കൊച്ചി: സ്വര്‍ണ്ണവ്യാപാരി ബോബി ചെമ്മണ്ണൂര്‍ നിരുപാധികം മാപ്പപേക്ഷിച്ച സാഹചര്യത്തില്‍ എറണാകുളം സെഷന്‍സ് കോടതിയിലുള്ള കേസ് പിന്‍വലിക്കാന്‍ തയാറാണെന്ന് വ്യക്തമാക്കി നടി ഹൈക്കോടതിയില്‍ സത്യവാങ്മൂലം നല്‍കി. ഇതോടെ തുടര്‍ നടപടികള്‍ ഹൈക്കോടതി സ്റ്റേ ചെയ്തു. തനിക്കെതിരായ കേസ് പിന്‍വലിക്കണമെന്ന് ആവശ്യപ്പെട്ട് ബോബി ചെമ്മണ്ണൂര്‍ നല്‍കിയ അപ്പീലിലാണ് ഹൈക്കോടതി നടപടി . കേസ് മൂന്നാഴ്ച കഴിഞ്ഞ് വീണ്ടും പരിഗണിക്കും.
തന്നെ നിരന്തരം ലൈംഗികമായി അധിക്ഷേപിക്കുന്നുവെന്ന് കാട്ടി നടി നല്‍കിയ പരാതിയില്‍ 2025 ജനുവരി എട്ടിന് ബോബി ചെമ്മണ്ണൂരിനെ പൊലീസ് അറസ്റ്റ് ചെയ്തിരുന്നു. തുടര്‍ന്ന് റിമാന്‍ഡിലായി. പിന്നീട് ജാമ്യം ലഭിച്ചെങ്കിലും കോടതിയുടെ കടുത്ത വിമര്‍ശനം ഏറ്റുവാങ്ങേണ്ടിവന്നു. അടുത്തിടെ നടിയോടും കുടുംബത്തോടും മാപ്പ് ചോദിച്ച് ബോബി സോഷ്യല്‍ മീഡിയായില്‍ കുറിപ്പിട്ടിരുന്നു. നടി ഇതിനോട് അനുകൂലമായി പ്രതികരിക്കുകയും ചെയ്തു.
ഇന്ന് കേസ് പരിഗണിച്ചപ്പോള്‍ ബോബി നിരുപാധികം മാപ്പു പറഞ്ഞ സാഹചര്യത്തില്‍ കേസ് തീര്‍പ്പാക്കുന്നതില്‍ തങ്ങള്‍ക്ക് എതിര്‍പ്പില്ലെന്ന് നടിയുടെ അഭിഭാഷകന്‍ അറിയിച്ചു. തുടര്‍ന്നാണ് സെഷന്‍സ് കോടതിയിലുള്ള കേസ് ഹൈക്കോടതി സ്റ്റേ ചെയ്തത്.
