കോട്ടയം: സംസ്കൃതം നിത്യജീവിതത്തിന്റെ ഭാഗമാക്കണമെന്ന് മന്ത്രി തിരുവഞ്ചൂര് രാധാകൃഷ്ണന്. പൊതുവിദ്യാഭ്യാസവകുപ്പിന്റെ ഏഴാമത് സംസ്ഥാന സംസ്കൃതദിനം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. നിത്യജീവിതത്തിലേക്ക് ഭാഷ കടന്നു വന്നാല് സംസ്കൃതത്തിന്റെ വളര്ച്ച ത്വരിതഗതിയിലാകും. സംസ്ഥാനത്ത് ഒന്നാം ക്ലാസ് മുതല് പന്ത്രണ്ടാം ക്ലാസ് വരെ ഐച്ഛികഭാഷയായി സംസ്കൃതം പഠിക്കാനുള്ള അവസരമുണ്ട്. ഭാഷകളുടെ മാതാവായ സംസ്കൃതം ഇന്ത്യയുടെ അഭിമാനമാണ്. ലോകത്തിലെ എല്ലാ അറിവുകളുടേയും ഉറവിടം സംസ്കൃതഭാഷയിലാണ്. എന്നാല് ഭാഷാ പഠിക്കാന് എളുപ്പത്തിലുള്ള മാര്ഗം കണ്ടെത്തിയാല് മാത്രമേ സംസ്കൃതത്തിന്റെ മഹത്വം തിരിച്ചറിയാനാകൂ. ദേശഭക്തിയുടെ മൂര്ത്തിമത്ഭാവമായ സംസ്കൃതം ലോകത്തിനു മുന്നിലെത്താന് ഭാഷാപഠനം സജീവമായി നിലനിര്ത്തേണ്ടത് അത്യാവശ്യമാണെന്നും അദ്ദേഹം അഭിപ്രായപ്പെട്ടു.
ജില്ലാ പഞ്ചായത്ത് പ്രസിഡന്റ് നിര്മല ജിമ്മി അധ്യക്ഷത വഹിച്ചു. ഗുരുവന്ദനത്തില് പ്രൊഫ. എസ്. നാരായണകുറുപ്പിനെ ആദരിച്ചു. കേന്ദ്രസാഹിത്യ അക്കാദമി യുവസാഹിത്യ പുരസ്കാര ജേതാവ് ഡോ. എസ്. വി. ആര്യാംബികയെ അനുമോദിച്ചു. സംസ്ഥാനതലത്തില് സംസ്കൃതാധ്യാപകര്ക്കായി സംഘടിപ്പിച്ച മത്സരങ്ങളില് വിജയികളായവര്ക്കുള്ള സമ്മാനങ്ങള് വിതരണം ചെയ്തു. കവി പ്രഭാവര്മ മുഖ്യപ്രഭാഷണം നടത്തി. പൊതുവിദ്യാഭ്യാസ വകുപ്പ് ജോ. ഡയറക്ടര് ആലീസ് ജോര്ജ്, നഗരസഭാധ്യക്ഷന് കെ. ആര്. ജി വാര്യര്, ജില്ലാ പഞ്ചായത്ത് വിദ്യാഭ്യാസ സ്ഥിരസമിതി അധ്യക്ഷ സുധാകുര്യന്, നഗരസഭ ക്ഷേമകാര്യ സ്ഥിരസമിതി അധ്യക്ഷ അനീഷാ തങ്കപ്പന്, വിദ്യാഭ്യാസ സ്ഥിരസമിതി അധ്യക്ഷന് റ്റിനോ കെ. ജോസ്, നഗരസഭാംഗം എസ്. വി. ഹരിശ്ചന്ദ്രന്, ചീഫ് പ്ലാനിങ് ഓഫിസര് ആര്. എസ്. ഷിബു, കോട്ടയം ഡിഇഒ ടി. എം. ജോര്ജ് ജോസ്, പാലാ ഡിഇഒ ആലീസുകുട്ടി എബ്രഹാം, കാഞ്ഞിരപ്പള്ളി ഡിഇഒ ലൗലി സൈമണ്, കോട്ടയം ഈസ്റ്റ് എഇഒ കെ. ശ്രീലത, സംസ്കൃത അക്കാദമിക് കൗണ്സില് സംസ്ഥാന സെക്രട്ടറി എം. ബി. ഹരികുമാര്, ഫിലിപ് കെ. വര്ഗീസ്, ആര്. ശ്രീകുമാര്, സി.ആര്. ഹരികുമാര് എന്നിവര് പ്രസംഗിച്ചു.
