അങ്കാര: കഴിഞ്ഞ ദിവസം ഒഡീഷയിലെ ചന്ദിപൂരിലെ എപിജെ അബ്ദുള്‍ കലാം ദ്വീപില്‍ നിന്നും തൊടുത്ത അഗ്നി 4 എന്ന ആണവ മിസൈലിന് 4000 കിലോമീറ്റര്‍ ആണ് ദൂരപരിധി. ഇത് പാകിസ്ഥാനെ ലക്ഷ്യമാക്കി അയച്ചതാണെന്ന വിലയിരുത്തല്‍ ആയിരുന്നു തുടക്കത്തില്‍ പ്രതിരോധവിദഗ്ധര്‍ ചൂണ്ടിക്കാട്ടിയിരുന്നത്. പക്ഷെ ഇപ്പോള്‍ വിദേശരാജ്യങ്ങളിലെ ചില പ്രതിരോധ-ഭൗമരാഷ്‌ട്രീയ വിദഗ്ധര്‍ പറയുന്നത് ഇന്ത്യ അഗ്നി 4 ലൂടെ മറ്റൊരു രാജ്യത്തെയാണ് ലക്ഷ്യമിട്ടതെന്ന നിഗമനത്തിലാണ് എത്തിയിരിക്കുന്നത്. ആ രാജ്യം ഏതാണെന്നോ? ഇന്ത്യയ്‌ക്ക് പുതിയ ഭീഷണിയായി ഉയരുന്ന തുര്‍ക്കി.
ഡാമിയന്‍ സൈമണ്‍ എന്ന ഭൗമരാഷ്‌ട്രീയ വിദഗ്ധന്‍ പങ്കുവെച്ച അഗ്നി4 മിസൈല്‍ വിക്ഷേപണവുമായി ബന്ധപ്പെട്ട ഭൂപടം:
ഭൗമരാഷ്‌ട്രീയം സംബന്ധിച്ച രഹസ്യവിവരങ്ങള്‍ വിശകലനം ചെയ്യുന്ന പ്രതിരോധ വിദഗ്ധനായ ഡാമിയന്‍ സൈമണ്‍ എക്സില്‍ കഴിഞ്ഞ ദിവസം പങ്കുവെച്ച ഭൂപടമാണ് പുതിയ അഭ്യൂഹങ്ങളിലേക്ക് നയിക്കുന്നത്. ഇന്ത്യയുടെ അഗ്നി 4 മിസൈല്‍ യൂറേഷ്യയിലൂടെ അങ്ങ് തുര്‍ക്കിയുടെ ഏത് ഭാഗത്ത് വേണമെങ്കിലും പതിച്ചേക്കാമെന്നായിരുന്നു ഈ ഭൂപടത്തില്‍ ചൂണ്ടിക്കാട്ടിയിരിക്കുന്നത്. കാരണം ഇന്ത്യയില്‍ നിന്നും 4000 കിലോമീറ്റര്‍ ദൂരം എന്നത് തുര്‍ക്കിയുടെ ഏത് മുക്കുമൂലയിലും വരെ ചെന്നെത്താവുന്ന ദൂരമാണ്. ഈ ഭൂപടത്തില്‍ അടയാളപ്പെടുത്തിയത് അനുസരിച്ച് അഗ്നി 4ന് ചൈന, തുര്‍ക്കി, റഷ്യ, ഉക്രൈന്‍ എന്നിവിടങ്ങളില്‍ വരെ പൂര്‍ണ്ണമായും എത്തിച്ചേരാന്‍ കഴിയും. കൃത്യമായി പറഞ്ഞാല്‍ ഇന്ത്യയില്‍ നിന്നും 3760 കിലോമീറ്റര്‍ ദൂരത്തിലുള്ളതാണ് ചൈന ( ഒരു ഭാഗം മാത്രം), തുര്‍ക്കി, റഷ്യ, ഉക്രൈന്‍ എന്നീ രാജ്യങ്ങളെന്ന് ഡാമിയന്‍ സൈമണ്‍ ഈ ഭൂപടത്തില്‍ അടയാളപ്പെടുത്തിയിട്ടുണ്ട്. ഇതോടെയാണ് ഇന്ത്യ ഇപ്പോള്‍ അതീവ സുരക്ഷയോടെ അഗ്നി 4 വിക്ഷേപിച്ചത് പാകിസ്ഥാനെ ലാക്കാക്കിയായിരുന്നില്ല, പകരം തുര്‍ക്കിയെ ലാക്കാക്കായായിരുന്നു എന്ന വിവരം പുറത്തുവരുന്നത്.
അഗ്നി 6, അതല്ലെങ്കില്‍ അഗ്നി5ന്റെ ബങ്കര്‍ ബസ്റ്റര്‍ മിസൈല്‍ എന്ന് കരുതിയവര്‍ക്ക് തെറ്റി
അഗ്നി4 വിക്ഷേപണം നടക്കുന്ന ആഗസ്ത് 6,7 തീയതികളില്‍ ബംഗാള്‍ ഉള്‍ക്കടലിന് മുകളിലെ വ്യോമപാതയിലും സമുദ്രാന്തര്‍ഭാഗത്തുമായി ഏകദേശം 2530 കീലോമീറ്റര്‍ ദൂരത്തില്‍ നോട്ടാം പ്രഖ്യാപിച്ചിരുന്നു. ഇത് പ്രകാരം ഇത്രയും വലിയ വിസ്തൃതിയില്‍ വിമാനങ്ങളോ കപ്പലുകളോ വരാന്‍ പാടില്ലെന്ന വിലക്കുണ്ടായിരുന്നു. ഇതോടെയാണ് ഒരു പക്ഷെ ഇന്ത്യയുടെ ആവനാഴിയിലെ ഏറ്റവും ശക്തമായ അഗ്നി 6 ഓ അതല്ലെങ്കില്‍ അഗ്നി 5 ന്റെ ബങ്കറുകള്‍ തകര്‍ക്കുന്ന വിഭാഗത്തില്‍പ്പെട്ട മിസൈലോ ആയിരിക്കാം വിക്ഷേപിക്കുന്നത് എന്ന അഭ്യൂഹങ്ങള്‍ ഉയര്‍ന്നത്. പക്ഷെ എല്ലാ അഭ്യൂഹങ്ങളെയും കാറ്റില്‍ പറത്തി ഡിആര്‍ഡിഒ പരീക്ഷിച്ചത് അഗ്നി 4 എന്ന ആണവ മിസൈല്‍ ആണ്. മുന്‍പും പരീക്ഷിച്ചിട്ടുള്ള ഈ മിസൈല്‍ വീണ്ടും പരീക്ഷിക്കുന്നതിന്റെ പ്രസക്തിയെക്കുറിച്ച് പലരും പല ഊഹങ്ങളാണ് നടത്തിയത്. അതിനിടെയാണ് ഇത് സംബന്ധിച്ച് കൂടുതല്‍ വ്യക്തത നല‍്കുന്ന ഭൂപടം ഡാമിന്‍ സൈമന്‍ എന്ന പ്രതിരോധ-ഭൗമരാഷ്‌ട്ര വിദഗ്ധന്‍ എക്സില്‍ പങ്കുവെച്ചത്.
തുര്‍ക്കിയും ഇന്ത്യയും തമ്മിലുള്ള വിദ്വേഷം വര്‍ധിക്കുമ്പോള്‍
തുര്‍ക്കി തുടര്‍ച്ചയായി ഇന്ത്യയ്‌ക്കെതിരെ ഭീഷണിയാകുന്ന സാഹചര്യം ഉണ്ട്. ഈയിടെ പാകിസ്ഥാനും സൗദി അറേബ്യയുമായി ചേര്‍ന്ന് ത്രിരാഷ്‌ട്ര സുന്നി നേറ്റോ രൂപീകരിച്ചിരുന്നു. നേരത്തെ ഓപ്പറേഷന്‍ സിന്ദൂര്‍ കാലത്ത് പാകിസ്ഥാന് തുര്‍ക്കി ആയുധങ്ങള്‍ വിതരണം ചെയ്തിരുന്നു. അസര്‍ബൈജാനും ആര്‍മീനിയയും തമ്മിലുള്ള യുദ്ധത്തില്‍ തുര്‍ക്കി അസര്‍ബൈജാനെ പിന്തുണയ്‌ക്കുമ്പോള്‍ ഇന്ത്യ ആര്‍മീനിയയുടെ പക്ഷത്താണ്. ഇന്ത്യ ആര്‍മീനിയയ്‌ക്ക് നല്‍കിയ പിനാക റോക്കറ്റ് ഉള്‍പ്പെെയുള്ള ആയുധങ്ങള്‍ അസര്‍ബൈജാനില്‍ നാശം വിതയ്‌ക്കുന്ന സാഹചര്യം തുര്‍ക്കിയെ രോഷം കൊള്ളിച്ചിട്ടുണ്ട്. ഇങ്ങിനെ തുര്‍ക്കിയും ഇന്ത്യയും തമ്മിലുള്ള വിടവ് കൂടി വരുന്നതിനിടയിലാണ് ഇന്ത്യയുടെ അഗ്നി 4 മിസൈല്‍ വിക്ഷേപണം നടന്നത്.
8000 മുതല്‍ 12000 കിലോമീറ്റര്‍ വരെ ദൂരപരിധിയുള്ള അഗ്നി 6 മിസൈലിന്റെ പരീക്ഷണം നടത്തുമെന്ന് നിനച്ചിരിക്കെയാണ് ഇന്ത്യ 4000 കിലോമീറ്റര്‍ ദൂരപരിധിയുള്ള അഗ്നി 4 മിസൈല്‍ വിക്ഷേപിച്ചത്. ഇപ്പോള്‍ എന്തിനാണ് ഈ 4000 കിലോമീറ്റര്‍ മാത്രം ദൂരപരിധിയുള്ള അഗ്നി 4 വിക്ഷേപിച്ചത് എന്നതിന് ഉത്തരമായി. അത് തുര്‍ക്കിയ്‌ക്കുള്ള താക്കീതാണ്.
