മയ്യഴി: മാഹി എംഎല്എ ഇ.വത്സരാജിന്റെ ചിത്രപ്രദര്ശനം ഇമേജസ് ഓഫ് എറ്റേണിറ്റി പ്രശസ്ത ചിത്രകാരന് മധുദേശായി സിവില് സ്റ്റേഷന് ഓഡിറ്റോറിയത്തില് ഉദ്ഘാടനം ചെയ്തു. ഒരു ഭരണാധികാരിയും രാഷ്ട്രീയ നേതാവും കലയുടെ പാതയിലൂടെ സഞ്ചരിക്കുന്നത് അഹ്ലാദകരമാണെന്നും മനോവ്യാപാരങ്ങളെ അയത്ന ലളിതമായി സൂക്ഷിക്കാന് കലയുടെ ഇടപെടലിന് സാധിക്കുമെന്നും അദ്ദേഹം പ്രസ്താവിച്ചു. ജലഛായത്തിലെ വത്സരാജിന്റെ കൈയടക്കം ചിത്രങ്ങളിലൂടെ വ്യക്തമാണ്. ചടങ്ങില് എം.മുകുന്ദന്, മുഖ്യപ്രഭാഷണം നടത്തി. സാങ്കേതിക മികവിനെ മാനവികതയുടെ ഭാഷയിലേക്ക് പരിവര്ത്തിപ്പിക്കാന് കലയുടെ അഭ്യസനവും അസ്വാദനവും അത്യാവശ്യമാണെന്ന് മുകുന്ദന് ചൂണ്ടിക്കാട്ടി. മെഡിക്കല് എന്ജിനിയറിംഗ് പ്രൊഫഷണല് വിദ്യാഭ്യാസ മേഖലയിലടക്കം ചിത്രകലയും നാടകങ്ങളും മറ്റും പാഠ്യവിഷയങ്ങള് ആകണമെന്ന് അദ്ദേഹം പറഞ്ഞു. സാങ്കേതിക വിദ്യയുടെ മാനവികമായ ഉപയോഗത്തിന് അത് വഴിതെളിക്കും.
ഇ.വത്സരാജിലെ ചിത്രപ്രതിഭയെക്കുറിച്ച് ചിത്രപരിചയം നടത്തിയ കെ.കെ.മാരാര് വിശദമാക്കി. തലശ്ശേരി സ്കൂള് ഓഫ് ആര്ട്സില് വത്സരാജിന്റെ സഹപാഠിയായിരുന്ന കെ.എം.ശിവകൃഷ്ണന് ചിത്രവിദ്യാര്ത്ഥിയായിരുന്ന വത്സരാജുമൊത്തുള്ള ദിനങ്ങള് അനുസ്മരിച്ചു. നിരവധി ചിത്രകാരന്മാരാണ് ചടങ്ങില് സബന്ധിച്ചത്. ചിത്രകാരന്മാരെ സെല്വന് മേലൂര് പരിചയപ്പെടുത്തി.
ധന്വാദ് ആര്ട്സ് സ്കൂള് പ്രിന്സിപ്പാള് ഗായത്രി ദേശായി പ്രത്യേക പ്രഭാഷണം നടത്തി. എബി എന് ജോസ് വരച്ച ഗാന്ധി ചിത്രങ്ങള് ഇ.വത്സരാജിനും മധുദേശായിക്കും ഉപഹാരമായി സമര്പ്പിച്ചു. കേരള ഫോക്ലോര് അക്കാദമി വൈസ് ചെയര്മാന് സുരേഷ് കൂത്തുപറമ്പ്, പൊന്ന്യന് ചന്ദ്രന്, സംവിധായകന് പ്രദീപ് ചൊക്ലി എന്നിവര് ആശംസ അര്പ്പിച്ചു. ഇ.വത്സരാജ് എംഎല്എ പ്രദിവാദനം നടത്തി. ചടങ്ങില് റീജിയണല് അഡ്മിനിസ്ട്രേറ്റര് അധ്യക്ഷത വഹിച്ചു. സെല്വന് മേലൂര് സ്വാഗതവും പി.പി.വിനോദന് നന്ദിയും പറ്ഞു. കലാസ്വാദകരായ വന് ജനാവലിയാണ് വത്സരാജിന്റെ ചിത്രപ്രദര്ശനം കാണാനായി മാഹി സിവില് സ്റ്റേഷന് ഓഡിറ്റോറിയത്തില് എത്തുന്നത്. പ്രദര്ശനം ഡിസംബര് 1ന് സമീപിക്കും.
