പ്രിയ ഡിജിപി സെന്കുമാര് സാര്, താങ്കള് കേരളത്തിലെ ഡിജിപി എന്ന പദവിയിലിരിക്കുന്നു-പക്ഷേ ഡിജിപിയുടെ അധികാരം താങ്കള്ക്കുണ്ടോ? ഇല്ലെന്നുതോന്നുന്നതുകൊണ്ടാണ് ഈ തുറന്ന ചോദ്യം.
കൊട്ടാരക്കരയില് ഒരു എസ്ഐയുടെ നേതൃത്വത്തില് നടത്തിയ നരനായാട്ട് പത്രങ്ങളില് വായിച്ചു. അതേക്കുറിച്ച് മാര്ച്ച് 12 ന് ജന്മഭൂമി ദിനപത്രത്തില് കെ.കുഞ്ഞിക്കണ്ണനെഴുതിയ ലേഖനവും വായിച്ചു. താങ്കളും വായിച്ചിരിക്കുമല്ലൊ.
ശിവപ്രകാശ് എന്ന എസ്ഐയാണ് പ്രശ്നങ്ങള്ക്ക് കാരണക്കാരനെന്ന് ഇതിലെല്ലാം പറയുന്നു. ഈ ഒരു വിഷയത്തില് മാത്രമാണ് എസ്ഐ ഇങ്ങനെ പെരുമാറിയതെങ്കില് തീര്ച്ചയായും നമുക്ക് ഇതില് കക്ഷിയായ സംഘടനയേയും സംശയിക്കാമായിരുന്നു. പക്ഷേ ഇതങ്ങനെയല്ലല്ലൊ. എസ്ഐ ജോലി ചെയ്തിടത്തെല്ലാം പ്രശ്നങ്ങളില് കുടുങ്ങിയ വ്യക്തിയാണ്. മൂന്ന് കോടതികള് വ്യത്യസ്ത കേസുകളില് താക്കീത് ചെയ്ത വ്യക്തിയാണ് എന്നതില്നിന്നുതന്നെ അദ്ദേഹത്തിന്റെ നിലവാരം ഊഹിക്കാമല്ലോ.
ഇപ്പോഴും ഒരു സ്റ്റേഷന് അധികാരിയായി അദ്ദേഹം ചുമതലയിലിരിക്കുന്നു! ജനങ്ങളെ ദ്രോഹിക്കുന്നു!! ഇത്തരക്കാരെ സേനയില്നിന്നു പുറത്താക്കാന് കഴിയില്ലെങ്കില് എന്തിനാണു സാര് പോലീസ്? പൊതുജനങ്ങളുമായി ഇടപെടാത്ത ഒരു സീറ്റിലേക്ക് മാറ്റാനെങ്കിലും താങ്കള്ക്കു കഴിയില്ലെ? താങ്കളിരിക്കുന്ന സ്ഥാനത്തിന്റെ മഹിമ സംരക്ഷിക്കാനെങ്കിലും.
രാമചന്ദ്രന് പാണ്ടിക്കാട്,മഞ്ചേരി
