കോഴിക്കോട്: സിപിഎമ്മില് പാളയം 50-ാം വാര്ഡില് പാര്ട്ടിക്കുള്ളില് പടയൊരുക്കം. സിപിഎമ്മിന്റെ ഔദ്യോഗിക സ്ഥാനാര്ത്ഥി ജയശ്രീക്കെതിരെ പാര്ട്ടി പ്രവര്ത്തകയായ വിജയശ്രീ കുട അടയാളത്തില് മത്സരിക്കുന്നു. തീപാറുന്ന മത്സരം കാഴ്ച വെച്ചുകൊണ്ട് ബിജെപിയുടെ ജയശ്രീയും താമര ചിഹ്നത്തില് ഇവിടെ ജനവിധി തേടുന്നു.
വ്യക്തി താല്പ്പര്യങ്ങള്ക്ക് വേണ്ടി പാര്ട്ടിയെ അടിയറ വെച്ചതില് പ്രതിഷേധിച്ചാണ് പ്രദേശത്ത് നിന്ന് നിരവധി പേര് പാര്ട്ടിയില് നിന്നകന്നത്. ജില്ലാ കമ്മിറ്റിയും ഏരിയ കമ്മിറ്റി നേതാക്കളും ഇടപെട്ടെങ്കിലും പ്രശ്നപരിഹാരം ഉണ്ടായില്ല. ബ്രാഞ്ച് കമ്മിറ്റിയിലെ ഏതാനും ഭാരവാഹികളുടെ കടുംപിടുത്തമാണ് പ്രശ്നം വഷളാക്കിയതെന്ന് ഒരു വിഭാഗം ആരോപിക്കുന്നു. പാര്ട്ടിയിലെ തെറ്റു തിരുത്തണമെന്ന് ആവശ്യവുമായാണ്
ഔദ്യോഗിക സ്ഥാനാര്ത്ഥിക്കെതിരെ മത്സരിക്കാന് ഇവര് തീരുമാനിച്ചത്. 30 വര്ഷമായി പാര്ട്ടി പ്രവര്ത്തകനും വാര്ഡ് കണ്വീനറും പാര്ട്ടി അംഗവുമായ അമലത്ത് ഷാജിയുടെ ഭാര്യ വിജയശ്രീ കുട ചിഹ്നത്തില് മത്സരിക്കാന് തീരുമാനിച്ചത് ഈ ആവശ്യവുമായാണ്. പാര്ട്ടി അംഗത്വം പോലുമില്ലാത്ത കോണ്ഗ്രസ് പാരമ്പര്യമുള്ള വീട്ടില് നിന്നാണ് സിപിഎം ഔദ്യോഗിക സ്ഥാനാര്ത്ഥിയെ കണ്ടെത്തിയതെന്ന് മറുവിഭാഗം ആരോപിക്കുന്നു. കുടുംബശ്രീ ബന്ധം വോട്ടാക്കാനാണ് ശ്രമം. വാര്ഡിലാകെ പുതുതായി കുടുംബശ്രീ രൂപീകരിക്കാനാണ് ശ്രമം നടക്കുന്നത്. പാര്ട്ടി പ്രവര്ത്തകരുടെ വികാരം മാനിക്കാതെ സ്ഥാനാര്ത്ഥി നിര്ണയം നടത്തിയതെന്നാണമറ്റൊരാരോപണം. സിപിഎമ്മിലെ പടല പിണക്കം ഗുണം ചെയ്യുമെന്നാണ് ബിജെപിയുടെ കണക്കുകൂട്ടല്. യുഡിഎഫിലെ ഉഷാദേവിയാണ് മത്സര രംഗത്തുള്ള മറ്റൊരു സ്ഥാനാര്ത്ഥി.
