വിരിവയ്‌ക്കുന്ന സ്ഥലത്ത് അറവുശാല
കാലടി: ശബരിമല അയ്യപ്പന്മാരുടെ പ്രധാന ഇടത്താവളമായ കാലടി കാഞ്ചീ കാമകോടി കീര്‍ത്തി സ്തംഭത്തിന് എതിര്‍വശം വിരിവയ്‌ക്കുകയും പാര്‍ക്ക് ചെയ്യുന്ന സ്ഥലത്ത് ഫിഷറീസ് വകുപ്പിന്റെ ഫണ്ട് ഉപയോഗിച്ച് അറവുശാല നിര്‍മിച്ചിരിക്കുകയാണ്. ഓരോ തീര്‍ത്ഥാടന കാലത്തും ആയിരക്കണക്കിന് അയ്യപ്പഭക്തരാണ് ഇവിടെ എത്തുന്നത്.
ഇവര്‍ക്ക് വാഹനങ്ങള്‍ പാര്‍ക്ക് ചെയ്യുന്നതിനോ വിരിവെക്കുന്നതിനോ കുടിവെള്ളത്തിനോ പ്രാഥമിക ആവശ്യങ്ങള്‍ക്കൊ യാതൊരു സൗകര്യവും ഇതുവരെ പഞ്ചായത്ത് അധികൃതര്‍ ചെയ്തിട്ടില്ല.
മുന്‍കാലങ്ങളില്‍ അയ്യപ്പന്മാര്‍ വിരിവച്ചിരുന്നിടം ഇപ്പോള്‍ അറവുശാലയാണ്. മണ്ഡലമാസം തുടങ്ങുവാന്‍ മൂന്ന് ദിവസം ബാക്കി നില്‍ക്കെ യാതൊരു സൗകര്യവും ചെയ്യാത്തത് തീര്‍ത്ഥാടകരോടുള്ള വെല്ലുവിളിയായി കണക്കാക്കാം. ഇവിടെ വാഹന പാര്‍ക്കിങ്ങിന് മുന്‍കാലങ്ങളില്‍ അമിത ചാര്‍ജ് ഈടാക്കിയപ്പോള്‍ വിവിധ ഹൈന്ദവ സംഘടനകളുടെ ഇടപെടല്‍ മൂലം പാര്‍ക്കിങ് ഫീസ് കുറച്ചിരുന്നു.
ശബിരമല തീര്‍ത്ഥാടകര്‍ ഇവിടെ ഗുണ്ടാ മര്‍ദ്ദനം വരെ ഏറ്റിട്ടുണ്ട്. ഇവിടെ പോലീസ് എയ്ഡ് പോസ്റ്റോ പോലീസിനെ ഡ്യൂട്ടിക്കോ ഇടാറില്ല. ഇവിടുത്തെ അസൗകര്യങ്ങള്‍ കണക്കിലെടുത്ത് അയ്യപ്പവാഹനങ്ങള്‍ കാലടിയില്‍ പ്രവേശിക്കാതെയും പോകുകയാണ് പതിവ്.
