കോട്ടയം: തദ്ദേശ സ്വയംഭരണ സ്ഥാപനങ്ങളിലേയ്ക്കുള്ള തെരഞ്ഞെടുപ്പില് ബിജെപി അഭിമാനകരമായ നേട്ടം കൈവരിച്ചുവെന്ന് ബിജെപി ജില്ലാ പ്രസിഡന്റ് ഏറ്റുമാനൂര് രാധാകൃഷ്ണന് പത്രസമ്മേളനത്തില് പറഞ്ഞു. ബിജെപിയും സമത്വമുന്നണിയും വലിയ മുന്നേറ്റമാണ് തെരഞ്ഞെടുപ്പില് ഇടത്-വലത് മുന്നണികള്ക്കെതിരെ നടത്തിയത്. ജില്ലയില് നഗരസഭയുള്പ്പെടെ 104 വാര്ഡുകളിലാണ് ബിജെപി-സമത്വമുന്നണി സഖ്യം വിജയിച്ചത്. വരാന് പോകുന്ന വലിയൊരു മുന്നേറ്റത്തിന്റെ തുടക്കമാണിതെന്നും ഏറ്റുമാനൂര് രാധാകൃഷ്ണന് പറഞ്ഞു. പലയിടത്തും ഇടതിനും വലതിനും മുഖ്യഎതിരാളികളായി ബിജെപിയാണ് രണ്ടാം സ്ഥാനത്ത് എത്തിയത്. ഇത് വരാന് പോകുന്ന അസംബ്ലി തെരഞ്ഞെടുപ്പില് മാറ്റം കുറിക്കും. പള്ളിക്കത്തോടും ചിറക്കടവുവുള്പ്പെടെ പലയിടങ്ങളിലും ഇരു മുന്നണികള് ബിജെപിയുടെ മുന്നേറ്റത്തെ തടയുവാന് ഒന്നിച്ചു. നാല് മന്ത്രിമാര് ഉള്ള കോട്ടയം ജില്ലയില് കോണ്ഗ്രസ്സിന് വലിയ തകര്ച്ചയാണ് ഉണ്ടായത്. ഐക്യജനാധിപത്യമുന്നണിക്കെതിരെ ശക്തമായാണ് ജനങ്ങള് പ്രതികരിച്ചതെന്നും ഏറ്റുമാനൂര് രാധാകൃഷ്ണന് പറഞ്ഞു. തദ്ദേശതെരഞ്ഞെടുപ്പില് ബിജെപി-സമത്വമുന്നണികളെ വിജയിപ്പിച്ചതില് ബിജെപി ജില്ലാ നേതൃത്വം നന്ദി രേഖപ്പെടുത്തി.
പത്രസമ്മേളനത്തില് ബിജെപി സംസ്ഥാന സെക്രട്ടറി അഡ്വ. നാരായണന് നമ്പൂതിരി, ജില്ലാ ജനറല് സെക്രട്ടറി കെ.എം. സന്തോഷ്കുമാര്, ജില്ലാ നിയോജകമണ്ഡലം പ്രസിഡന്റ് സി.എന്. സുഭാഷ്, ന്യൂനപക്ഷമോര്ച്ച ജില്ലാ പ്രസിഡന്റ് ജിജോ ജോസഫ് തുടങ്ങിയവര് പങ്കെടുത്തു.
