കോട്ടയം: ശ്രീനാരായണഗുരുദേവന്റെ ദര്‍ശനത്തെക്കുറിച്ച് ഇഎംഎസ് നമ്പൂതിരിപ്പാടിന്റെ നിലപാടുകളെ സിപിഎം തള്ളി പറയുവാന്‍ തയ്യാറുണ്ടോയെന്ന് വ്യക്തമാക്കണമെന്ന് ഹിന്ദു ഐക്യവേദി സംസ്ഥാന ജനറല്‍ സെക്രട്ടറി ആര്‍.വി. ബാബു ആവശ്യപ്പെട്ടു.
കോട്ടയത്ത് കാലാതിവര്‍ത്തിയായ ഗുരുദേവദര്‍ശനം കാലഹരണപ്പെട്ട കമ്മ്യൂണിസം എന്ന വിഷയത്തില്‍ പ്രഭാഷണം നടത്തുകയായിരുന്നു അദ്ദേഹം. ഹൈന്ദവ സമൂഹത്തിന്റെ ബൂര്‍ഷ്വാ ആശയത്തിന്റെ പ്രചാരകനെന്നാണ് ഇഎംഎസ് ഗുരുദേവനെ വിശേഷിപ്പിച്ചത്.
ഇന്ന് വെള്ളാപ്പള്ളിയെ അപകീര്‍ത്തിപ്പെടുത്താന്‍ കുമാരനാശാനേയും കൂട്ടുപിടിക്കുന്ന സിപിഎം നേതാക്കള്‍ മതപരിവര്‍ത്തന രസവാദം, ദുരവസ്ഥ എന്നീ കൃതികളെക്കുറിച്ചുള്ള നിലപാടുകളും വ്യക്തമാക്കണമെന്നും അദ്ദേഹം പറഞ്ഞു. അരുവിക്കര തെരഞ്ഞെടുപ്പിനുശേഷം ഹിന്ദുത്വ രാഷ്‌ട്രീയത്തിന് കേരളത്തിലുണ്ടായ സ്വീകാര്യതയില്‍ സിപിഎമ്മിനുണ്ടായ മരണവെപ്രാളത്തില്‍നിന്നാണ് ഇപ്പോള്‍ ഉണ്ടായ വിവാദങ്ങളെല്ലാം.
അണികളുടെ ഒഴുക്കുതടയാന്‍ സിപിഎം നടത്തുന്ന ശ്രമത്തിന്റെ ഭാഗമാണ് എസ്എന്‍ഡിപിക്കും വെള്ളാപ്പള്ളി നടേശനുംനേരെനടക്കുന്ന കടന്നാക്രമണമെന്നും ആര്‍.വി. ബാബു അഭിപ്രായപ്പെട്ടു.
ഹിന്ദുഐക്യവേദിയുടെ നേതൃത്വത്തില്‍ നടന്ന സായാഹ്നസദസ്സില്‍ എസ്എന്‍ഡിപി യോഗം യൂണിയന്‍ പ്രസിഡന്റ് എ.ജി. തങ്കപ്പന്‍ അദ്ധ്യക്ഷതവഹിച്ചു. സിപിഎമ്മിന്റെ മതനിരപേക്ഷ കണ്‍വെന്‍ഷനില്‍ വിദേശപണത്തിന്റെ പിന്‍ബലത്തില്‍ കേരളത്തില്‍ മതപരിവര്‍ത്തനത്തിന് നേതൃത്വം കൊടുക്കുന്ന തങ്കുപാസ്റ്ററെ പങ്കെടുപ്പിച്ചതിന്റെ പശ്ചാത്തലം വ്യക്തമാക്കണമെന്ന് അദ്ദേഹം ആവശ്യപ്പെട്ടു. എസ്എന്‍ഡിപി യോഗത്തിന്റെ വാര്‍ഷികയോഗങ്ങളില്‍ മതം, സദാചാരം, വിദ്യാഭ്യാസം, വ്യവസായം എന്നീ വിഷയങ്ങളില്‍ പ്രത്യേക പ്രഭാഷണങ്ങള്‍ വേണമെന്നാണ് ഗുരുദേവന്‍ കല്‍പിച്ചിരുന്നത്.
ഇതില്‍നിന്നുതന്നെ അദ്ദേഹം ഹിന്ദുമതത്തിനെ നിഷേധിച്ചിരുന്നില്ലന്ന് വ്യക്തമാണെന്നും അദ്ദേഹം പറഞ്ഞു. ചടങ്ങില്‍ കുറിച്ചി അദ്വൈതവിദ്യാശ്രമം മഠാധിപതി സ്വാമി ധര്‍മ്മചൈതന്യ അനുഗ്രഹ പ്രഭാഷണം നടത്തി.
ശങ്കരദര്‍ശനംതന്നെയാണ് തന്റേതും എന്ന് പറഞ്ഞു ശ്രീനാരായണഗുരു അദ്വൈതദര്‍ശനത്തിന്റെ പ്രചാരകനായിരുന്നുവെന്ന് അദ്ദേഹം അഭിപ്രായപ്പെട്ടു.
