രാജപുരം: എസ്സി എസ്ടി വിഭാഗക്കാരുടെ പ്രശ്നങ്ങള് നേരിട്ട് മനസ്സിലാക്കുന്നതിന്റെ ഭാഗമായി ജില്ലാ പോലീസ് മേധാവി ഡോ.ശ്രീനിവാസ് രാജപുരം പോലീസ് സ്റ്റേഷന് പരിധിയിലെ മാനടുക്കം ശാസ്ത്രി നഗര് പട്ടികവര്ഗ്ഗ കോളനി സന്ദര്ശിച്ച് കോളനി നിവാസികളുടെ പരാതികള് സ്വീകരിച്ചു. ജില്ലാ പോലീസ് മേധാവി മാസംതോറും ജില്ലയിലെ പിന്നോക്കാവസ്ഥയിലുള്ള കോളനികള് സന്ദര്ശിച്ച് പരാതി പരിഹാര അദാലത്തുകള് സംഘടിപ്പിച്ചുവരുന്നതിന്റെ ഭാഗമായാണ് ശാസ്ത്രി നഗര് കോളനി സന്ദര്ശിച്ചത്. പരാതി അദാലത്തില് കോളനിക്കാരുടെ വിവിധ പ്രശ്നങ്ങള് സംബന്ധിച്ച 80 പരാതികള് ലഭിച്ചു. കക്കൂസ്, ചികിത്സ ധനസഹായം, കുടിവെള്ളം, പട്ടയം, ഭാവന നിര്മ്മാണം തുടങ്ങിയവയുമായി ബന്ധപ്പെട്ട പരാതികളാണ് കൂടുതലായി ലഭിച്ചത്. വീടുകളില് കക്കൂസ് നിര്മ്മിക്കുന്നതിലേക്കായുള്ള ധനസഹായത്തിനുമാത്രം 52 പരാതികളാണ് ലഭിച്ചത്.
വിവിധ വകുപ്പുകളുടെ സഹകരണത്തോടെ നടത്തിയ അദാലത്തില് ആരോഗ്യ വകുപ്പ്, പഞ്ചായത്ത്, എക്സൈസ്, റവന്യൂ, കെഎസ് ഇബി, വാട്ടര് അതോറിറ്റി തുടങ്ങിയ വകുപ്പുകളിലെ മുതിര്ന്ന ഉദ്യോഗസ്ഥര് ബന്ധപ്പെട്ട പരാതികളിന്മേലുള്ള തുടര്നടപടി പരാതിക്കാരെ അറിയിച്ചു. ചടങ്ങില് കുറ്റിക്കോല് ഗ്രാമ പഞ്ചായത്ത് പ്രസിഡണ്ട് എന്.ടി.ലക്ഷ്മി അധ്യക്ഷത വഹിച്ചു. കറടുക്ക ബ്ളോക്ക് പഞ്ചായത്തംഗം ലില്ലി തോമസ്, കുറ്റിക്കോല് പഞ്ചായത്ത് വൈസ് പ്രസിഡന്റ് പി.ദാമോദരന്, കസര്കോട് സ്പെഷ്യല് മൊബൈല് സ്ക്വാഡ് ഡിവൈഎസ്പി. എല്.സുരേന്ദ്രന്, വെള്ളരിക്കുണ്ട് സിഐ ടി.പി.സുമേഷ്, രാജപുരം എസ്.ഐ.രാജീവന് വലിയവളപ്പില് എന്നിവരും അദാലത്തില് സന്നിഹിതരായിരുന്നു.
