ആനപ്പേടിയില്‍ ഒരു കുടുംബം

മറയൂര്‍: മറയൂര്‍ സ്വദേശിനി ഭഗവതി(65) ഉറങ്ങിയിട്ട് നാളുകളായി…. കണ്ണടയ്‌ക്കുമ്പോള്‍ മുന്നില്‍ ആനയുടെ രൂപമാണ്. ഇത് മൂന്നാംതവണയാണ് മറയൂര്‍ ഇന്ദിരനഗറിലെ ഭഗവതിയുടെ കൃഷിത്തോട്ടത്തില്‍ ഒറ്റക്കൊമ്പന്‍ എത്തുന്നത്. ചൊവ്വാഴ്‌ച്ച രാത്രിയില്‍ ഇവിടെ എത്തിയ ആന പറമ്പിലെ തെങ്ങുകള്‍ നശിപ്പിച്ചിരുന്നു. ബുധനാഴ്‌ച്ച രാതിയില്‍ 9 മണിയോടെ ആന പറമ്പിലെത്തിയിരുന്നു. പിന്നീട് മടങ്ങിയെങ്കിലും രാത്രി 12 മണിയോടെ വീണ്ടും സ്ഥലത്തെത്തുകയായിരുന്നു. പറമ്പിലെ വാഴ, തെങ്ങ്, കപ്പ തുടങ്ങിയവയെല്ലാം ആന നശിപ്പിച്ചു. സമീപത്തെ കുടിവെള്ള സംഭരണിയും പൈപ്പും തകര്‍ത്ത നിലയിലാണ്. വനംവകുപ്പ്കാരെ വിവ രമറിയിച്ചെങ്കിലും ഇന്നലെ ഉച്ചക്ക് 2.30 ഓടെയാണ് ഇവര്‍ സ്ഥലത്തെത്തുന്നത്. നഷ്ടത്തിന്റെ കണക്കെടുക്കാതെ ആനയെ ഉപദ്രവിച്ചോ എന്നാണ് ഇവര്‍ ആദ്യം തിരക്കുന്നത്. ട്രൈബല്‍ പ്രമോര്‍ട്ടറെ വിവരമറിയിച്ചെങ്കിലും ഇങ്ങോട്ട് എത്തുവാന്‍പോലും ഇദ്ദേഹം തയ്യാറായിട്ടില്ല. കഴിഞ്ഞ ആഴ്‌ച്ചയിലും ആനയുടെ ആക്രമണം ഇവിടെ ഉണ്ടായിരുന്നു. ബന്ധപ്പെട്ട അധികൃതര്‍ തികഞ്ഞ അലംഭാവമാണ് ഇക്കാര്യത്തില്‍ കാട്ടുന്നതെന്ന് നാട്ടുകാര്‍ ആരോപിക്കുന്നു. ഓരോ രാത്രിയും ഭയാശങ്കയോടെയാണ് നാട്ടുകാര്‍ ഇവിടെ കഴിഞ്ഞ് കൂടുന്നത്.