പാരീസിലെ ഭീകരാക്രമണത്തിന് ഫ്രാന്‍സ് മറുപടി നല്‍കി തുടങ്ങി. സിറിയില്‍ ഐഎസിനെതിരെ ഫ്രാന്‍സ് വ്യോമാക്രമണം ശക്തമാക്കി. വടക്കന്‍ സിറിയയില്‍ ഐഎസ് ഭീകരരുടെ ശക്തികേന്ദ്രമായ റാക്കയിലാണ് ഫ്രഞ്ച് വ്യോമസേന ആക്രമണം നടത്തിയത്.
വ്യോമസേനയുടെ 10 വിമാനങ്ങള്‍ നടത്തിയ ആക്രമണത്തില്‍ ഭീകരരുടെ നിരവധി താവളങ്ങള്‍ തകര്‍ത്തതായും ഫ്രഞ്ച് സൈന്യം അവകാശപ്പെട്ടു. ഐഎസ് ഭീകരര്‍ പാരീസില്‍ നടത്തിയ ആക്രമണങ്ങളില്‍ 158 പേര്‍ കൊല്ലപ്പെടുകയും 350 ലധികം പേര്‍ക്കു പരിക്കേല്‍ക്കുകയും ചെയ്തിരുന്നു. അക്രമികളായ എട്ടുപേരും കൊല്ലപ്പെട്ടു.
ഫ്രാന്‍സ് സിറിയയില്‍ ഐഎസിനെതിരേ വ്യോമാക്രമണം നടത്തുന്നതിനുള്ള തിരിച്ചടിയാണ് പാരീസിലുണ്ടായ ആക്രമണമെന്ന് ഐഎസ് ഈജിപ്റ്റില്‍ പുറത്തിറക്കിയ പ്രസ്താവനയില്‍ അവകാശപ്പെട്ടിരുന്നു.
