അങ്കാര: തുര്ക്കി തലസ്ഥാനമായ അങ്കാരയില് പുതുവര്ഷ ആഘോഷത്തിനിടയില് ചാവേര് ബോംബാക്രമണം നടത്താന് പദ്ധതിയിട്ട രണ്ട് ഐഎസ് ഭീകരരെ പൊലീസ് അറസ്റ്റ് ചെയ്തു. അമ്പത് ലക്ഷത്തോളം ആളുകള് താമസിക്കുന്ന തലസ്ഥാന നഗരത്തിന്റെ അതിര്ത്തി പ്രദേശമായ മാമാക്കില് നിന്നാണ് ഭീകരന്മാരെ തീവ്രവാദ വിരുദ്ധ പൊലീസ് പിടികൂടിയത്.
അങ്കാരയിലെ കിസിലെ സ്ക്വയറില് രണ്ടു സ്ഥലങ്ങളിലായി ആക്രമണം നടത്താനായിരുന്നു ഇരുവരുടെയും പദ്ധതി. കിസിലയ്ക്ക് പുറത്തുള്ള ഷോപ്പിംഗ് മാളിലും മദ്യശാലകള് നിറഞ്ഞ തെരുവുകളിലും അക്രമണം നടത്താനായിരുന്നു ഇവരുടെ തീരുമാനമെന്നാണ് അങ്കാര ഗവര്ണര് ഓഫീസില് നിന്നുള്ള വിവരം. അറസ്റ്റിലായവരുടെ കൂടുതല് വിവരങ്ങള് പുറത്തുവിട്ടിട്ടില്ല. പുതുവര്ഷത്തോടനുബന്ധിച്ച് സുരക്ഷയുടെ ഭാഗമായി തുര്ക്കിയിലെ ഏറ്റവും വലിയ നഗരമായ ഇസ്താംബൂളില് 15000 പൊലീസിനെ വിന്യസിച്ചിട്ടുണ്ട്.
ഒക്ടോബറില് അങ്കാരയില് സമാധാന പ്രവര്ത്തനങ്ങള്ക്കായി സംഘടിച്ച ആള്ക്കൂട്ടത്തില് ചാവേറുകള് നടത്തിയ ബോംബാക്രമണത്തെ തുടര്ന്ന് അതീവ ജാഗ്രതയിലാണ് തുര്ക്കി. ആക്രമണത്തില് 103 പേര് കൊല്ലപ്പെട്ടിരുന്നു. 130 പേരുടെ മരണത്തിനിടയാക്കിയ പാരീസ് ആക്രമണത്തിന് ശേഷം എല്ലാ യൂറോപ്യന് തലസ്ഥാനങ്ങളും കനത്ത സുരക്ഷയിലാണ്.
