കൊയിലാണ്ടി: കലാപഠനത്തിന്റെ സാധ്യതകള് പ്രയോജപ്പെടുത്തിക്കൊണ്ട് ശാസ്ത്രീയവും ഫലപ്രദവുമായ ബോധന രീതിയിലൂടെ ക്ലാസ്റൂം പഠനപ്രവര്ത്തനങ്ങള് പ്രാവര്ത്തികമാക്കുന്ന കലാഉദ്ഗ്രഥിത പഠനപദ്ധതിക്ക് നമ്പ്രത്ത്കര യുപി. സ്കൂളില് തുടക്കമാകുന്നു. കോഴിക്കോട് ഡയറ്റിന്റെ അക്കാദമിക മേല്നോട്ടത്തില് പുക്കാട് കലാലയത്തിന്റെ സഹകരണത്തോടെയാണ് പദ്ധതി നടപ്പിലാക്കുന്നത്.
എല്ലാവിഷയവുമായി ബന്ധപ്പെട്ട പാഠഭാഗങ്ങളെ ചിത്രകല സംഗീതം, നൃത്തം, നാടകം എന്നീ കലാപഠനസാധ്യതകള് ഉപയോഗിച്ചുള്ള സൂക്ഷ്മതല പ്രക്രിയയിലൂടെ പഠനാനുഭവമാക്കി മാറ്റുകയാണ് ഈ പദ്ധതിയിലൂടെ ചെയ്യുന്നത്.
സ്കൂള് പിടിഎ, എംപിടിഎ, എസ്എസ്ജി, പൂര്വ്വവിദ്യാര്ത്ഥികള്, അഭ്യുതയകാംക്ഷികള്, സന്നദ്ധസംഘടനകള് എന്നിവ അടങ്ങുന്ന സ്കൂള് വികസന സമിതിയാണ് ജീവതാളം എന്ന് പേരിട്ടിരിക്കുന്ന ഈപദ്ധതിക്ക് നേതൃത്വം നല്കുന്നത്.
ഇന്ന് എസ്സിആര്ടി റിസര്ച്ച് ഓഫീസര് ഡോ. മണക്കാല ഗോപാലകൃഷ്ണന് പദ്ധതി ഉദ്ഘാടനം ചെയ്യും. കീഴരിയൂര് ഗ്രാമപഞ്ചായത്ത് പ്രസിഡന്റ് അഡ്വ. കെ.കെ. ലക്ഷ്മീഭായ് അധ്യക്ഷത വഹിക്കും. കോഴിക്കോട് ഡയറ്റ്റ സീനിയര് ലക്ചറര് പി.ശിവദാസന് പദ്ധതി വിശദീകരിക്കും. പൂക്കാട് കലാലയം വൈസ്പ്രസിഡന്റ് യു.കെ. രാഘവന് കലാപരിശീലനത്തിന് തുടക്കം കുറിക്കും. മേലടി എഇഒ എ.പ്രദീപ്കുമാര് ലോഗോ പ്രകാശനം ചെയ്യും. പത്രസമ്മേളനത്തില് എം.ശ്രീഹര്ഷന്, രാജീവന് ആയാടത്ത്,കുഞ്ഞിരാമന് സന്ധ്യനിവാസ്, കെ.കെ. താജുദ്ദീന് എന്നിവര് പങ്കെടുത്തു.
