എം.ഡി. ബാബുരഞ്ജിത്
കരുനാഗപ്പള്ളി: പാവുമ്പാ പാലത്തിന് ഇനിയും ശാപ മോക്ഷമായില്ല. രണ്ടു പ്രദേശങ്ങളെ കൂട്ടിയോജിപ്പിക്കുന്നതും ആയിരക്കണക്കിന് ജനങ്ങളുടെ ആശ്രയവുമായിരുന്ന പാലം പൊളിച്ചുമാറ്റിയിട്ട് വര്ഷം ഒന്ന് ആയിട്ടും ഇനിയും പാലത്തിന്റെ പണി ആരംഭിക്കാത്തതില് ദുരിതമനുഭവിക്കുകയാണ് ഇവിടുത്തെ ജനങ്ങള്.
കാലപഴക്കംകൊണ്ട് കേടുപാടുകള് സംഭവിച്ചതും ഒരു വാഹനം മാത്രം കടന്നുപോകത്തക്ക തരത്തില് വീതികുറഞ്ഞതുമായ പാലം പുതുക്കി പണിയണമെന്ന കാലങ്ങളായുള്ള ഇവിടുത്തുകാരുടെ പരാതികളുടേയും പ്രക്ഷോഭങ്ങളുടേയും ഫലമായാണ് രണ്ട് കോടി രൂപ മുടക്കി പാലം പണിയാന് ആരംഭിച്ചത്.
പാലം പണിക്കായി ടെണ്ടര് പിടിച്ച ആള് നിലവിലുള്ള വീതികുറഞ്ഞ പാലം പൊളിച്ചു മാറ്റിയെങ്കിലും തുടര്ന്നുള്ള പണികള് ഒന്നും തന്നെ ഇതുവരെ ആരംഭിച്ചിട്ടില്ല. കോടികണക്കിന് രൂപ സര്ക്കാരില് നിന്നും കിട്ടാനുള്ളതുകൊണ്ടാണ് പണി ആരംഭിക്കാതിരിക്കുന്നതെന്നാണ് കരാറുകാരന് പറയുന്നത്.
പാലം പണി അടിയന്തരമായി ആരംഭിക്കണമെന്ന് ആവശ്യപ്പെട്ട് ബിജെപി പ്രവര്ത്തകര് പിഡബ്ല്യുഡി എഞ്ചിനിയറെ ഘരാവോ ചെയ്ത് വഴിതടയല് ഉള്പ്പെടെ സമരപരിപാടികളുമായി മുന്നോട്ട് പോവുകയാണ്.
ദേശീയപാതയില് നിന്ന് കിഴക്കന് ഭാഗങ്ങളിലേക്ക് പോകുന്ന പ്രധാനമാര്ഗങ്ങളിലൊന്നായ ഇവിടെ പാലം ഇല്ലാത്തതുമൂലം കിലോമീറ്ററുകള് ചുറ്റി ആണ് ആള്ക്കാര് യാത്ര ചെയ്യുന്നത്. സ്കൂളില് പോകുന്ന കുട്ടികളും ഉദ്യോഗസ്ഥരുമുള്പ്പെടെ യാത്ര ചെയ്യേണ്ട ബസുകള് ഇതുവഴി വരാത്തതും ജനങ്ങളെ ഏറെ ബുദ്ധിമുട്ടിയ്ക്കുന്നു.
സര്ക്കാര് പണം നല്കാനുള്ളത് മറച്ചുവെച്ച് പാലം പണി ആരംഭിച്ച് ജനങ്ങളെ ദുരിതത്തിലാക്കിയത് എന്തിനാണെന്ന ചോദ്യത്തിന് ആരും ഉത്തരം തരുന്നില്ല. പാലം പണി ഉടന് ആരംഭിക്കും, ഉദ്യോഗസ്ഥരെ കണ്ട് ചര്ച്ച നടത്തി എന്നൊക്കെ പറയുന്ന എംഎല്എയും ഇപ്പോള് ഈ വഴിക്ക് വരാറില്ല. ചോദ്യങ്ങള്ക്ക് മറുപടി ഇല്ലാതെ നിശബ്ദത പാലിക്കുകയാണ് പഞ്ചായത്ത് അധികൃതരും.
