കൊച്ചി: കാര്ഷിക, വിദ്യാഭ്യാസ, ആരോഗ്യ മേഖലകള്ക്ക് ഊന്നല് നല്കുന്ന പദ്ധതികള് നടപ്പാക്കുമെന്ന് ജില്ലാ പഞ്ചായത്ത് പ്രസിഡന്റ് ആശ സനില്. പ്രസ് ക്ലബ്ബില് നടന്ന മുഖാമുഖം പരിപാടിയില് സംസാരിക്കുകയായിരുന്നു അവര്. ജില്ലയെ തരിശു രഹിത ജില്ലയായി മാറ്റും. ജില്ലാ പഞ്ചായത്തിന്റെ കീഴിലുള്ള ആലുവ, നേര്യമംഗലം തുടങ്ങിയ ഫാമുകളില് ജൈവ പച്ചക്കറി കൃഷിയും ഔഷധ സസ്യ തോട്ടവും നടപ്പാക്കും. വീടുകളിലും ജൈവ പച്ചക്കറിയും ഔഷധതോട്ടവും പ്രോത്സാഹിപ്പിക്കും. ഉല്പ്പാദിപ്പിക്കുന്ന വിളകള്ക്ക് നല്ല വില ലഭിക്കാന് കുടുംബശ്രീയുടെ നേതൃത്വത്തില് വിപണനകേന്ദ്രങ്ങള് തുറക്കും. ആദിവാസി ഊരില് നിന്നുള്ള ഉല്പ്പന്നങ്ങളും ഇവിടെ വിപണനം ചെയ്യും. പടിപടിയായി ജില്ലയെ പച്ചക്കറിയുടെ കാര്യത്തില് സ്വയം പര്യാപ്തമാക്കുമെന്നും ആശ സനില് പറഞ്ഞു. ഉറവിട മാലിന്യം പോത്സാഹിപ്പിക്കും. പ്ലാസ്റ്റിക് മാലിന്യം സംസ്കരിക്കാന് ബ്ലോക്കു തലത്തില് സംവിധാനങ്ങള് ഉണ്ടാക്കും. ഇ- മാലിന്യ സംസ്കരണത്തിനും പദ്ധതികള് തയ്യാറാക്കും. ഗവണ്മെന്റ് സ്കൂളുകളില് മുഴുവനും സ്മാര്ട്ട് ക്ലാസ് മുറികള് സജ്ജമാക്കുമെന്നും ആശാ സനില് പറഞ്ഞു.
കോണ്ഗ്രസ് രാഷ്ട്രീയത്തില് ഗ്രൂപ്പുണ്ടെന്നുള്ളത് നിഷേധിക്കാനാകില്ലെന്ന് ജില്ലാ പഞ്ചായത്ത് വൈസ് പ്രസിഡന്റ് ബി. അബ്ദുള് മുത്തലീബ് പറഞ്ഞു. വീതം വെയ്പ്പ് പാടില്ലെന്ന് കെപിസിസിയുടെ നിര്ദേശം ഉള്ളതിനാല് ജില്ലാ പഞ്ചായത്ത് പ്രസിഡന്റ് സ്ഥാനം രണ്ടര വര്ഷം കഴിയുമ്പോള് മാറാന് സാധ്യതയില്ലെന്നും അദ്ദേഹം കൂട്ടിച്ചേര്ത്തു.
