അടിസ്ഥാന ശംബളമില്ല; പോസ്റ്റല്‍ ഡിപ്പാര്‍ട്ട്‌മെന്റില്‍ പാര്‍ട്ട് ടൈ ജോലിക്ക് ആളില്ല

കണ്ണൂര്‍: സര്‍ക്കാര്‍ നിശ്ചയിച്ച അടിസ്ഥാന ശംബളം ലഭിക്കാത്തതിനാല്‍ പോസ്റ്റല്‍ ഡിപ്പാര്‍ട്ട്‌മെന്റില്‍ പാര്‍ട്ട് ടൈ സ്വീപ്പര്‍ തസ്തികയില്‍ ജോലിചെയ്യാന്‍ ആളില്ലാത്ത സാഹചര്യം. സര്‍ക്കാര്‍ ഉത്തരവ് പ്രകാരം ഓഫീസുകളില്‍ ജോലി ചെയ്യുന്ന കാഷ്വല്‍ സ്വീപ്പര്‍മാരുടെ പ്രതിമാസ വേതനം 2012 ജനുവരി മുതല്‍ 3500 രൂപയായി വര്‍ദ്ധിപ്പിച്ചിരുന്നു. കാഷ്വല്‍ സ്വീപ്പേഴ്‌സ് ഓര്‍ഗനൈസേഷന്‍ 2013 ല്‍ മുഖ്യമന്ത്രിക്ക് കൊടുത്ത നിവേദനം പരിഗണിച്ച് കാഷ്വല്‍ സ്വീപ്പര്‍മാരുടെ പ്രതിമാസ വേതനം 3500 രൂപയില്‍ നിന്ന് 4000 രൂപയാക്കി ഉയര്‍ത്തിയിരുന്നു. എന്നാല്‍ സര്‍ക്കാര്‍ ഉത്തരവ് അവഗണിച്ച് ന്യായമായ വേതനം ലഭിക്കാത്തതിനാല്‍ കാഷ്വല്‍ സ്വീപ്പര്‍മാര്‍ ജോലി ഉപേക്ഷിക്കേണ്ട അവസ്ഥയിലാണ്. പാര്‍ട്ട് ടൈം സ്വീപ്പര്‍മാര്‍ക്ക് വേതനമായി ഒരു മണിക്കൂറിന് 44 രൂപ നല്‍കണമെന്ന് കേന്ദ്ര സംസ്ഥാന സര്‍ക്കാരുകള്‍ നിലവിലുള്ള വേതന വ്യവസ്ഥ പുനപ്പരിശോധിച്ച് ഉത്തരവിറക്കിയിട്ടുണ്ട്. എന്നാല്‍ കേരളത്തിലെ മറ്റെല്ലാ പോസ്റ്റല്‍ സൂപ്രണ്ടുമാരും 2014 ജനുവരി മുതല്‍ തന്നെ പ്രസ്തുത ഉത്തരവ് നടപ്പിലാക്കിയിട്ടും കണ്ണൂര്‍ ജില്ലാ പോസ്റ്റല്‍ സൂപ്രണ്ട് മാത്രം ഉത്തരവ് നടപ്പാക്കിയിട്ടില്ലെന്ന് ജീവനക്കാര്‍ ആരോപിക്കുന്നു. കുറഞ്ഞ വേതനം കാരണം പോസ്റ്റ് ഓഫീസില്‍ ജോലി ചെയ്യുന്ന പാര്‍ട്ട് ടൈം ജീവനക്കാര്‍ ജോലി ഉപേക്ഷിക്കുകയാണ്. നേരത്തേ മണിക്കൂറിന് 24 രൂപ വേതന വ്യവസ്ഥയില്‍ ജോലി ചെയ്തിരുന്ന കണ്ണൂര്‍ സിറ്റി പോസ്റ്റ് ഓഫീസിലെ പാര്‍ട്ട് ടൈ ജീവനക്കാരന്‍ പുതുക്കിയ വേതനം നല്‍കാത്തതിനാല്‍ ജോലിക്ക് ഹാജരാകുന്നില്ല. ഡിവിഷണല്‍ സൂപ്രണ്ടിനെ വിവരമറിയിച്ചിട്ടും നടപടിയുണ്ടായില്ലെന്ന് പോസ്റ്റ് ഓഫീസ് അധികൃതര്‍ പറയുന്നു. 2015 ജൂലൈ മാസമാണ് കണ്ണൂര്‍ സിറ്റി പോസ്റ്റ് ഓഫീസ് സൗകര്യപ്രഥമായ പുതിയ കെട്ടിടത്തിലേക്ക് മാറിയത്. പുതിയ പോസ്റ്റ് ഓഫീസില്‍ കമ്പ്യൂട്ടറും, വാഷ് ബെയ്‌സിനുമുള്‍െപ്പടെ മുഴുവനായി ശുചീകരിക്കാന്‍ ഒരു മണിക്കൂര്‍ കൊണ്ട് സാധിക്കില്ലെന്ന് സ്വീപ്പര്‍ അറിയിച്ചിരുന്നു. പ്രസ്തുത കാര്യം ബന്ധപ്പെട്ട അധികാരികളെ അറിയിച്ചിരുന്നെങ്കിലും വേതന വര്‍ദ്ധനവിന് ന്യായീകരണമില്ലെന്നാണ് അറിയിച്ചത്. വേതന വര്‍ദ്ധനവില്‍ തീരുമാനമെടുക്കുന്നതിന് മുന്‍പ് പാര്‍ട്ട് ടൈം സ്വീപ്പറുടെ വര്‍ക്ക്‌ലോഡ് സംബന്ധിച്ച് പോസ്റ്റ് ഓഫീസില്‍ നേരിട്ടെത്തി കാര്യങ്ങള്‍ പരിശോധിക്കാന്‍ പോലും അധികൃതര്‍ തയ്യാറായില്ലെന്ന ആരോപണം ശക്തമാണ്. കുറഞ്ഞ വേതനത്തിന് ജോലി ചെയ്യാന്‍ സാധിക്കില്ലെന്ന നിലപാടിലാണ് ഇപ്പോള്‍ പാര്‍ട്ട് ടൈം സ്വീപ്പര്‍. മണിക്കൂറിന് 24 രൂപ വെച്ച് പുറംകരാറിന് നിര്‍ദ്ദേശം വന്നെങ്കിലും അതും നടപ്പിലായില്ല. സിറ്റി പോസ്റ്റ് ഓഫീസില്‍ സ്വീപ്പര്‍ തസ്തികയില്‍ ആളില്ലെന്ന് അധികൃതരുടെ ശ്രദ്ധയില്‍പ്പെട്ടിട്ടും ഇതുവരെയും നടപടിയുണ്ടായിട്ടില്ല. നിലവിലുള്ള ജീവനക്കാര്‍ തന്നെ ഓഫീസ് വൃത്തിയാക്കേണ്ട അവസ്ഥയാണ് ഇപ്പോഴുള്ളത്. പ്രധാനമന്ത്രിയുടെ സ്വച്ഛ് ഭാരത് മിഷന്‍ പരിപാടിയുടെ ഭാഗമായി 2015 ഡിസംബര്‍ മാസം 18 മുതല്‍ 27 വരെ മുഴുവന്‍ പോസ്റ്റ് ഓഫീസുകളും വൃത്തിയാക്കണമെന്ന് നിര്‍ദ്ദേശം നല്‍കിയിരുന്നു. എന്നാല്‍ കണ്ണൂര്‍ ഡിവിഷനിലെ ചില പോസ്റ്റ് ഓഫീസുകളില്‍ ഇത് നടന്നില്ല എന്നതാണ് വസ്തുത.