സ്വകാര്യ ദു:ഖങ്ങള് മറച്ചുവെച്ച് മലയാളിയെ ചിരിപ്പിക്കുക മാത്രം ചെയ്ത കല്പ്പന ഒടുവില് സഹപ്രവര്ത്തകരെ കരയിപ്പിച്ച് യാത്രയായി. സിനിമാ ലോകത്ത് മിത്രങ്ങള് മാത്രമുണ്ടായിരുന്ന നടിയായിരുന്നു കല്പ്പന. എവിടെ ദുഃഖമുണ്ടായാലും അവിടെ സാന്ത്വനവുമായി കല്പ്പന ഓടിയെത്തി.
തന്റെ ഹൃദയസംബന്ധമായ അസുഖം പോലും മറ്റുള്ളവരെ അറിയിക്കാതെ ചെല്ലുന്നിടത്തെല്ലാം ചിരിയുടെ മാലപ്പടക്കം പൊട്ടിച്ച അവര് എല്ലാവരേയും ചിരിപ്പിക്കുമ്പോഴും സ്വകാര്യമായി കരയുകയായിരുന്നു . വിവാഹ മോചനം അവരെ തളര്ത്തിയിരുന്നു. അടുത്തിടെ കൊച്ചിയിലെ അമൃതാ ആശുപത്രിയില് കല്പ്പന ചികില്സയ്ക്ക് എത്തിയിരുന്നു. അപ്പോഴും രോഗമെന്തെന്ന് സിനിമ ലോകത്ത് ആരോടും പറഞ്ഞില്ല.
കലാരഞ്ജിനിയും ഉര്വ്വശിയും സിനിമാ ലോകത്ത് ചുവടുറപ്പിച്ചപ്പോള് കല്പ്പനയ്ക്കും സാധ്യതകള് ഏറെയായിരുന്നു. എന്നാല് കുടുംബത്തിനായിരുന്നു കല്പ്പന കൂടുതല് പ്രാധാന്യം നല്കിയത്. അനുജനേയും നോക്കി ചേച്ചി വീട്ടില് തന്നെ കഴിഞ്ഞു. അങ്ങനെ സഹോദരനുമായി ഏറെ ആത്മബന്ധം കല്പ്പനയ്ക്കുണ്ടായിരുന്നു. ഈ സഹോദരന്റെ മരണവും കല്പ്പനയ്ക്ക് അപ്രതീക്ഷിതമായിരുന്നു. അതിന് ശേഷമാണ് അവര് സിനിമയില് കൂടുതല് സജീവമായത്. എല്ലാ ദുഃഖവും ചിരിച്ച് മറയ്ക്കാനുള്ള ഇടമായിരുന്നു സിനിമ.
താരസംഘടനയായ അമ്മയില് എന്നും സജീവമായിരുന്നു. എക്സിക്യുട്ടീവ് അംഗമായ കല്പ്പന കഴിഞ്ഞ യോഗത്തിന് എത്തിയിരുന്നില്ല. അസുഖമാണ് എന്ന് മാത്രമാണ് അറിയിച്ചത്. കല്പ്പനയുടെ മരണവാര്ത്ത കേട്ടവരുടെ മനസിലേക്ക് ഓടിയെത്തിയത് അവസാന ചിത്രമായ ചാര്ളിയിലെ ക്യൂന് മേരിയെന്ന കഥാപാത്രമാണ്. രണ്ട് സീനില് മാത്രം പ്രത്യക്ഷപ്പെടുന്ന ചാര്ളിയെന്ന ചിത്രത്തില് പ്രേക്ഷകരുടെ മനസ്സില് അവശേഷിപ്പിക്കുന്നത് വലിയ ഒരു നീറ്റലാണ്.
മേരി മരണത്തിലേക്ക് മിന്നിമായുന്ന കഥാപാത്രമാണെന്നത് കല്പ്പനയുടെ മരണവുമായി ചേര്ന്ന് നില്ക്കുന്നു. നല്ലൊരു പിറന്നാള് ദിനം സമ്മാനിച്ചതിന്റെ സംതൃപ്തിയില് ചാര്ളി ആകാശ നീലിമയിലേക്ക് നോക്കി നില്ക്കെ എല്ലാവരേയും കബളിപ്പിച്ച് മേരി മരണത്തിന്റെ ആഴങ്ങളിലേക്ക് മിന്നിമറയുന്ന സീന് പ്രേക്ഷക മനസുകളെ കണ്ണീരണിയിക്കുന്നതാണ്. ഒട്ടും പ്രതിക്ഷീക്കാതെ മരണത്തിലേക്ക് കല്പ്പന നിങ്ങിയപ്പോള് ചാര്ളിയിലെ കഥാപാത്രം തേങ്ങലായി അലയടിക്കുകയാണ്.
