്കുവച്ചു. എത്രയും വേഗം ഈ അശാസ്ത്രീയത പരിഹരിക്കാന് നടപടി സ്വീകരിച്ചില്ലെങ്കില് ഭീകരമായ റോഡപകടങ്ങളാണ് മണ്ഡലത്തിലെ ജനങ്ങളെ കാത്തിരിക്കുന്നതെന്ന മുന്നറിയിപ്പും അദ്ദേഹം നല്കി.
മണ്ഡലത്തിലെ വിദ്യാലയ പരിസരങ്ങളില് വര്ധിച്ചു വരുന്ന മയക്കുമരുന്നുപയോഗമാണ് അധ്യാപകനായ ബിജു പരിപാടിയില് ചൂണ്ടിക്കാട്ടിയത്. വരുംതലമുറയെ ലഹരിയുടെ ഇരുട്ടറകള്ക്കുള്ളില് തളച്ചിടും വിധം മയക്കുമരുന്നു മാഫിയ നേമത്ത് ശക്തമാണെന്നും അദ്ദേഹം വ്യക്തമാക്കി. ചര്ച്ചകളില് പങ്കെടുത്തവരുടെ ചോദ്യങ്ങളും അതിന് ഉരുത്തിരിഞ്ഞ പരിഹാര നിര്ദ്ദേശങ്ങളും അഭിപ്രായങ്ങളും ബിജെപി പ്രവര്ത്തകര് രേഖപ്പെടുത്തി ക്രോഡീകരിച്ചു. ഇത് സംസ്ഥാന തെരഞ്ഞെടുപ്പ് സമിതിക്ക് കൈമാറുമെന്നും അവര് അറിയിച്ചു. ചര്ച്ചകള്ക്ക് ശേഷം ബിജെപി സംസ്ഥാന അധ്യക്ഷന് കുമ്മനം രാജശേഖരന് വീഡിയോ കോണ്ഫറന്സിംഗിലൂടെ പ്രേക്ഷകരുമായി സംവദിച്ചു. ഇന്ന് തിരുവനന്തപുരം സെന്ട്രല് മണ്ഡലത്തിലായിരിക്കും എന്റെ കേരളം പരിപാടി അരങ്ങേറുക.
