ഇസ്ലാമബാദ്: ഭാരതത്തിനെതിരെ പ്രസംഗിക്കുകയോ പ്രസ്താവനയിറക്കുകയോ ചെയ്യരുതെന്ന് മന്ത്രിമാര്ക്ക് പാക് പ്രധാനമന്ത്രി നവാസ് ഷെരീഫിന്റെ കര്ശന നിര്ദ്ദേശം. ഇത്തരം നടപടികള് സമാധാന ചര്ച്ചകത്തെ ബാധിക്കും. ഷെരീഫ് വ്യക്തമാക്കി.
ചര്ച്ചകളെ പ്രോല്സാഹിപ്പിക്കുന്ന തരത്തിലുള്ള പ്രസ്താവനകേള പാടുള്ളൂ. പഴയ കാര്യങ്ങള് വലിച്ചുപുറത്തിടുന്ന തരത്തിലുള്ള നടപടികളൊന്നും വേണ്ട.ഷെരീഫ് വ്യക്തമാക്കി. ചര്ച്ചകള് വഴി ഭാരത-പാക് ബന്ധത്തില് വലിയ മാറ്റം വരണമെന്നാണ് ഷെരീഫിന്റെ ആഗ്രഹമെന്നും നേഷന് പത്രം റിപ്പോര്ട്ട് ചെയ്യുന്നു.
ജനുവരിയില് സ്വിറ്റ്സര്ലന്ഡിലെ ദാവൂസില് നടക്കുന്ന ലോക സാമ്പത്തിക ഫോറത്തിന്റെ വാര്ഷിക യോഗത്തില് നവാസ് ഷെരീഫും ഭാരത പ്രധാനമന്ത്രി നരേന്ദ്രമോദിയും കൂടിക്കാഴ്ച നടത്തുമെന്ന റിപ്പോര്ട്ടുകള്ക്കിടെയാണ് ഷെരീഫ് വിവാദ പ്രസ്താവനകളില് നിന്നും മന്ത്രിമാരെ വിലക്കിയത്. ഭാരതവുമായുള്ള ബന്ധം സാധാരണ നിലയിലാക്കാനും സമാധാനം പുനസ്ഥാപിയ്ക്കാന് സാധിയ്ക്കുമെന്നും ഇത് ഉപഭൂഖണ്ഡത്തിനാകെ ഗുണം ചെയ്യുമെന്നുമാണ് പ്രധാനമന്ത്രി ഷെരീഫ് ഉറച്ചു വിശ്വസിയ്ക്കുന്നതെന്ന് റിപ്പോര്ട്ടില് പറയുന്നു.
കശ്മീര് വിഷയത്തിനൊപ്പം വ്യാപാര ബന്ധത്തിനും തീവ്രവാദ വിഷയങ്ങള്ക്കും ചര്ച്ചകളില് മുന്ഗണന നല്കണമെന്നാണ് ഷെരീഫിന്റെ നിലപാട്. അതേ സമയം സുപ്രധാന നിലപാടുകളില് യാതൊരു വിട്ടുവീഴ്ചയ്ക്കുമില്ലെന്നാണ് സൈന്യത്തിന്റേയും സര്ക്കാരിന്റേയും നിലപാട്.
നേരത്തെ പാരീസില് കാലാവസ്ഥ ഉച്ചകോടിയ്ക്കിടെ നവാസ് ഷെരീഫും പ്രധാനമന്ത്രി നരേന്ദ്ര മോദിയും തമ്മിലും തുടര്ന്ന് ബാങ്കോക്കില് ഇരു രാജ്യങ്ങളുടേയും ദേശീയ സുരക്ഷ ഉപദേഷ്ടാക്കളും ചര്ച്ച നടത്തുകയും ചെയ്തിരുന്നു. ഇതിന് ശേഷം വിദേശകാര്യ മന്ത്രി സുഷമ സ്വരാജ് പാകിസ്ഥാനിലെത്തി നവാസ് ഷെരീഫുമായും വിദേശകാര്യ ഉപദേഷ്ടാവ് സര്താജ് അസീസുമായും ചര്ച്ച നടത്തിയിരുന്നു.
ഉഭയകക്ഷി ബന്ധം ശക്തിപ്പെടുത്താന് ചര്ച്ചകള് സഹായിച്ചിട്ടുണ്ടെന്നാണ് വിലയിരുത്തല്. ഇരു രാജ്യങ്ങളും തമ്മിലുള്ള ബന്ധം മെച്ചപ്പെട്ടിട്ടുണ്ടെന്ന് പാകിസ്ഥാനിലെ ഭാരത ഹൈക്കമ്മീഷണര് ടി.സി.എ രാഘവന് പറഞ്ഞു.
