കൈയേറ്റത്തിനെതിരെ ജനകീയമുന്നേറ്റം ശക്തം

കൊട്ടാരക്കര: പുലമണില്‍ റോഡ് കൈയേറി നിര്‍മ്മിച്ച കടമുറികള്‍ ജനകീയ മുന്നേറ്റത്തിലൂടെ പൊളിച്ചു മാറ്റുന്നത് അധികാരികള്‍ക്ക് തിരിച്ചടിയാകുന്നു.

കൈയേറ്റ സമയത്ത് പുറംതിരിഞ്ഞു നിന്ന പഞ്ചായത്ത്, റവന്യൂ, പൊതുമരാമത്ത് അധികൃതര്‍ക്കും നഗരത്തിലെ കൈയേറ്റക്കാര്‍ക്കുമെല്ലാം താക്കീതായി മാറുകയാണ് ഈ ജനമുന്നേറ്റം. കൊട്ടാരക്കര പുലമണില്‍ പഴയ കൊല്ലം ചെങ്കോട്ട റോഡിന്റെ സ്ഥലം കയ്യേറി നിര്‍മ്മിച്ച രണ്ടു കടമുറികള്‍ പൊളിച്ചു മാറ്റാനുള്ള നാട്ടുകാരുടെ ശ്രമം ഞായറാഴ്ചയും തുടര്‍ന്നു. കോണ്‍ക്രീറ്റ് കട്ടര്‍ ഉപയോഗിച്ചു ബഹുനിലമന്ദിരത്തിലെ കടമുറികള്‍ പൊളിക്കുന്നതിനിടെ കഴിഞ്ഞ ദിവസം പോലീസ് സമവായ ശ്രമവുമായി എത്തിയിരുന്നു. കടയുടമയും സമരക്കാരുമായി നടത്തിയ ചര്‍ച്ചയില്‍ പത്ത്മീറ്റര്‍ വീതിയില്‍ കടമുറികള്‍ പൊളിച്ചുമാറ്റാന്‍ തയ്യാറാണെന്ന കടയുടമയുടെ സമ്മതം സമരക്കാര്‍ സ്വീകരിച്ചു. 14.6 മീറ്റര്‍ വീതിയിലാണ് ഇവിടെ കൈയേറ്റമുള്ളത്. ഇതില്‍ പത്ത് മീറ്റര്‍ പൊതുമരാമത്ത്‌വക സ്ഥലവും ബാക്കി 4.6 മീറ്റര്‍ പുറമ്പോക്ക് സ്ഥലവുമാണ്. തുടര്‍ന്ന് പത്ത് മീറ്റര്‍ സ്ഥലം അളന്നു തിട്ടപ്പെടുത്തുകയും ശേഷിക്കുന്ന 4.6 മീറ്റര്‍ സ്ഥലം ഒഴിപ്പിച്ചെടുക്കാന്‍ പിന്നീട് പഞ്ചായത്ത് നടപടി സ്വീകരിക്കാമെന്നും കൊട്ടാരക്കര പഞ്ചായത്ത് പ്രസിഡന്റ് ജേക്കബ് വര്‍ഗീസ് വടക്കടത്ത് സമരക്കാര്‍ക്ക് ഉറപ്പു നല്‍കുകയും കെട്ടിടഉടമയുടെ അനുമതിയോടെ തന്നെ സമരക്കാര്‍ കടപൊളിപ്പ് തുടരുകയും ചെയ്തു. തിങ്കളാഴ്ചയോടെ പൂര്‍ണമായും പൊളിച്ചുമാറ്റാന്‍ കഴിയുമെന്ന പ്രതീക്ഷയിലാണ് സമരക്കാര്‍. വര്‍ഷങ്ങള്‍ക്കു മുമ്പ് പുലമണ്‍ തോട് കയ്യേറി കെട്ടിടം നിര്‍മ്മിച്ച സ്വാകാര്യവ്യക്തിയില്‍ നിന്നും വസ്തുവിന്റെ വില ഈടാക്കി താലൂക്കാശുപത്രിക്കു നല്‍കിയ കോടതി വിധിക്ക് ശേഷം കൊട്ടാരക്കരയില്‍ കയ്യേറ്റം നടത്തിയവര്‍ക്കെതിരേ നാട്ടുകാര്‍ ഒന്നിക്കുന്ന മറ്റൊരു കാഴ്ചയാണ് ഇവിടെ നടക്കുന്നത്. സ്വകാര്യവ്യക്തിയുടെ കെട്ടിടം പൊളിച്ചെന്ന പേരില്‍ സമരക്കാര്‍ക്കെതിരെ പോലീസ് കേസെടുത്തിട്ടുമുണ്ട്. നഗരത്തില്‍ ചന്തമുക്ക്, പുലമണ്‍, പുലമണ് തോട്, റയില്‍വെ പുറമ്പോക്ക് എന്നിവടങ്ങളിലെല്ലാം വ്യാപകമായ കയ്യേറ്റങ്ങള്‍ നടന്നിട്ടുണ്ട്.

പുലമണിലെ ഈ ജനമുന്നേറ്റം ഇവിടേങ്ങളിലേക്കും വ്യാപിച്ചേക്കാമെന്ന ആശങ്കയിലാണ് കയ്യേറ്റക്കാര്‍. പഴയ കൊല്ലം-ചെങ്കോട്ട റോഡിന്റെ ചന്തമുക്ക് മുതല്‍ കോട്ടപ്പുറം വരെയുള്ള ഭാഗങ്ങള്‍ ഉള്‍പ്പെടുത്തി നഗരത്തില്‍ സമാന്തരപാതയായി ഉപയോഗിച്ച് നഗരത്തിലെ ഗതാഗത പ്രശ്‌നങ്ങല്‍ പരിഹരിക്കാന്‍ പദ്ധതി തയ്യാറാക്കിയിട്ട് വര്‍ഷങ്ങളായി.എന്നാല്‍ റോഡും പുലമണ്‍ തോടിനു കുറുകെയുള്ള പാലവും സന്ധിക്കുന്ന ഭാഗത്ത് സ്ഥലം കയ്യേറി കടമുറികള്‍ നിര്‍മ്മിച്ചതു മൂലം പദ്ധതി ഉപേക്ഷിച്ച അവസ്ഥയിലായിരുന്നു. കയ്യേറ്റം ഒഴിപ്പിക്കണമെന്നാവശ്യമായി കര്‍മ്മസമിതി സമരം ആരംഭിച്ചു. ഇവര്‍ക്കെതിരേ കേസുമായിപോയ ഉടമ പരാജയപ്പെടുകയും സമരക്കാര്‍ക്കനുകൂലമായി കോടതിവിധി ഉണ്ടാവുകയും ചെയ്തു.