തലശ്ശേരി: ഏഴ് വര്ഷം മുമ്പ് നടന്ന ബാങ്ക് കവര്ച്ചാക്കേസ് അനിശ്ചതത്വത്തില് തന്നെ തുടരുന്നു. പൊന്ന്യം സര്വ്വീസ് സഹകരണ ബേങ്കില് നിന്ന് 23 കിലോ പഴയ സ്വര്ണ്ണാഭരണങ്ങള് കൊള്ളയടിക്കപ്പെട്ടപ്പോള് തന്നെ ഉയര്ന്നിരുന്ന ദുരൂഹതയാണ് ഇപ്പോഴും നിലനില്ക്കുന്നത്. ബാങ്ക് കവര്ച്ചനടത്തിയവര് എന്ന നിലയില് തമിഴ്നാട്ടിലെ തുരുട്ട് ഗ്രാമെന്നറിയപ്പെടുന്ന പീരുമേട്ടിലെ കിള്ളിക്കുറിച്ചി സ്വദേശികളായ ഏഴുമലൈ, തങ്കരാജ്, ശക്തിവേല്, വേല്മരുരുകന്, ഗണേശന്, അഞ്ചാംപുളി എന്നിവരെയാണ് അന്നത്തെ കേസന്വേഷണ സംഘം അറസ്റ്റ് ചെയ്ത് കോടതയില് ഹാജരാക്കിയിരുന്നത്. എന്നാല് അന്വേഷണ ഉദ്യോഗസ്ഥര്ക്ക് കൃത്യസമയത്ത് കുറ്റപത്രം സമര്പ്പിക്കാന്പോലും സാധിച്ചിരുന്നില്ല. അതോടെ പ്രതി ചേര്ക്കപ്പെട്ടവര് ജാമ്യത്തിലിറങ്ങി മുങ്ങുകയും ചെയ്തു.
ഇതേസമയത്ത് കാഞ്ഞങ്ങാട് പെരിയ ബാങ്ക് കവര്ച്ച സംഘത്തെ പിടികൂടി പ്രതികളെ വിചാരണ ചെയ്തു. കേസും അവസാനിച്ചുകഴിഞ്ഞു. എന്നാല് പെരിയാബാങ്ക് കവര്ച്ച കേസിലെ പ്രതികള്ക്കും പൊന്ന്യം ബാങ്ക് കവര്ച്ചയില് പങ്കുണ്ടെന്നാണ് അന്വേഷണ ഉദ്യോഗസ്ഥര് പറഞ്ഞിരുന്നത്. പെരിയ ബാങ്കില് നിന്നും കളവ് പോയ കുറെ ആഭരണങ്ങളാണ് പൊന്ന്യം ബാങ്ക് കളവ് കേസില് തൊണ്ടിമുതലാക്കി മാറ്റിയതെന്ന ആക്ഷേപവും നേരത്തെ ഉണ്ടായിരുന്നു. എന്നാല് പണയ സ്വര്ണ്ണാഭരണങ്ങള്ക്ക് ഇന്ഷൂറന്സ് പരിരക്ഷ ഉറപ്പാക്കിയിട്ടുണ്ടെന്നും അതിനാല് ഇടപാടുകാര് ഭയപ്പെടേണ്ടതില്ലെന്നുമുള്ള ബാങ്ക് ഭരണ സമിതിയുടെയും ജീവനക്കാരുടെയും വാദത്തിന് മുന്നില് ഇടപാടുകാര് മൗനം പാലിച്ചു. ആ കാലഘട്ടത്തില് ബാങ്ക് കവര്ച്ചയുമായി ബന്ധപ്പെട്ട് ചിലര് നടത്തിയ സംശയങ്ങളും ആരോപണങ്ങളും ഭരണസമിതിയെ അനുകൂലിക്കുന്ന രാഷ്ട്രീയ പാര്ട്ടിക്കാര് ഇടപെട്ടും ഭീഷണിപ്പെടുത്തിയും ഒതുക്കിയിരുന്നതായും റിപ്പോര്ട്ടുകള് ഉണ്ടായിരുന്നു.
എന്നാല് യഥാര്ത്ഥ കുറ്റവാളികളെ ഇതുവരെ പിടികൂടിയിട്ടില്ല എന്നാണ് ഏഴ് വര്ഷം പിന്നിട്ടിട്ടും മനസ്സിലാക്കാന് കഴിയുന്നത്. ഇതേ ക്ലാസില് പ്രതിചേര്ക്കപ്പെട്ട മുഴുവന്പേരെയും ഇതുവരെ പിടികൂടുകയോ മോഷണം പോയ മുഴുവന് സ്വര്ണ്ണാഭരണങ്ങളും കണ്ടെടുക്കുകയോ ചെയ്തിട്ടില്ല. ബാങ്ക് ഇന്ഷൂര് ചെയ്ത യുനൈറ്റഡ് ഇന്ത്യകമ്പനി ഭാഗീകമായി കവറേജ് നല്കിയിരുന്നു. എന്നാല് കേസ് തീര്പ്പാക്കാത്തതിനാല് 55 ലക്ഷം രൂപ ബാങ്ക് സ്വന്തം നിലയില് പണയ സ്വര്ണ്ണാഭരണങ്ങള് നഷ്ടപ്പെട്ട ഇടപാട്കാര്ക്ക് നല്കി എന്നാണ് അറിയുന്നത്.
ഇതാണ് ഇപ്പോള് വിവാദമാകുന്നത്. യഥാര്ത്ഥ മോഷ്ടാക്കളെ പിടികൂടിയില്ല. മോഷണ വസ്തുക്കള് പൂര്ണ്ണമായും കണ്ടെത്താന് കഴിഞ്ഞില്ല. കേസ് നടത്തുവാന് പോലും കഴിയാത്തവിധം ഒതുക്കിതീര്ത്തു എന്നൊക്കെയാണ് ഇപ്പോള് ഈ കേസുമായി ബന്ധപ്പെട്ട് ചര്ച്ച ചെയ്യപ്പെടുന്നത്. സിപിഎം അധീനതയിലുള്ളതാണ് പൊന്ന്യം സര്വ്വീസ് സഹകരണ ബേങ്ക് ഭരണ സമിതി. കളവുപോകുമ്പോഴുണ്ടായിരുന്ന ഭരണസമിതിയെ പാര്ട്ടി പിന്നീട് പുനഃസംഘടിപ്പിക്കുകയും ചെയ്തിരുന്നു.
