കണ്ണൂര്: ജില്ലാ അഗ്രി ഹോര്ട്ടി കള്ച്ചറല് സൊസൈറ്റിയുടെ ആഭിമുഖ്യത്തില് സംഘടിപ്പിച്ചുവരുന്ന കണ്ണൂര് പുഷ്പോത്സവം ഇന്ന് മുതല് 27 വരെ കലക്ടറേറ്റ് മൈതാനിയില് നടക്കും. വൈകിട്ട് 5 മണിക്ക് സൊസൈറ്റി പ്രസിഡന്റുകൂടിയായ ജില്ലാ കലക്ടര് പി ബാലകിരണിന്റെ അധ്യക്ഷതയില് പി.കെ.ശ്രീമതി എംപി ഉദ്ഘാടനം ചെയ്യും. കോര്പ്പറേഷന് മേയര് ഇ.പി.ലത, എ.പി.അബ്ദുളളക്കുട്ടി എംഎല്എ എന്നിവര് വിശിഷ്ടാതിഥികളായിരിക്കും.
കേരളത്തില് നിന്നും തമിഴ്നാട്ടില് നിന്നുമുളള വിവിധ നഴ്സറി സ്ഥാപനങ്ങള് ഒരുക്കുന്ന അമ്പതോളം സ്റ്റാളുകളില് വൈവിധ്യമാര്ന്നതും ആകര്ഷണീയവുമായ അനേകം ചെടികളും പച്ചക്കറി-ഫലവൃക്ഷ തൈകളും മറ്റു നടീല് വസ്തുക്കളും ഔഷധ സസ്യങ്ങളും മിതമായ നിരക്കില് ലഭ്യമാവും. സര്ക്കാര് സ്ഥാപനങ്ങളായ ആറളം ഫാം, കരിമ്പം ജില്ലാ കൃഷിത്തോട്ടം, മില്മ, റെയ്ഡ്കോ തുടങ്ങിയവയുടെ പവലിയനുകളും ഒരുക്കുന്നുണ്ട്. പതിനായിരം ചതുരശ്ര അടി വിസ്തീര്ണ്ണത്തില് പ്രത്യേകം തയ്യാറാക്കുന്ന ഉദ്യാനം പുഷ്പോല്സവ നഗരിയിലെ ആകര്ഷണീയതയാവും.
പുഷ്പാലങ്കാരം, വെജിറ്റബിള് കാര്വിങ്ങ്, പാചകം, പോട്ട് പെയിന്റിങ്ങ്, സാലഡ് അറേഞ്ച്മെന്റ്, മൈലാഞ്ചിയിടല്, പുഷ്പറാണി, പുഞ്ചിരി, ഓലമടയല്, കൊട്ടമടയല്, തേങ്ങ പൊതിക്കല്, തേങ്ങ ചിരവല് തുടങ്ങിയ വിവിധ മത്സരങ്ങളും സംഘടിപ്പിച്ചിട്ടുണ്ട്.
18 ന് വിഷമില്ലാത്ത പച്ചക്കറി വീട്ടുമുറ്റത്ത്, 20 ന് ക്ഷീരവികസന മേഖല പ്രശ്നങ്ങളും പരിഹാരങ്ങളും, 22 ന് ഉറവിട മാലിന്യ നിര്മ്മാര്ജ്ജനം-പ്രസക്തിയും പ്രായോഗികതയും എന്നീ വിഷയങ്ങളില് ശില്പശാലകളും സംഘടിപ്പിച്ചിട്ടുണ്ട്. പ്രദര്ശന നഗരിയില് എല്ലാ ദിവസവും വൈകുന്നേരം കലാപരിപാടികളുമുണ്ടാവും.
വാര്ത്താ സമ്മേളനത്തില് ജില്ല അഗ്രി ഹോര്ട്ടി കള്ച്ചറല് സൊസൈറ്റി സെക്രട്ടറിയും പുഷ്പോത്സവം ജനറല് കണ്വീനറുമായ ബി.പി.റൗഫ്, വൈസ് പ്രസിഡണ്ടുമാരായ ഗൗരി നമ്പ്യാര്, പി.സി.മിത്രന്, ട്രഷറര് വി.പി.കിരണ്, പ്രോഗ്രാം കണ്വീനര് പി.വി.രത്നാകരന് എന്നിവര് സംബന്ധിച്ചു.
പ്രതികരിക്കാൻ ഇവിടെ എഴുതുക: