പത്തനംതിട്ട : അഞ്ചുവര്ഷം മുമ്പ് വാര്ദ്ധക്യകാല പെന്ഷന് അപേക്ഷ നല്കിയ വയോധികന് സംസ്ഥാന മനുഷ്യാവകാശ കമ്മീഷന് അദ്ധ്യക്ഷന് ജസ്റ്റിസ് ജെ.ബി. കോശിയുടെ ഇടപെടലിനെ തുടര്ന്ന് 5 വര്ഷങ്ങള്ക്കു ശേഷം പെന്ഷന് അനുവദിച്ചു.
പത്തനംതിട്ട പുറമറ്റം മുണ്ടമല സ്വദേശി ഫിലിപ്പ് ചാക്കോ സമര്പ്പിച്ച പരാതിയിലാണ് നടപടി. 2010 മേയ് 4 ന് 65 കാരനായ ഫിലിപ്പ്ചാക്കോ പുറമറ്റം ഗ്രാമപഞ്ചായത്തില് വാര്ധക്യകാല പെന്ഷനുവേണ്ടി അപേക്ഷ നല്കി. അപേക്ഷയെ കുറിച്ച് ഒരു വിവരവും ലഭിക്കാത്തതിനെ തുടര്ന്ന് ഫിലിപ്പ് ചാക്കോ മനുഷ്യാവകാശ കമ്മീഷനെ സമീപിക്കുകയായിരുന്നു. കമ്മീഷന് പുറമറ്റം പഞ്ചായത്തില് നിന്നും വിശദീകരണം തേടി.
ഫിലിപ്പ് ചാക്കോയുടെ അപേക്ഷ 2013 ല് ലഭിച്ചെങ്കിലും പ്രായം തെളിയിക്കുന്ന സര്ട്ടിഫിക്കേറ്റില്ലെന്ന കാരണത്താല് 2014 ല് ആര്.ഡി.ഒ അപേക്ഷ നിരസിച്ചതായി പുറമറ്റം ഗ്രാമപഞ്ചായത്ത് സെക്രട്ടറി കമ്മീഷനെ അറിയിച്ചു. 2014 നവംബര് 5 ന് അപേക്ഷകന് പ്രായം തെളിയിക്കുന്ന സര്ട്ടിഫിക്കേറ്റ് ഹാജരാക്കി. ഇതിനുശേഷം പെന്ഷന് വേണ്ടി അപേക്ഷകന് ആര് ഡി ഒയെ സമീപിച്ചെങ്കിലും പെന്ഷന് അനുവദിക്കാനുള്ള ഉത്തരവാദിത്വം ഗ്രാമപഞ്ചായത്തിന് കൈമാറിയതായി ആര് ഡി ഒ അറിയിച്ചു.
മനുഷ്യാവകാശ കമ്മീഷന് അദ്ധ്യക്ഷന് ജസ്റ്റിസ് ജെ.ബി. കോശിയുടെ ഉത്തരവിന്റെ അടിസ്ഥാനത്തില് ഫിലിപ്പ് ചാക്കോക്ക് വാര്ദ്ധക്യകാല പെന്ഷന് അനുവദിക്കാന് തീരുമാനിച്ചതായി പഞ്ചായത്ത് സെക്രട്ടറി കമ്മീഷനെ അറിയിച്ചു. അറുന്നൂറ് രൂപയാണ് പ്രതിമാസ പെന്ഷന്.
