മെല്ബണ്: മാധ്യമപ്രവര്ത്തകയോടു അപമര്യാദയായി പെരുമാറിയ സംഭവത്തില് വെസ്റ്റ് ഇന്ഡീസ് ക്രിക്കറ്റ് താരം ക്രിസ് ഗെയ്ല് മാപ്പ് പറഞ്ഞു. സംഭവത്തിന്റെ പേരില് ഗെയ്ലിനെതിരെ അധികൃതര് 10,000 ഡോളര് പിഴ ചുമത്തി.
ടെലിവിഷന് അഭിമുഖത്തിനിടെ തന്റെ ഒപ്പം മദ്യപിക്കാന് അശ്ലീല ചുവയോടെ മാധ്യമ പ്രവര്ത്തകയെ ക്ഷണിക്കുകയായിരുന്നു. നിങ്ങളുടെ കണ്ണുകള് ആദ്യമായി കാണുമ്പോള് അതിമനോഹരമാണെന്ന് പറഞ്ഞ ഗെയ്ല് ഒപ്പം മദ്യപിക്കാന് മാധ്യമപ്രവര്ത്തകയെ ക്ഷണിക്കുകയും ചെയ്തു.
എന്നാല് താന് പറഞ്ഞ നിര്ദോഷമായ തമാശയെ തെറ്റായി വ്യാഖ്യാനിക്കുകയായിരുന്നുവെന്നും ഗെയ്ല് പ്രതികരിച്ചു. ചാനല് റിപ്പോര്ട്ടറെ അപമാനിക്കാന് ശ്രമിച്ചിട്ടില്ലെന്നും ക്രിസ് ഗെയ്ല് പറഞ്ഞു. ഓസ്ട്രേലിയയിലെ ആഭ്യന്തര ട്വന്ടി20 ടൂര്ണമെന്റായ ബിഗ് ബാഷ് ലീഗിലെ മത്സരത്തിനിടെ ഗെയ്ല് നടത്തിയ പരാമര്ശമാണ് വിവാദമായത്. മെല്ബണ് റെനഗഡ്സിന് വേണ്ടിയാണ് ഗെയ്ല് കളിക്കുന്നത്.
ഗെയ്ലിന്റെ പരാമര്ശങ്ങള്ക്കെതിരെ സമൂഹമാധ്യമങ്ങളിലടക്കം വ്യാപക പ്രതിഷേധമാണ് ഉയര്ന്നത്.
