പാട്ന: നൈരാശ്യത്തില് നിന്നുണ്ടായതാണ് നിതീഷ്, ലാലു, കോണ്ഗ്രസ് മഹാസഖ്യമെന്ന് കേന്ദ്ര ധനമന്ത്രി അരുണ് ജെയ്റ്റ്ലി പറഞ്ഞു. യുവാക്കളുടെ വിപുലമായ പിന്തുണയോടെ ബിജെപി നയിക്കുന്ന എന്ഡിഎ സര്ക്കാര് അധികാരത്തില് വരുമെന്നും സുസ്ഥിര സര്ക്കാര് ഉണ്ടാക്കുമെന്നും അദ്ദേഹം പറഞ്ഞു. ബീഹാറില് തെരഞ്ഞെടുപ്പ് പ്രചാരണത്തിനെത്തിയ ജെയ്റ്റലി വാര്ത്താസമ്മേളനത്തില് സംസാരിക്കുകയായിരുന്നു.
ബീഹാറിന് പ്രത്യേക പദവിവേണമെന്ന മുഖ്യമന്ത്രി നിതീഷ്കുമാറിന്റെ ആവശ്യം ഉചിതമല്ല. കേന്ദ്രവും സംസ്ഥാനങ്ങളും തമ്മിലുള്ള നികുതി വിഹിതം സംബന്ധിച്ച് 14-ാം ധനകാര്യകമ്മീഷനിലൂടെ ഭരണഘടനാപരമായ അംഗീകാരം നല്കിയിട്ടുണ്ട്. നിലവില് പ്രധാനമന്ത്രി നരേന്ദ്ര മോദി ബീഹാറിനായി 1.25 ലക്ഷം കോടി രൂപയുടെ പ്രത്യേക പാക്കേജ് പ്രഖ്യാപിച്ചിട്ടുണ്ട്. നിലവിലുള്ള അടിസ്ഥാനസൗകര്യവികസന പ്രവര്ത്തനങ്ങളുടെ പൂര്ത്തീകരണത്തിനായി 40,000 കോടി രൂപയും അധികമായി നല്കിയിട്ടുണ്ട്.
പഴയ പദ്ധതികളുടെ പൂര്ത്തീകരണത്തിനായി പാക്കേജ് അനുവദിക്കേണ്ടിവന്നത് സംസ്ഥാന സര്ക്കാരിന്റെ നെഗറ്റീവ് നിലപാടുമൂലമാണ്. പ്രത്യേക പാക്കേജ് റീ പാക്കേജാണെങ്കില് എന്തുകൊണ്ട് പഴയപദ്ധതികള് നടപ്പാക്കാതിരുന്നതെന്ന് കോണ്ഗ്രസ് ചോദിക്കണമെന്നും ജെയ്റ്റ്ലി പറഞ്ഞു. കോണ്ഗ്രസ് അധികാരത്തില് ഇരുന്നപ്പോള് ആവിഷ്ക്കരിച്ച പദ്ധതികളും അവര് നടപ്പാക്കിയില്ല. ഇപ്പോള് കോണ്ഗ്രസും മഹാസഖ്യത്തിലുണ്ട്. എന്തുകൊണ്ട് ഈ പദ്ധതികള് നടപ്പാക്കിയില്ലായെന്ന് നിതീഷ് ചോദിക്കണം.
കഴിഞ്ഞ രണ്ട് നിയമസഭാതെരഞ്ഞെടുപ്പുകളെ അപേക്ഷിച്ച് അപ്രതീക്ഷിതമായ വിജയമായിരിക്കും ബിജെപി നയിക്കുന്ന എന്ഡിഎ നേടുക. കഴിഞ്ഞമൂന്ന് ഘട്ട തെരഞ്ഞെടുപ്പിലും ബിജെപി മുന്നേറ്റം പ്രകടമാണ്. അടുത്ത രണ്ട് ഘട്ടത്തിലെ തെരഞ്ഞെടുപ്പിലും ഈ മുന്നേറ്റം ആവര്ത്തിക്കും. പ്രധാനമന്ത്രി നരേന്ദ്ര മോദിയുടെ ജനകീയതയും ബിജെപി നേതൃത്വത്തില് ബീഹാര് ജനതക്കുള്ള വിശ്വാസവും എന്ഡിഎക്ക് അനുകൂലമാണ്. കേന്ദ്രവുമായി സൗഹാര്ദ്ദത്തില് പോകണമെന്നാണ് ജനങ്ങള് ആഗ്രഹിക്കുന്നത്. അതിന് സഹായകമായ രീതിയിലാണ് തെരഞ്ഞെടുപ്പിന് വളരെ മുമ്പ്തന്നെ ബീഹാറിനായി 1.25 ലക്ഷം കോടിയുടെ പ്രത്യേക പാക്കേജ് പ്രധാനമന്ത്രി പ്രഖ്യാപിച്ചത്.
നൈരാശ്യത്തില് നിന്നുള്ള ആര്ജെഡി, ജെഡിയു, കോണ്ഗ്രസ് കക്ഷികള്ക്ക് ഇത് നിലനില്പ്പിനായുള്ള പോരാട്ടമാണ്. ആര്ജെഡി ഒരുകുടുംബ ഗ്രൂപ്പാണ്. അവര് കുടുംബാധിപത്യം കൊണ്ടുവരുവാനാണ് ശ്രമിക്കുന്നത്. നിതീഷ്കുമാര് സ്വയം ഉണ്ടാക്കിയ കുരുക്കിലാണെന്നും അദ്ദേഹം പറഞ്ഞു.
