കാസര്കോട്: കാസര് കോട് മെഡിക്കല് കോളേജ് നിര്മ്മാണോദ്ഘാടനം എന്.എ. നെല്ലിക്കുന്ന് എം.എല്.എയുടെ നേതൃത്വത്തില് തെരഞ്ഞെടുപ്പ് മുന്നില് കണ്ട് നടത്തിയ പ്രഹസനം മാത്രമാണെന്ന് ബിജെപി ജില്ലാ പ്രസിഡണ്ട് അഡ്വ.കെ.ശ്രീകാന്ത് പറഞ്ഞു.
തെരഞ്ഞെടുപ്പ് അടുത്തതോടെ ജനങ്ങളുടെ കണ്ണില് പൊടിയിടാനുള്ള ചെപ്പടി വിദ്യയുമായി സര്ക്കാര് ഇറങ്ങിയിരിക്കുകയാണ്. രണ്ട് വര്ഷം മുമ്പ് സര്ക്കാര് വലിയ ആഘോഷമായി മെഡിക്കല് കോളേജിന് തറക്കല്ലിടല് കര്മ്മം നടത്തിയിട്ടുണ്ട്. നിര്മ്മാണ പ്രവര്ത്തനങ്ങള് വര്ഷം രണ്ട് കഴിഞ്ഞിട്ടും ആരംഭിക്കാതായതോടെ ജനങ്ങള് ശക്തമായ പ്രതിഷേധവുമായി രംഗത്ത് വന്നിരുന്നു. സര്ക്കാറിന്റെയും എംഎല്എയുടെയും ഭാഗത്ത് നിന്ന് വന്ന വീഴ്ചകള് മറച്ച് വെയ്ക്കാനാണ് വീണ്ടും പുതിയ നാടകവുമായി എംഎല്എ രംഗത്ത് വന്നിരിക്കുന്നത്.
നിര്മ്മാണം പൂര്ത്തിയാക്കി പ്രവര്ത്തനം ആരംഭിക്കേണ്ട സമയമായിട്ടും തറക്കല്ലില് തന്നെയായിരുന്ന മെഡിക്കല് കോളേജ് തെരഞ്ഞെടുപ്പിന് മുമ്പ് തട്ടി കൂട്ടി ജനങ്ങളുടെ കണ്ണില് പോടിയിടാനുള്ള നീക്കമാണ് നടന്നു കൊണ്ടിരിക്കുന്നത്. നിര്മ്മാണ പ്രവര്ത്തനങ്ങള് ജനങ്ങള് സൂക്ഷ്മമായി നിരീക്ഷിച്ച് വരികയാണ്. വീണ്ടും അലംഭാവം കാണിക്കാനാണ് നീക്കമെങ്കില് ശക്തമായി ഇടപെടുക തന്നെ ചെയ്യുമെന്ന് ശ്രീകാന്ത് കൂട്ടിച്ചേര്ത്തു. നിര്മ്മാണോദ്ഘാടന ചടങ്ങില് ആശംസാ പ്രസംഗം നടത്തുകയായിരുന്നു ശ്രീകാന്ത്.
