ബേ ഓവല്: ടെസ്റ്റിനു പിന്നാലെ ശ്രീലങ്കയ്ക്കെതിരായ ഏകദിന പരമ്പരയും ന്യൂസിലന്ഡിന്. അഞ്ചാം മത്സരം 36 റണ്സിന് ജയിച്ചാണ് കിവികള് 3-1ന് പരമ്പര സ്വന്തമാക്കിയത്. നാലാം മത്സരം മഴ മൂലം ഉപേക്ഷിച്ചപ്പോള്, മൂന്നാമത്തേതില് ലങ്ക ജയിച്ചു. അവസാന മത്സരത്തില് ഓപ്പണര് മാര്ട്ടിന് ഗുപ്ടിലിന്റെ സെഞ്ചുറിയും (102), വലംകൈയന് പേസര് മാറ്റ് ഹെന്റിയുടെ അഞ്ച് വിക്കറ്റ് നേട്ടവുമാണ് ആതിഥേയര്ക്ക് ജയമൊരുക്കിയത്. ഹെന്റി കളിയിലെ താരം. സ്കോര്: ന്യൂസിലന്ഡ് – 294/5 (50), ശ്രീലങ്ക – 258 (47.1).
ബ്രെണ്ടന് മക്കല്ലം കളിക്കാതിരുന്ന മത്സരത്തില് ടോസ് നഷ്ടപ്പെട്ട് ബാറ്റിങ്ങിനിറങ്ങിയ ന്യൂസിലന്ഡിനെ ഗുപ്ടിലും താത്കാലിക നായകന് കെയ്ന് വില്യംസണും (61), റോസ് ടെയ്ലറും (61) ചേര്ന്നാണ് മികച്ച സ്കോറിലെത്തിച്ചത്. അവസാന ഓവറുകളില് വിക്കറ്റ് കീപ്പര് ബാറ്റ്സ്മാന് ലൂക്ക് റോഞ്ചിയും (37 നോട്ടൗട്ട്), മിച്ചല് സാന്റ്നറും (21 നോട്ടൗട്ട്) ആക്രമണമഴിച്ചുവിട്ടപ്പോള് സ്കോര് 294ലെത്തി. ലങ്കയ്ക്കായി നുവാന് കുലശേഖര മൂന്നു വിക്കറ്റെടുത്തു.
മോശം തുടക്കത്തിനു ശേഷം നായകന് ഏയ്ഞ്ചലോ മാത്യൂസും (95), വിക്കറ്റ് കീപ്പര് ബാറ്റ്സ്മാന് ദിനേശ് ചണ്ഡിമലും (50) ഒത്തുചേര്ന്നപ്പോള് ലങ്കയ്ക്ക് പ്രതീക്ഷയുണര്ന്നെങ്കിലും മറ്റാര്ക്കും ഇവരെ പിന്തുണയ്ക്കാനായില്ല. മിലിന്ദ സിരിവര്ധനെ 39 റണ്സെടുത്തു. പത്തോവറില് 40 റണ്സ് വഴങ്ങിയാണ് ഹെന്റി അഞ്ച് ഇരകളെ കണ്ടെത്തിയത്. ട്രെന്റ് ബൗള്ട്ട് മൂന്നും, ആദം മില്നെ, മിച്ചല് സാന്റ്നര് എന്നിവര് ഓരോന്നും വിക്കറ്റെടുത്തു.
