തലശ്ശേരി: കേരളത്തില്‍ വ്യവസായിക വികസനത്തിന് ഉതകുന്ന തരത്തിലുള്ള അന്തരീക്ഷം ഉയര്‍ന്ന് വരണമെന്ന് ഡോ: ടി.എം.തോമസ് ഐസക്ക്് എംഎല്‍എ അഭിപ്രായപ്പെട്ടു. ബ്രണ്ണന്‍ കോളേജ് 125-ാം വാര്‍ഷികത്തിന്റെ ഭാഗമായി ഗവേഷണ രീതിശാസ്ത്രം (റിസേര്‍ച്ച് മെത്തഡോളജി) എന്ന വിഷയത്തില്‍ സംഘടിപ്പിച്ച സെമിനാര്‍ ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. ഉന്നതവിദ്യാഭ്യാസ മേഖലയില്‍ വ്യവസായമേഖലയ്‌ക്ക്് മുതല്‍കൂട്ടാകുന്ന തരത്തിലുള്ള പുന:സംഘടന ആവശ്യമാണെന്ന് ഡോ: തോമസ് ഐസക്ക്് പറഞ്ഞു. പുതിയ കേരളത്തിന് പരമ്പരാഗത വ്യവസായങ്ങളില്‍ നിന്നുപരിയായി നൈപുണ്യത്തിലും വിജ്ഞാനത്തിലും അധിഷ്ഠിതമായ വ്യവസായങ്ങളുടെ ആവശ്യകത ഉണ്ടെന്ന് അദ്ദേഹം പറഞ്ഞു. അധ്യയനരീതികളിലും ഗവേഷണ രീതിശാസ്ത്രത്തിലും കാലാനുസൃതമായ മാറ്റങ്ങള്‍ വരണമെന്നും അദ്ദേഹം അഭിപ്രായപ്പെട്ടു.
ചടങ്ങില്‍ കോളേജ് പ്രിന്‍സിപ്പല്‍ ഡോ:പി.എം.ഇസ്മായില്‍ അധ്യക്ഷത വഹിച്ചു. കണ്ണൂര്‍ സര്‍വ്വകലാശാല അപ്ലൈഡ് എക്‌ണോമിക്‌സ് വിഭാഗം തലവന്‍ ഡോ:കെ.ഗംഗാധരന്‍, ഡോ: എന്‍.ചന്ദ്രഭാനു, പ്രൊഫ.കെ.ഫല്‍ഗുണന്‍, ഡോ:വി.പി.ജയകുമാര്‍, പി.നിഷ, കോളേജ് യുണിയന്‍ ചെയര്‍മാന്‍ ഇ.കെ.അനുരാഗ് എന്നിവര്‍ സംസാരിച്ചു.
