ക്വാലാലംപുര്: ഭീകരസംഘടനയായ ഇസ്ലാമിക് സ്റ്റേറ്റിനോട് യാതൊരു വിധത്തിലുമുള്ള വിട്ടുവീഴ്ചയ്ക്കുമില്ലെന്ന് അമേരിക്കന് പ്രസിഡന്റ് ബരാക് ഒബാമ. പാരീസിലെ സാധാരണക്കാരായ ജനങ്ങള്ക്കു നേരെയുള്ള ആക്രമണം ഒരു തരത്തിലും അംഗീകരിക്കാന് സാധിക്കില്ല. ഒമ്പതു ദിവസത്തെ തുര്ക്കി, ഏഷ്യ സന്ദര്ശനത്തിനിടെയാണ് ഒബാമ ഇത്തരത്തില് പ്രസ്താവന നടത്തിയത്.
റഷ്യയുമായി സഹകരിച്ച് ഐഎസ് ഭീകരതയ്ക്കെതിരെ പോരാടാന് അമേരിക്ക തയ്യാറാണെന്നും ഒബാമ പറഞ്ഞു. അന്താരാഷ്ട്ര സുരക്ഷയെ മുന്നിര്ത്തി ഐഎസിനെതിരെയുള്ള ആക്രമണങ്ങള്ക്ക് നേതൃത്വം നല്കാന് അമേരിക്ക തയ്യാറാണെന്ന് റഷ്യന് പ്രസിഡന്റ് വഌദിമര് പുടിനെ ഒബാമ അറിയിച്ചു. അടുത്തിടെ റഷ്യന് പാസ്സഞ്ചര് ജെറ്റിനു നേരെയുണ്ടായ ഐഎസ് നടത്തിയ ആക്രമണത്തില് 224 പേര് കൊല്ലപ്പെട്ടിരുന്നു. ഇവര്ക്കുനേരെ ആക്രമണം നടത്തിയ കുറ്റവാളികളെ കണ്ടെത്താന് പ്രസിഡന്റിന് ഉത്തരവാദിത്വമുണ്ട്. അഞ്ചുവര്ഷത്തോളമായി സിറിയന് ഭരണകൂടം ഇവര്ക്കെതിരെ ആക്രമണം നടത്തി വരികയാണ്.
നിലവില് സിറിയന് പ്രസിഡന്റ് ബാസര് അസദുമായി സഹകരിച്ചാണ് റഷ്യ വ്യോമാക്രമണം നടത്തുന്നത്. അസാദിനെ പിന്തുണയ്ക്കുന്നതില്നിന്ന് റഷ്യ പിന്വാങ്ങണം. അസദ് ഭരണത്തില് ഉള്ളിടത്തോളം കാലം സിറിയയിലെ ഭീകര പ്രവര്ത്തനം അവസാനിപ്പിക്കാനാവില്ല. അസദും വിമതരും തമ്മിലുള്ള പോരാട്ടം മൂലമാണ്് സിറിയയിലേയും ഇറാഖിലേയും ഐഎസിന്റെ പ്രവര്ത്തനങ്ങള്ക്കു സാധിച്ചത്. പാരീസ് ആക്രമണം ഇതിന്റെ പ്രതിഫലനമാണ്.
അതിനിടെ, ഫ്രഞ്ച്് പ്രസിഡന്റ് ഫ്രാന്കോയിസ്ഒളന്ഡെ കഴിഞ്ഞദിവസം വൈറ്റ്ഹൗസില് ഒബാമയുമായി കൂടിക്കാഴ്ച നടത്തി ഭീകരാക്രമണം സംബന്ധിച്ച് ചര്ച്ച നടത്തി.
ചാവേറാക്രമണങ്ങള് ഇല്ലാതാക്കുകയാണ് ഐഎസിനെ തോല്പ്പിക്കാനുള്ള എറ്റവും നല്ല മാര്ഗം. അമേരിക്ക ഇത്തരം ഭീകരാക്രമണങ്ങളെ ഭയക്കുന്നില്ലെന്നും ഇത്തരത്തില് എല്ലാ രാജ്യങ്ങള്ക്കും സാധിക്കണമെന്നും ഒബാമ കൂട്ടിച്ചേര്ത്തു.
