എരമല്ലൂര്‍: ജില്ലയുടെ സമഗ്രവികസനത്തിന് പ്രത്യേക പാക്കേജ് അനുവദിപ്പിക്കാന്‍ കേന്ദ്രസര്‍ക്കാരിനോട് ആവശ്യപ്പെടുമെന്നും ഇത് കേരളത്തിന്റെ വികസനത്തില്‍ മാറ്റമുണ്ടാക്കുമെന്നും ബിജെപി സംസ്ഥാന അധ്യക്ഷന്‍ കുമ്മനം രാജശേഖരന്‍ പറഞ്ഞു.
ആലപ്പുഴ ജില്ലയില്‍ പ്രവേശിച്ച വിമോചന യാത്രയ്‌ക്ക് എരമല്ലൂരില്‍ നല്‍കിയ ആദ്യ സ്വീകരണത്തില്‍ സംസാരിക്കുകയായിരുന്നു സംസ്ഥാന പ്രസിഡന്റ്.
സംസ്ഥാനത്തിന്റെ ഓരോ പ്രദേശത്തും സഞ്ചരിക്കുമ്പോള്‍ കാണാന്‍ കഴിയുന്നത് ദുരിതം അനുഭവിക്കുന്ന സാധാരണക്കാരെയാണ്. വര്‍ഷങ്ങളായി മാറി മാറി കേരളത്തില്‍ ഭരണം നടത്തി വരുന്ന യുഡിഎഫും എല്‍ഡിഎഫും കേരളത്തില്‍ സാധാരണ ജനങ്ങള്‍ക്ക് എന്ത് നേട്ടമാണുണ്ടായിരിക്കുന്നത്.
ആലപ്പുഴ ജില്ലയില്‍ തന്നെ പരിശോധിച്ചാല്‍ കാണാന്‍ കഴിയുന്നത് പരമ്പരാഗതമായ കയര്‍-കാര്‍ഷിക-മത്സ്യ മേഖലയിലെ തകര്‍ച്ചയാണ്. വ്യാവസായിക സംരംഭങ്ങള്‍ ഓരോന്നും അടച്ചുപൂട്ടുന്നു. തൊഴിലാളികള്‍ക്ക് തൊഴില്‍ നഷ്ടപ്പെട്ട് ജീവിക്കാന്‍ മാര്‍ഗ്ഗമില്ലാതാകുന്നു. ഇതിനെല്ലാം കാരണം ഭരണാധികാരികളുടെ പരാജയമാണ്. സംസ്ഥാനത്തിന്റെ വികസനത്തിന് ഇപ്പോള്‍ കേന്ദ്രസര്‍ക്കാര്‍ നിരവധി പദ്ധതികള്‍ അനുവദിക്കുന്നുണ്ട്. എന്നാല്‍ ഇത് ജനോപകാരപ്രദമായി പ്രയോജനപ്പെടുത്താന്‍ സംസ്ഥാന സര്‍ക്കാര്‍ ശ്രമിക്കുന്നില്ല. സംസ്ഥാന ഭരണം നടത്തുന്ന യുഡിഎഫ്, എല്‍ഡിഎഫ് ഭരണാധികാരികളും നേതാക്കന്മാരും കോടിക്കണക്കിന് രൂപയുടെ അഴിമതിയും തട്ടിപ്പും നടത്തി രാഷ്‌ട്രീയപരമായും വ്യക്തിപരമായും നേട്ടങ്ങളുണ്ടാക്കുന്നു. ഇതിനുള്ള തെളിവുകളാണ് ഇപ്പോള്‍ പുറത്തുവന്നുകൊണ്ടിരിക്കുന്നത്. ഇങ്ങനെ ദുര്‍ഭരണവും അഴിമതിയും നടത്തുന്ന യൂഡിഎഫ്-എല്‍ഡിഎഫ് ഭരണാധികാരികളെയും നേതാക്കളെയും നിയമത്തിന്റെ മുന്നില്‍കൊണ്ടുവന്ന് കയ്യാമം വെപ്പിക്കുന്നതിന് ബിജെപിക്കൊപ്പം ജനങ്ങളെ അണിനിരത്തുമെന്നും അദ്ദേഹം പറഞ്ഞു.
ജനകീയ പ്രശ്‌നങ്ങള്‍ ഏറ്റെടുത്തുകൊണ്ട് സംശുദ്ധമായ ഭരണം നടത്തി സാധാരണക്കാരുടെ അടിസ്ഥാന ആവശ്യങ്ങളായ അന്നം, ജലം, മണ്ണ്, തൊഴില്‍, തുല്യനീതി എന്നിവ നേടിയെടുക്കാനാണ് ബിജെപിയുടെ ശ്രമം. സാധാരണക്കാര്‍ക്കുവേണ്ടി നിലകൊള്ളുന്നതു കൊണ്ടാണ് ബിജെപിക്ക് ഇപ്പോള്‍ ജനപിന്തുണ ലഭിക്കുന്നതെന്നും പ്രസിഡന്റ് പറഞ്ഞു.
അരൂര്‍ നിയോജക മണ്ഡലം പ്രസിഡന്റ് ടി. സജീവ് ലാല്‍ അധ്യക്ഷത വഹിച്ചു. ബിജെപി സംസ്ഥാന ജനറല്‍ സെക്രട്ടറിമാരായ കെ. സുരേന്ദ്രന്‍, എം.ടി. രമേശ്, സംസ്ഥാന സെക്രട്ടറി വി.വി. രാജേഷ്, ദക്ഷിണ മേഖലാ പ്രസിഡന്റ് വെള്ളിയാകുളം പരമേശ്വരന്‍, ദക്ഷിണമേഖലാ സെക്രട്ടറി എന്‍. പത്മകുമാര്‍, ജില്ലാ പ്രസിഡന്റ് കെ.സോമന്‍, ജില്ലാ ജനറല്‍ സെക്രട്ടറി കെ. ജയകുമാര്‍, വൈസ് പ്രസിഡന്റ് സി.എ. പുരുഷോത്തമന്‍, ഹിന്ദു ഐക്യവേദി സംസ്ഥാന ഉപാധ്യക്ഷന്‍ വി. പത്മനാഭന്‍, ബിജെപി അരൂര്‍ നിയോജക മണ്ഡലം സെക്രട്ടറിമാരായ പെരുമ്പളം ജയകുമാര്‍, അഡ്വ. ബി. ബാലാനന്ദ്, സി. മധുസൂദനന്‍, അമ്പിളി മധു തുടങ്ങിയവര്‍ പ്രസംഗിച്ചു.
