ന്യൂദല്ഹി: രാജ്യത്ത് ശിവരാത്രി ആഘോഷങ്ങള്ക്കിടെ ഭീകരാക്രമണ സാധ്യതയുണ്ടെന്ന വിവരം ഭാരതത്തിന് കൈമാറിയത് പാക്കിസ്ഥാന്. ഇതാദ്യമായി ഭീകരാക്രമണ വിവരങ്ങള് കൈമാറുന്ന തലത്തിലേക്ക് ഇരു രാജ്യങ്ങളും തമ്മിലുള്ള സഹകരണം വര്ദ്ധിച്ചെന്ന് വ്യക്തമാക്കുന്ന നടപടിയാണിത്.
പാക് ദേശീയ സുരക്ഷാ ഉപദേഷ്ടാവ് നസീര്ഖാന് ജന്ജയാണ് ഞായറാഴ്ച ഭാരത എന്എസ്എ അജിത് ഡോവലിനെ ഫോണില് വിളിച്ച് ഭീകരാക്രമണ മുന്നറിയിപ്പ് കൈമാറിയത്. ഇതേ തുടര്ന്ന് ഐബിയും റോയും രഹസ്യ വിവരം സംബന്ധിച്ച് പരിശോധന നടത്തി ആക്രമണ സാധ്യത സ്ഥിരീകരിക്കുകയായിരുന്നു.
ഭീകരര്ക്കെതിരെ ഇരുരാജ്യങ്ങളും സംയുക്തമായി മുന്നോട്ടു നീങ്ങുകയാണെന്ന സന്ദേശവും പാക്കിസ്ഥാനും ഭാരതവും ലോകത്തിന് മുന്നില് വെയ്ക്കുകയാണ്. കഴിഞ്ഞ ഡിസംബര് 6ന് ബാങ്കോക്കില് ചേര്ന്ന യോഗത്തില് ഭാരത-പാക് വിദേശകാര്യ സെക്രട്ടറിമാരും എന്എസ്എമാരും ഇത്തരത്തിലൊരു സഹകരണം സംബന്ധിച്ച പ്രാഥമിക ചര്ച്ച നടത്തിയിരുന്നു. വിദേശകാര്യ മന്ത്രാലയ തലത്തിലുള്ള പതിവ് ചര്ച്ചകള്ക്കും സംഭാഷണങ്ങള്ക്കും അപ്പുറം ഭീകരത സംബന്ധിച്ച് സമാന്തര സംവിധാനം ഏര്പ്പെടുത്തണമെന്ന തീരുമാനം ബാങ്കോക്ക് യോഗത്തിലാണ് ഉണ്ടായത്.
എന്നാല് പത്താന്കോട്ട് ആക്രമണം ഈ ശ്രമങ്ങള്ക്ക് ഉലച്ചിലുണ്ടാക്കിയെങ്കിലും പത്തംഗ ഭീകരസംഘം ഗുജറാത്ത് തീരം വഴി ഭാരതത്തിലേക്ക് കടന്നെന്ന വിവരം കൈമാറുക വഴി സമാധാന ചര്ച്ചകളിലേക്ക് രാജ്യത്തെ തിരികെ എത്തിച്ചിരിക്കുകയാണ് പാക് ഭരണകൂടം.
