ആലുവ: ആലുവ മണപ്പുറത്ത് മഹാശിവരാത്രി ആഘോഷത്തെ വരവേല്ക്കുന്നതിനുള്ള ഒരുക്കങ്ങള് പൂര്ത്തിയായി. ആലുവ നഗരസഭ, തിരുവിതാംകൂര് ദേവസ്വം ബോര്ഡ്, ആലുവ അൈദ്വതാശ്രമം എന്നിവയുടെ നേതൃത്വത്തിലാണ് ഭക്തലക്ഷങ്ങളെ സ്വീകരിക്കാന് ഒരുക്കങ്ങള് നടത്തിയത്.
ഇന്ന് രാത്രി ഒന്പത് മണിയോടെ ബലിതര്പ്പണം ആരംഭിക്കും. ബുധനാഴ്ച്ച പുലര്ച്ചെ 6.45വരെ വാവുള്ളതിനാല് ശിവരാത്രി ബലിതര്പ്പണചടങ്ങുകള് നീണ്ടുനില്ക്കും. നാളെ ഉച്ചവരെയായിരിക്കും ശക്തമായ തിരക്കനുഭവപ്പെടുക. സംസ്ഥാനത്തിന്റെ വിവിധ ഭാഗങ്ങളില് നിന്നായി പത്ത് ലക്ഷത്തോളം പേര് എത്തിച്ചേരുമെന്നാണ് പ്രതീക്ഷിക്കുന്നത്. മണപ്പുറത്തെ ബലിതര്പ്പണ ചടങ്ങുകള്ക്ക് ദേവസ്വം ബോര്ഡും മറുകരയില് അദൈ്വതാശ്രമത്തിലെ ബലിതര്പ്പണ ചടങ്ങുകള്ക്ക് ശ്രീനാരായണ ധര്മ്മസംഘം ട്രസ്റ്റും നേതൃത്വം നല്കും. മണപ്പുറത്ത് 300 ഓളം താത്കാലിക ബലിത്തറകള് നിര്മ്മിച്ചിട്ടുണ്ട്. അദൈ്വതാശ്രമത്തില് ഒരേസമയം 4000ത്തോളം പേര്ക്ക് തര്പ്പണ സൗകര്യമൊരുക്കിയിട്ടുണ്ട്.
നഗരസഭയുടെ നേതൃത്വത്തില് മണപ്പുറത്ത് മൂന്ന് ആഴ്ച്ചയോളം നീണ്ടു നില്ക്കുന്ന വ്യാപാരമേളയും വിനോദപരിപാടികളും സംഘടിപ്പിച്ചിട്ടുണ്ട്. 200 ഓളം സ്റ്റാളുകളുണ്ടാകും. താല്ക്കാലിക നഗരസഭാ ഓഫീസ്, പൊലിസ് സ്റ്റേഷന്, ഫയര് സ്റ്റേഷന്, കെഎസ്ഇബി ഓഫീസ്, കെഎസ്ആര്ടിസി ഓഫീസ്, ജില്ലാ ആശുപത്രിയുടെ പ്രഥമ ശുശ്രൂഷ യൂണിറ്റ്, ഹോമിയോ ചികിത്സാ യൂണിറ്റ് എന്നിവ വ്യാപാരമേള അവസാനിക്കും വരെ മണപ്പുറത്തുണ്ടാകും. കൂടാതെ ഇന്നും നാളെയും കെഎസ്ആര്ടിസി ഓഫീസ്, താലൂക്ക് ഓഫീസ് താലൂക്ക് ആശുപത്രിയുടെ പ്രഥമ ശുശ്രൂഷ യൂണിറ്റ് എന്നിവയും മണപ്പുറത്തുണ്ടാകും.
കൊട്ടാരകടവില് നിന്ന് മണപ്പുറത്തേയ്ക്ക് നിര്മ്മിച്ച നടപ്പാലം ജനങ്ങള്ക്ക് ഏറെ സൗകര്യമായിരിക്കും. 30 ലക്ഷം രൂപ ചെലവഴിച്ചാണ് മണപ്പുറം ദീപാലകൃതമാക്കിയത്. നഗരസഭയുടെയും ജില്ലാ ആശുപത്രിയുടെയും ആംബുലന്സുകള് മണപ്പുറത്തുണ്ടാകും. മറ്റ് സ്വകാര്യ ആംബുലന്സുകള് മറ്റിടങ്ങളിലായി സജ്ജീകരിക്കും. മണപ്പുറത്തേയും പരിസരത്തേയും ശുചീകരണത്തിനു മുന്തിയ പരിഗണനയാണ് നല്കിയിട്ടുള്ളത്. തോട്ടക്കാട്ടുകര മുതല് ആല്ത്തറ വരെയും പാലസ് റോഡ് മുതല് കൊട്ടാരക്കടവ് വരെയും വഴിയോര കച്ചവടം നിരോധിച്ചു. സ്വകാര്യ ബസ് സ്റ്റാന്റില് പ്രത്യേക പൊലീസ് എയഡ് പോസ്റ്റ് തുറക്കും. വടക്കേമണപ്പുറത്താണ് വ്യാപാരമേളയും അമ്യുസ്മെന്റ് പാര്ക്കും. പരിപാടിക്ക് നേരിട്ട് മേല്നോട്ടം വഹിക്കുന്നതിന് ഇന്ന് വൈകിട്ട് ആറിന് മണപ്പുറത്തെ താത്കാലിക മുനിസിപ്പല് ഓഫീസില് കൗണ്സില് യോഗം ചേരും.
