ന്യൂദല്ഹി: പാക്കിസ്ഥാന് അനുകൂല മുദ്രാവാക്യം വിളിച്ച സംഭവത്തില് പങ്കുള്ളവര്ക്ക് മാപ്പുനല്കില്ലെന്ന് കേന്ദ്രസര്ക്കാര് സര്വ്വകക്ഷി യോഗത്തില് വ്യക്തമാക്കി. നിയമാനുസൃതമുള്ള കര്ശന നടപടികള് കേസില് സ്വീകരിക്കുമെന്ന് കേന്ദ്രസര്ക്കാര് അറിയിച്ചു. ജെഎന്യു വിഷയത്തില് ജനാധിപത്യ രീതിയില് പാര്ലമെന്റില് ചര്ച്ച നടത്താന് തയ്യാറാണെന്നും പ്രധാനമന്ത്രി നരേന്ദ്രമോദി വിവിധ രാഷ്ട്രീയ പാര്ട്ടി നേതാക്കളെ യോഗത്തില് അറിയിച്ചു.
പാര്ലമെന്റ് ബജറ്റ് സമ്മേളനത്തിന് മുന്നോടിയായി പ്രധാനമന്ത്രി വിളിച്ചു ചേര്ത്ത സര്വ്വകക്ഷി യോഗത്തില് പ്രതിപക്ഷ പാര്ട്ടികളാണ് ജെഎന്യു വിഷയം ഉന്നയിച്ചത്. എന്നാല് വിഘടനവാദ സംഘടനകളുടെ മുദ്രാവാക്യങ്ങള് വിദ്യാര്ത്ഥി സംഘടനകള് ഏറ്റുവിളിക്കുന്നതിനെ മറ്റു രാഷ്ട്രീയപാര്ട്ടികള് അപലപിച്ചു. രാജ്യവിരുദ്ധ മുദ്രാവാക്യം വിളിച്ചതിനെ കോണ്ഗ്രസ് ന്യായീകരിച്ചിട്ടില്ലെന്നും വിദ്യാര്ത്ഥി യൂണിയന് പ്രസിഡന്റ് കനയ്യ കുമാര് നിരപരാധിയാണെന്ന് മാത്രമാണ് പറയുന്നതെന്നും രാജ്യസഭാ പ്രതിപക്ഷ നേതാവ് ഗുലാംനബി ആസാദ് യോഗത്തില് ന്യായീകരിച്ചു.
ജെഎന്യു ഉള്പ്പെടെ എല്ലാ വിഷയങ്ങളും ചര്ച്ച ചെയ്യാന് കേന്ദ്രസര്ക്കാര് തയ്യാറാണെന്ന് രാഷ്ട്രീയ പാര്ട്ടികളെ അറിയിച്ചിട്ടുണ്ടെന്ന് സര്വ്വകക്ഷി യോഗ തീരുമാനങ്ങള് വിശദീകരിച്ച് കേന്ദ്രപാര്ലമെന്ററികാര്യമന്ത്രി വെങ്കയ്യനായിഡു പറഞ്ഞു. എന്നാല് സമാധാനപരമായ നിലയില് സഭ സമ്മേളിക്കുന്ന സ്ഥിതി സംജാതമാകണമെന്നും അദ്ദേഹം പറഞ്ഞു.
അതിനിടെ അഫ്സല് ഗുരു അനുസ്മരണം സംഘടിപ്പിക്കുകയും മുദ്രാവാക്യം വിളിക്കുകയും ചെയ്ത ദല്ഹി യൂണി: മുന് അധ്യാപകന് പ്രൊഫ. ഗിലാനിയെ പോലീസ് അറസ്റ്റു ചെയ്തിട്ടുണ്ട്. ജവഹര്ലാല് നെഹ്രു സര്വ്വകലാശാലയില് ഭാരത വിരുദ്ധ മുദ്രാവാക്യം വിളിച്ച കേസില് ദല്ഹി പോലീസ് നടത്തുന്ന അന്വേഷണം തുടരട്ടെയെന്ന് ദല്ഹി ഹൈക്കോടതി ഉത്തരവിട്ടിട്ടുമുണ്ട്.
