ചക്കരക്കല്: ദൃശ്യവിസ്മയങ്ങളും താളച്ചുവടുകളുമായി ചെമ്പിലോട് ഗ്രാമപഞ്ചായത്തിന്റെ ജനകീയോല്സവമായ ചക്കരക്കല് ഫെസ്റ്റ് 13 ന് തുടങ്ങും. ചക്കരക്കല്ല് കമ്യൂണിറ്റി ഹെല്ത്ത് സെന്ററിന്റെ മുന്നിലുള്ള മൈതാനത്താണ് 9 ദിവസത്തെ മേള നടക്കുന്നത്. നാടിന്റെ സാംസ്കാരിക പാരമ്പര്യം ഉയര്ത്തിപ്പിടിക്കുന്നതിനും വികസനത്തിനായി ജനകീയ കൂട്ടായ്മ രൂപപ്പെടുത്തുന്നതിനുമാണ് മേളയിലൂടെ ലക്ഷ്യമിടുന്നത്.
13 ന് മൗവഞ്ചേരി മുതല് ചക്കരക്കല്ല് വരെ വര്ണാഭമായ ഘോഷയാത്രയോടെയാണ് മേളയുടെ തുടക്കം. പ്രതിഭാസംഗമം, കലാ സാംസ്കാരിക പരിപാടികള്, ചിത്രപ്രദര്ശനം, കാര്ഷിക പ്രദര്ശനം, അമ്യൂസ്മെന്റ് പാര്ക്ക് എന്നിവ മേളയുടെ ഭാഗമായി ഒരുക്കും. കൂടാതെ ഓരോ ദിവസവും വിവിധ വിഷയങ്ങളില് സെമിനാറും നടക്കും. മാലിന്യ സംസ്കരണവും വിഷരഹിത പച്ചക്കറിയും, ജനകീയാസൂത്രണത്തിന്റെ 20 വര്ഷം, പൊതു വിദ്യാഭ്യാസ മേഖല, കേരളീയ സമൂഹവും നവോത്ഥാന മൂല്യങ്ങളും, സ്ത്രീയും സമൂഹവും, വര്ത്തമാന കാലവും യുവജനങ്ങളും, ജീവിതശൈലീ രോഗങ്ങള് എന്നീ വിഷയങ്ങളില് നടക്കുന്ന സെമിനാറില് വിദഗ്ദ്ധര് ക്ലാസെടുക്കും.
ചക്കരക്കല്ല് ഗോകുലം കല്യാണമണ്ഡപത്തിന് സമീപമാണ് മേളയോടനുബന്ധിച്ച അമ്യൂസ്മെന്റ് പാര്ക്ക് സജ്ജീകരിക്കുക. ഫ്ളവര് ഷോ, ഗാര്മെന്റ്സ്, ഫാന്സി, ഫുഡ് ഐറ്റംസ് തുടങ്ങിയവയും മേളയുടെ ഭാഗമായി ഉണ്ടാകും. കാര്ഷിക സംസ്കൃതിയുടെ ഓര്മപ്പെടുത്തലാവുന്ന കാര്ഷികോപകരണ പ്രദര്ശനവും പഞ്ചായത്തിന്റെ നേട്ടങ്ങളും പാരമ്പര്യവും ഉള്ക്കൊള്ളിക്കുന്ന ചിത്രപ്രദര്ശനവും കാണികള്ക്ക് വിരുന്നാകും. സംഗീത- നൃത്ത കലാപരിപാടികളും നടക്കും.
