പുനലൂര്: മാനസികാസ്വാസ്ഥ്യം ഉള്ളവര്ക്ക് ലഭിക്കേണ്ട അവകാശങ്ങള് ലംഘിക്കപ്പെടുന്നതാണ് ഇന്ന് സമൂഹം നേരിടുന്ന ഏറ്റവും വലിയ പ്രതിസന്ധിയെന്ന് ജില്ലാ ജഡ്ജി എ.കെ.ഗോപകുമാര്.
ഒറ്റപ്പെടലുകള് മരണത്തെക്കാള് ഭീകരമാണ്. പാര്ശ്വവല്ക്കരിക്കപ്പെടുന്ന ഇന്നത്തെ സമൂഹം മാനസികരോഗികളായവരെ പരിഹസിക്കുകയും ഒറ്റപ്പെടുത്തുകയും ചെയ്യുന്നു. ഇത്തരം പ്രവണതകല് പരിഹരിക്കപ്പെടേണ്ടതാണ്. അതിന് വിദ്യാര്ത്ഥികള് ഉള്പ്പെടുന്ന പുതുതലമുറ മുന്നിരയിലേക്ക് കടന്നുവരണം. പത്തനാപുരം താലൂക്ക് ലീഗല് സര്വ്വീസസ് കമ്മിറ്റിയുടെ ആഭിമുഖ്യത്തില് സ്നേഹതീരത്ത് നടന്ന മാനസികാരോഗ്യദിനാചരണം ഉദ്ഘാടനം ചെയ്യുകയായിരുന്നു അദ്ദേഹം.
വിവിധ വിഭാഗത്തില് പുനരധിവാസപ്രവര്ത്തനങ്ങളുമായി മാനസികരോഗികളെ സമൂഹത്തിന്റെ മുന്നിരയിലേക്ക് ഉയര്ത്തി കൊണ്ടുവരാന് സ്നേഹതീരം നടത്തുന്ന പ്രവര്ത്തനങ്ങള് ശ്ലാഘനീയമാണെന്ന് അദ്ദേഹം കൂട്ടിചേര്ത്തു.
തലവൂര് ഡിവിവിഎച്ച്എസ്എസ് എന്എസ്എസ് യൂണിറ്റുമായി സഹകരിച്ച് നടത്തിയ ദിനാചരണത്തില് വിദ്യാര്ത്ഥികളുമായി അദ്ദേഹം ആശയവിനിമയം നടത്തി. ചടങ്ങില് സിസ്റ്റര് റോസിലിന് അദ്ധ്യക്ഷയായിരുന്നു. വിളക്കുടി ഗ്രാമപഞ്ചായത്ത് പ്രസിഡന്റ് ശ്രീദേവിയമ്മ, ലീഗല് സര്വ്വീസസ് സെക്രട്ടറി ഷിബു, എന്എസ്എസ് പോഗ്രാം ഓഫീസര് ഭാനുപ്രസാദ്, റെജി, സിസ്റ്റര് ലിസി, എ.എ.വാഹിദ്, ജെയില് ജോണ്, കെ.ആര്.രജിത എന്നിവര് സംസാരിച്ചു.
