കണ്ണൂര്: രജിസ്ട്രോഫീസുകളില് യാതൊരു മുന്നറിയിപ്പുമില്ലാതെ ജനുവരി ഒന്ന് മുതല് ഓണ്ലൈന് സംവിധാനം നടപ്പിലാക്കിയതുവഴി ജനങ്ങള് ബുദ്ധിമുട്ടുകയാണെന്നും ആവശ്യമായ അടിസ്ഥാന സൗകര്യങ്ങളും ആധാരം എഴുത്തുകാര്ക്കും ജീവനക്കാര്ക്കും പരിശീലനം നല്കിയതിനും ശേഷം മാത്രം ഓണ്ലൈന് സംവിധാനം നടപ്പിലാക്കണമെന്നും ഓള് കേരള ഡോക്യുമെന്റ് റൈറ്റേഴ്സ് ആന്റ് സ്ക്രൈബ് അസോസിയേഷന് ഭാരവാഹികള് പത്രസമ്മേളനത്തില് അറിയിച്ചു. നിലവില് ജില്ലയിലെ കണ്ണൂര്, കല്ല്യാശ്ശേരി, മാതമംഗലം, പെരിങ്ങോം, ഉളിക്കല് എന്നീ രജിസ്ട്രോഫീസുകളിലാണ് ഓണ്ലൈന്സംവിധാനം നടപ്പിലാക്കിയിരിക്കുന്നത്. എന്നാല് ഇവിടങ്ങളിലൊന്നും ജീവനക്കാര്ക്ക് വേണ്ടത്ര പരിശീലനവും സൗകര്യങ്ങള് ഒരുക്കാത്തതിനാലും കുടിക്കട സര്ട്ടിഫിക്കറ്റും പകര്പ്പുമൊന്നും കിട്ടാത്ത അവസ്ഥയാണുള്ളത്. ആയതിനാല് ഇത്തരം ആവശ്യങ്ങള്ക്കായി വരുന്ന നിരവധി പേര് ഏറെ ബുദ്ധിമുട്ടുകയാണ്. ഓണ്ലൈന് സംവിധാനം നടപ്പിലാക്കുന്നത് നല്ലതാണെങ്കിലും ഇത് ആയിരക്കണക്കിന ആധാരംഎഴുത്തുകാരുടെ ജോലി നഷ്ടപ്പെടുത്തും. ഓണ്ലൈന് സംവിധാനം നടപ്പിലാക്കിയെന്ന പേരിന് വേണ്ടി മാത്രം സര്ക്കാര് ജനോപകാരപ്രദമില്ലാത്ത ഒരു പദ്ധതി നടപ്പിലാക്കുകയാണ്. സര്ട്ടിഫിക്കറ്റും മറ്റ് ആവശ്യങ്ങള്ക്കുമായി ഓണ്ലൈനില് അപേക്ഷ നല്കിയാലും രജിസ്ട്രാര് ഓഫീസില് നേരിട്ട് പൈസ അടക്കുകയും അവിടുന്നുതന്നെ നേരിട്ട് കുടിക്കടവ് സര്ട്ടിഫിക്കറ്റ് കൈപറ്റുകയും വേണം. ഓണ്ലൈന് ആക്കുമ്പോള് അത് എല്ലാതരത്തിലും ജനങ്ങള്ക്ക് ഉപകാരപ്രദമാകുന്ന തരത്തില് പൂര്ണമായ രീതിയില് നടപ്പിലാക്കണമെന്നും ഭാരവാഹികളായ പി.പി.വത്സലന്, എ.പുരുഷോത്തമന്, എ.സജീവന്, സി.മുഹമ്മദ് റഫീഖ്, സി.പി. മുഹമ്മദ് മുര്ഷീദ് എന്നിവര് പത്രസമ്മേളനത്തില് അറിയിച്ചു.
















