തൃശൂര് :കനത്ത മഴ കാരണം പെരിങ്ങല്ക്കുത്ത് അണക്കെട്ടിലെ ജലനിരപ്പ് നിലവില് വൈകിട്ട് നാല് മണിക്ക് 418.20 മീറ്ററായി ഉയര്ന്നു. വൃഷ്ടിപ്രദേശത്ത് ശക്തമായ മഴ തുടരുന്നതിനാല് ജലനിരപ്പ് ക്രസ്റ്റ് ലെവലില് (419.40 മീറ്റര്) നിയന്ത്രിച്ചു നിര്ത്താന് ഡാമിന്റെ ക്രസ്റ്റ് ഗേറ്റുകള് തുറന്നു. ഡാമിലെ ജലനിരപ്പ് 419.40 മീറ്ററില് എത്തുന്ന മുറയ്ക്ക് അധികജലം ചാലക്കുടി പുഴയിലേക്ക് ഒഴുക്കുന്നതിനാല് ചാലക്കുടി പുഴയുടെ തീരത്തുള്ളവര് ജാഗ്രത പാലിക്കണമെന്ന് ജില്ലാ ഭരണകൂടം അറിയിച്ചു.
അതേസമയം,കേരളത്തില് അടുത്ത അഞ്ച് ദിവസങ്ങളില് ശക്തമായ മഴയ്ക്ക് സാധ്യതയെന്നാണ് കേന്ദ്ര കാലാവസ്ഥ വകുപ്പ് മുന്നറിയിപ്പ് നല്കിയിട്ടുളളത്.ഇതിന്റെ അടിസ്ഥാനത്തില് വിവിധ ജില്ലകളില് കേന്ദ്ര കാലാവസ്ഥ വകുപ്പ് ഓറഞ്ച്, മഞ്ഞ ജാഗ്രത പ്രഖ്യാപിച്ചു. ശനിയാഴ്ച കണ്ണൂര്, കാസര്ഗോഡ് ജില്ലകളില് അതിശക്തമായ മഴയ്ക്കുള്ള സാധ്യത മുന്നിര്ത്തി ഓറഞ്ച് ജാഗ്രതയാണ്. 24 മണിക്കൂറില് 115.6 മില്ലിമീറ്റര് മുതല് 204.4 മില്ലിമീറ്റര് വരെ മഴ ലഭിക്കാവുന്ന ഇടിമിന്നലോട് കൂടിയ അതിശക്തമായ മഴയാണ് പ്രതീക്ഷിക്കുന്നത്.
