കൊച്ചി: നീതിയുടെ നിറകുടമായിരുന്ന സ്വാമി വിട പറഞ്ഞിട്ട് ഒരുവര്ഷം തികഞ്ഞ ഇന്നലെ അദ്ദേഹത്തിന്റെ ഓര്മകള് പങ്കുവക്കുവാന് സാനുമാസ്റ്ററും ഡോ.സി.കെ. രാമചന്ദ്രനും സദ്ഗമയില് ഒത്തുചേര്ന്നു. ജസ്റ്റിസ് വി.ആര്. കൃഷ്ണയ്യരുടെ ഏറ്റവും അടുത്ത സുഹൃത്തുക്കളാണ് സാനുമാസ്റ്ററും ഡോ.സി.കെ. രാമചന്ദ്രനും. എല്ലാ സായാഹ്നങ്ങളിലും ഇവര് മൂന്നുപേരും എറണാകുളം സുഭാഷ് പാര്ക്കില് സംഗമിക്കുമായിരുന്നു. സൂര്യന് അറബിക്കടലില് മായുന്നതും നോക്കി മൂവരും ഏറെനേരം ഇവിടെ ചെലവഴിച്ചിരുന്നു. ഗൗരവമേറിയ ചര്ച്ചയും തമാശയും കഴിഞ്ഞാണ് മൂവരും പിരിഞ്ഞിരുന്നത്. കൃഷ്ണയ്യര്ക്ക് തീരെ വയ്യാതെ ആയപ്പോള് ഈ കൂടിച്ചേരല് സദ്ഗമയിലായി. 2014 ഡിസംബര് 4ന് വൈകിട്ട് 3.30 നാണ് സ്വാമി എന്നറിയപ്പെട്ടിരുന്ന ജസ്റ്റിസ് കൃഷ്ണയ്യര് ഈ ലോകത്തില്നിന്നും വിടവാങ്ങിയത്. ഒരുവര്ഷം തികഞ്ഞ ഇന്നലെ ഉച്ചകഴിഞ്ഞ് 3.30 നാണ് അദ്ദേഹത്തിന്റെ ആത്മസുഹൃത്തുക്കള് സദ്ഗമയില് ഒത്തുചേര്ന്നത്. കാളിദാസ സാംസ്കാരിക കേന്ദ്രമാണ് ഈ ഒത്തുചേരലിന് വേദിയൊരുക്കിയത്. കൃഷ്ണയ്യര് ദീര്ഘനാള് ഉപയോഗിച്ച കട്ടിലിനോട് ചേര്ത്ത് വച്ചിരുന്ന ചിത്രത്തിന് മുന്നില് സാനുമാസ്റ്ററും സി.കെ.രാമചന്ദ്രനും ചേര്ന്ന് ദീപം തെളിയിച്ചു. ഒരു കൊല്ലം സ്വാമിയില്ലാതെ ജീവിച്ചപ്പോഴാണ് അദ്ദേഹത്തിന്റെ സാന്നിദ്ധ്യം ഇല്ലാത്തതിന്റെ വിഷമം മനസ്സിലായതെന്ന് സാനുമാസ്റ്റര് പറഞ്ഞു. ഏത് വിഷയത്തിലും രചനാത്മകമായി പ്രതികരിക്കുന്ന വ്യക്തിത്വമാണ് നമുക്ക് സ്വാമിയുടെ വേര്പാടോടെ ഇല്ലാതിയിരിക്കുന്നത്. സ്വാമിയുടെ സാന്നിദ്ധ്യം ഒരു ഊര്ജമായിരുന്നുവെന്ന് ഡോ.സി.കെ. രാമചന്ദ്രന് അനുസ്മരിച്ചു.
പിന്നീട് ഭിത്തിയില് തൂക്കിയിട്ടിരുന്ന കൃഷ്ണയ്യരും സാനുമാസ്റ്ററും സി.കെ.രാമചന്ദ്രനും ഒരുമിച്ച് ഇരിക്കുന്ന ചിത്രം എടുത്ത് കൈയില് പിടിച്ചുകൊണ്ട് ഇരുവരും ഏറെനേരം നിശബ്ദരായി ഇരുന്നു. ഡോ.കെ.ആര്. വിശ്വംഭരന്, ഡോ.ഇന്ദിരരാജന്, പി. രാമചന്ദ്രന്, സി.ജി.രാജഗോപാല്, ചന്ദ്രിക തുടങ്ങിയവരും സദ്ഗമയില് എത്തിയിരുന്നു.
