തിരുവനന്തപുരം: സൂപ്പര് ന്യൂമറി തസ്തികയില് നിയമിക്കപ്പെട്ട അംഗപരിമിതര്ക്ക് പ്രൊബേഷന് പൂര്ത്തീകരിക്കുന്നതിന് അര്ഹത ഉണ്ടായിരിക്കുന്നതല്ല എന്നുള്ള സര്ക്കാര് ഉത്തരവ് പിന്വലിച്ച് സ്ഥിരജീവനക്കാര്ക്ക് അനുവദിക്കപ്പെട്ടിട്ടുള്ള എല്ലാവിധ സര്വീസ് ആനുകൂല്യങ്ങളും മുന്കാലങ്ങളിലേതുപോലെ അംഗപരിമിതര്ക്ക് കൂടി ലഭിക്കത്തക്കവിധം തസ്തിക ഏകീകരിച്ച് സര്ക്കാര് ഉത്തരവാകണമെന്ന് ഡിഫറന്റ്ലി ഏബിള്ഡ് എംപ്ലോയീസ് അസോസിയേഷന് തിരുവനന്തപുരം ജില്ലാ കമ്മിറ്റി സര്ക്കാരിനോട് ആവശ്യപ്പെട്ടു. പാളയം യൂണിവേഴ്സിറ്റി കോളേജില് നടന്ന യോഗത്തില് ജില്ലാ പ്രസിഡന്റ് നൗഷാദ് എ.എസ് അധ്യക്ഷത വഹിച്ചു. സംസ്ഥാന പ്രസിഡന്റ് ടി.കെ. ബിജു ഉദ്ഘാടനം നിര്വഹിച്ചു.
തിരുവനന്തപുരം ജില്ലാ ഭാരവാഹികളായി എ.എസ്. നൗഷാദ് (പ്രസിഡന്റ്), വി.കെ. വിനോദ്കുമാര് (സെക്രട്ടറി), ബി. ലതകുമാരി (ട്രഷറര്), എസ്. സജീവ് (വൈസ് പ്രസിഡന്റ്), ഒ. ശൈലജ (ജോയിന്റ് സെക്രട്ടറി), കമ്മിറ്റി അംഗങ്ങളായി എന്. വിമല്രാജ്, എസ്.പി. ശ്രീകാന്ത്, പി. സാബു, എം. നിസാമുദ്ദീന്, ഡി. യോന, സി.എ. ബിജു, കെ.എസ്. പ്രസന്ന എന്നിവരെയും സംസ്ഥാന കമ്മിറ്റി അംഗങ്ങളായി പി. മോഹനന് (സെക്രട്ടറി), എ. ആന്ഡ്രൂസ്, ബി. ബേബികുമാര്, എന്. അനിത എന്നിവരെയും തിരഞ്ഞെടുത്തു. തിരുവനന്തപുരം ജില്ലാ സമ്മേളനം ഏപ്രില് അവസാനവാരം നടത്തുന്നതിന് ജില്ലാ കമ്മിറ്റി യോഗം തീരുമാനിച്ചു.
