നെടുമ്പാശ്ശേരി: സന്തുഷ്ടമായിരിക്കാനുള്ള ഏറ്റവും എളുപ്പവഴി മനുഷ്യന്‍ തന്റെ യഥാര്‍ത്ഥമായ ഭാവത്തിലേക്ക് മടങ്ങുകയാണെന്ന് മുഖ്യ പ്രഭാഷകന്‍ പ്രജാപിതാ ബ്രഹ്മകുമാരീസിന്റെ ദേശീയ വക്താവും അഡീഷണല്‍ സെക്രട്ടറി ജനറലുമായ രാജയോഗി ബ്രിജ്‌മോഹന്‍ പറഞ്ഞു. മനുഷ്യന്റെ യഥാര്‍ത്ഥ ഭാവം ആനന്ദമാണ്. ഭാഷയില്‍ ആനന്ദം എന്ന വാക്കിന് വിപരീതം പോലുമില്ലാത്തത് അത് സ്ഥായിയായ ഭാവമാണ് എന്നതിനാലാണ്.
ആത്മാവിനെക്കുറിച്ചുള്ള സത്യങ്ങള്‍ മറന്നുപോയതിനാലാണ് മനുഷ്യന്‍ ദുഃഖിതനായിരിക്കുന്നത്. ശരീരമാണ് എന്ന് കരുതുമ്പോള്‍ ദുരിതങ്ങള്‍ നമ്മെ തേടി വരികയാണ്. ശരീരത്തിനുള്ളിലെ ചൈതന്യമായ ആത്മാവാണ് എന്ന സത്യം തിരിച്ചറിയണം. ആ ചൈതന്യത്തെ അനുഭവിക്കാനുള്ള എളുപ്പവഴിയാണ് രാജയോഗധ്യാനമെന്ന് അദ്ദേഹം പറഞ്ഞു. രാജയോഗധ്യാനം ഈശ്വരനുമായി ബന്ധം യോജിപ്പിക്കുന്ന പ്രക്രിയയാണ്.
നെടുമ്പാശ്ശേരി രാജയോഗ ഭവനില്‍ നടന്ന ‘ആരോഗ്യകരവും സന്തുഷ്ടവുമായ സമൂഹത്തിന് രാജയോഗധ്യാനം’ എന്ന പ്രഭാഷണ പരിപാടിയില്‍ സംസാരിക്കുകയായിരുന്നു അദ്ദേഹം. അന്‍വര്‍ സാദത്ത് എംഎല്‍എ പ്രഭാഷണം ഉദ്ഘാടനം ചെയ്തു. പരിപാടിയില്‍ കാലടി ശ്രീശങ്കര സംസ്‌കൃത സര്‍വകലാശാല വൈസ് ചാന്‍സലര്‍ ഡോ.എം.സി. ദിലീപ് കുമാര്‍ അധ്യക്ഷനായിരുന്നു. നാഗാര്‍ജുന ആയുര്‍വേദ സെന്റര്‍ ഡയറക്ടര്‍ ഡോ.കെ.കൃഷ്ണന്‍ നമ്പൂതിരി മുഖ്യാതിഥി ആയിരുന്നു. രാജയോഗി ബി.കെ.വാസന്‍ സ്വാഗതം പറഞ്ഞു. ബ്രഹ്മകുമാരീസ് തൃശൂര്‍, എറണാകുളം ജില്ലകളിലെ സെന്റര്‍ ഡയറക്ടര്‍ ബ്രഹ്മകുമാരി രാധ നന്ദി രേഖപ്പെടുത്തി. ബി.കെ.സുജന സംസാരിച്ചു.
