അമ്പലപ്പുഴ: കരുമാടിയില് സിപിഎം ഗുണ്ടാസംഘത്തിന്റെ അക്രമത്തില് നാലോളം ആര്എസ്എസ് പ്രവര്ത്തകര്ക്ക് വെട്ടേറ്റു. കരുമാടി കലിക്കോട് വീട്ടില് പ്രദീപ് (25), വിഷ്ണു (24), അശോകന് (31) കരിങ്ങംമഠം വീട്ടില് ജയപ്രകാശ് എന്നിവര്ക്കാണ് പരിക്കേറ്റത്.
ഇവരെ വണ്ടാനം മെഡിക്കല് കോളേജ് ആശുപത്രിയില് പ്രവേശിപ്പിച്ചു. ഇന്നലെ രാത്രി പന്ത്രണ്ടുമണിയോടെയാണ് പ്രദേശത്ത് സംഘടിച്ച സിപിഎം സംഘം ആര്എസ്എസ് പ്രവര്ത്തകരെ കൂട്ടമായി ആക്രമിച്ചത്. കരുമാടി കാമപുരത്ത്കാവ് ക്ഷേത്രത്തിലെ ആഴികണ്ടു മടഹ്ങിയ ആര്എസ്എസ് ശാഖാ കാര്യവാഹ് കലിക്കോട് വീട്ടില് പ്രദീപിനെ സിപിഎം ഗുണ്ടാസംഘാംഗങ്ങളായ ജന്സണ്, ഷിബു, ഷമീര്, പ്രശാന്ത് തുടങ്ങിയ പത്തംഗസംഘം ക്രൂരമായി മര്ദ്ദിക്കുകയായിരുന്നു.
സംഭവത്തെത്തുടര്ന്ന് അവശനായ പ്രദീപിനെ ആശുപത്രിയിലെത്തിക്കാനെത്തിയ മറ്റു പ്രവര്ത്തകരെ സമീപത്ത് മറഞ്ഞിരുന്ന സംഘം വടിവാള്, ഇരുമ്പ് പൈപ്പ് എന്നിവ ഉപയോഗിച്ച് അക്രമിക്കുകയായിരുന്നു. ഈ അക്രമത്തിലാണ് വിഷ്ണു, അശോകന് എന്നിവര്ക്ക് പരിക്കേറ്റത്.
പിന്നീട് മണ്ഡല് കാര്യവാഹ് അരുണിന്റെ സ്കൂട്ടര് തല്ലിത്തകര്ത്തശേഷം സമീപത്തെ വീടുകള്ക്കു നേരെ കല്ലെറിയുകയും ചെയ്തു. സംഭവത്തെതുടര്ന്ന് പരിക്കേറ്റ പ്രവര്ത്തകരെ ആശുപത്രിയിലാക്കിയശേഷം സ്റ്റേഷനില് പരാതി നല്കിയെങ്കിലും ഇന്നലെ ഉച്ചയോടെയും സംഘം കൊലവിളി നടത്തി. കരുമാടി ഭാഗത്തുകൂടി സഞ്ചരിച്ച ബിജെപി പ്രവര്ത്തകനായ കരിങ്ങംമഠം വീട്ടില് ജയപ്രകാശിനെയും സിപിഎം സംഘം ആക്രമിച്ചു.
പ്രദീപ്, അശോകന് എന്നിവരുടെ കൈകള്ക്ക് അക്രമത്തില് ഒടിവുസംഭവിച്ചിട്ടുണ്ട്. കഴിഞ്ഞ പഞ്ചായത്തു തെരഞ്ഞെടുപ്പില് വാര്ഡുകളില് സിപിഎമ്മിന് സംഭവിച്ച പരാജയമാണ് അക്രമം ആര്എസ്എസ് പ്രവര്ത്തകര്ക്കുനേരെ തിരിയാന് കാരണമായത്. അക്രമികളെ ഉടനെ അറസ്റ്റു ചെയ്യണമെന്നും അല്ലാത്തപക്ഷം ശക്തമായി പ്രതിഷേധിക്കുമെന്നും ബിജെപി നിയോജകമണ്ഡലം പ്രസിഡന്റ് എല്.പി. ജയചന്ദ്രന് ആവശ്യപ്പെട്ടു.
അക്രമം നടത്തി സമൂഹത്തില് അരക്ഷിതാവസ്ഥ ഉണ്ടാക്കാനുള്ള നീക്കത്തില് നിന്നും സിപിഎം പിന്മാറണമെന്നും അക്രമം നടത്തി വോട്ടുപിടിച്ചെടുക്കാന് നടത്തിയ നീക്കങ്ങളെല്ലാം പരാജയപ്പെട്ട ചരിത്രമാണ് സിപിഎമ്മിനുള്ളതെന്ന് ഓര്ക്കണമെന്നും ജയചന്ദ്രന് പ റഞ്ഞു.
അക്രമത്തില് പ്രതിഷേധിച്ച് ഇന്നലെ വൈകിട്ട് ആര്എസ്എസ് പ്രവര്ത്തകര് പ്രകടനം നടത്തി. തകഴി ആശുപത്രി ജങ്ഷനില് നിന്നും ആരംഭിച്ച പ്രകടനം എല്ലോറ വഴി കരുമാടി ജങ്ഷനില് സമാപിച്ചു.
ബിജെപി ജില്ലാ ജനറല് സെക്രട്ടറി കൊട്ടാരം ഉണ്ണികൃഷ്ണന് ഉദ്ഘാടനം ചെയ്തു. ആര്എസ്എസ് താലൂക്ക് സഹകാര്യവാഹ് സുമേഷ് സ്വാഗതം പറഞ്ഞു. താലൂക്ക് കാര്യവാഹ് വി. ഉണ്ണികൃഷ്ണന്, രതീഷ്, ധര്മ്മപാല്, ഷിജോ, ബിജെപി നിയോജകമണ്ഡലം പ്രസിഡന്റ് എല്.പി. ജയചന്ദ്രന്, വൈസ് പ്രസിഡന്ര് അനില് തുടങ്ങിയവര് നേതൃത്വം നല്കി.
പ്രതികരിക്കാൻ ഇവിടെ എഴുതുക: