കോഴിക്കോട്: വാട്ടര് അഥോറിറ്റിയുടെ പ്രധാന പൈപ്പ് ലൈന് കടന്നുപോകുന്ന മലാപ്പറമ്പ് പാച്ചാക്കില് റോഡില് സ്വകാര്യഫഌറ്റ് നിര്മാണത്തിനു വേണ്ടി റോഡ് കയ്യേറി ആഴത്തില് മണ്ണെടുക്കുന്നതു ഭീഷണിയുയര്ത്തുന്നു. മാവൂര് ട്രീറ്റ്മെന്റ് പ്ലാന്റില് നിന്നും ശുദ്ധീകരിച്ച വെള്ളം മലാപ്പറമ്പിലെ ടാങ്കില് എത്തിക്കുന്ന 700എംഎം ഡിഐ പൈപ്പ്, മലാപ്പറമ്പിലെ ജപ്പാന് പദ്ധതി ടാങ്കില് നിന്നും വെള്ളം വിതരണം ചെയ്യുന്ന 350 എംഎം ഡിഐ പൈപ്പ്, ജൈക്കാ പദ്ധതിയുടെ തന്നെ 110എംഎം പിവിസി പൈപ്പ് തുടങ്ങിയവയും നിരവധി ചെറുപൈപ്പുകളും കടന്നുപോകുന്ന റോഡില് പാച്ചാക്കില് ഭാഗത്താണ് കയ്യേറ്റം.
റോഡിന്റെ ഒരുവശത്തു നാലരമീറ്ററോളം താഴ്ചയിലാണ് മണ്ണെടുപ്പ്. ചെറുവാഹനങ്ങള്ക്കു കടന്നുപോകാന് മാത്രം അനുമതിയുള്ള റോഡിലൂടെ വലിയ ടിപ്പര്ലോറികള് ഉപയോഗിച്ചാണ് മണ്ണുകടത്തുന്നത്. ഇത്രയും ഭാരം താങ്ങാനുള്ള ശേഷി ഈ പൈപ്പുകള്ക്കുണ്ടാവില്ലെന്നാണ് വാട്ടര് അഥോറിറ്റി ജീവനക്കാര് പറയുന്നത്. മാത്രമല്ല പൈപ്പുകള് പൊട്ടുകയോ ക്ഷതമേല്ക്കുകയോ ചെയ്താല് നഗരത്തിലേക്കുള്ള ജലവിതരണം പൂര്ണമായും തടസപ്പെടും. മണ്ണുകൊണ്ടുപോകാന് ദേശീയപാത ഡിവിഷന്റെ അനുമതിയുണ്ടെന്നാണ് നിര്മാണം നടത്തുന്നവര് അവകാശപ്പെടുന്നത്. എന്നാല് വാട്ടര് അഥോറിറ്റി ഇത്തരമൊരു അനുമതി നല്കിയിട്ടില്ലെന്നാണ് വിവരം. അഥോറിറ്റിയുടെ റോഡുകള്ക്കു സമീപം കെട്ടിടങ്ങളോ മറ്റ് നിര്മാണങ്ങളോ നടത്തണമെങ്കില് നോ ഒബ്ജക്ഷന് സര്ട്ടിഫിക്കറ്റ് വാങ്ങണമെന്ന് നിയമമുണ്ട്. എന്നാല് പാച്ചാക്കിലെ ഫഌറ്റ് നിര്മാണത്തിനു ഇത്തരമൊരു അനുമതി നല്കിയിട്ടില്ലെന്നും വിവരമുണ്ട്. ഈ റോഡില് പലഭാഗത്തും കയ്യേറ്റം നടക്കുന്നതായി പരാതി നേരത്തേ തന്നെ നിലവിലുണ്ട്. ചില കെട്ടിടങ്ങളുടെ ഭാഗങ്ങള് അതിര്ത്തി കവിഞ്ഞ് റോഡിലേക്കു തള്ളിനില്ക്കുന്ന നിലയിലാണ്.
മലാപ്പറമ്പ് വാട്ടര്അഥോറിറ്റി ഓഫീസിലേക്കുള്ള പ്രധാന റോഡില് അനധികൃതമായി കെട്ടിടം പണിതതു നേരത്തേ വിവാദമായിരുന്നു. ട്രേഡ് യൂണിയനുകളുടെ പരാതിയില് ഇതു സംബന്ധിച്ച വിജിലന്സ് അന്വേഷണം നടക്കുകയാണ്.
വാട്ടര് അഥോറിറ്റിയുടെ ഉടമസ്ഥതയിലുള്ള സ്വത്തുകള് സ്വകാര്യവ്യക്തികള് കയ്യേറുന്നതായുള്ള റിപ്പോര്ട്ടുകള് പലയിടങ്ങളില് നിന്നായി പുറത്തുവരികയാണ്. കയ്യേറ്റങ്ങളില് പ്രതിഷേധിച്ച് ജീവനക്കാരുടെ സംഘടനകള് രംഗത്തുവരികയുമുണ്ടായി. അഥോറിറ്റിയിലെ തന്നെ ഉന്നതതലത്തിലുള്ള ചിലരുടെ ഒത്താശയോടെയാണ് കയ്യേറ്റങ്ങള് നടക്കുന്നതെന്നാണ് ജീവനക്കാരുടെ ആരോപണം. കയ്യേറ്റങ്ങള് ഒഴിപ്പിച്ച് വാട്ടര് അഥോറിറ്റി സ്വത്തുകള് സംരക്ഷിക്കാന് ഉത്തരമേഖലാ ചീഫ് എന്ജിനിയറുടെ കീഴില് കേരള വാട്ടര് അഥോറിറ്റീസ് അസറ്റ്സ് ആന്ഡ് ലയബിലിറ്റീസ് അസെസ്മെന്റ് കമ്മിറ്റി പ്രവര്ത്തനമാരംഭിച്ചിട്ടുണ്ട്. വിവിധ ട്രേഡ് യൂണിയന് പ്രതിനിധികളുള്പ്പെടെയുള്ളവര് കമ്മിറ്റിയില് അംഗങ്ങളാണ്.
പാച്ചാക്കിലിലെ കയ്യേറ്റം തടയാന് അടിയന്തര നടപടികള് സ്വീകരിക്കണമെന്ന് ട്രേഡ് യൂണിയന് നേതാക്കളായ എം.ടി. സായിപ്രകാശ് (യുടിയുസി), സി.പി. സദാനന്ദന് (എഐടിയുസി), പി. സന്തോഷ്കുമാര് (സിഐടിയു), പി. പ്രമോദ് (ഐഎന്ടിയുസി) എന്നിവര് ആവശ്യപ്പെട്ടു. നടപടിയുണ്ടാകാത്ത പക്ഷം സമരപരിപാടികളുമായി മുന്നോട്ടുപോകുമെന്നും ഇവര് അറിയിച്ചു.
