ജിദ്ദ: സൗദി അറേബ്യയിലെ മെക്ക മസ്ജിദില്‍ ക്രെയിന്‍ തകര്‍ന്ന് 107 ഹജ്ജ് തീര്‍ഥാടകര്‍ മരിച്ചു. ഇതില്‍ ഒരാള്‍ മലയാളിയാണ്. പാലക്കാട് കല്‍മണ്ഡപം മീന നഗര്‍ സ്വദേശി മുഹ്‌മിനയാണ് മരിച്ചത്. ഭാരതീയര്‍ ഉള്‍പ്പെടെ 224 ഹജ്ജ് തീര്‍ഥാടകര്‍ക്ക് പരിക്കേറ്റതായാണ് റിപ്പോര്‍ട്ട്. മരണസംഖ്യ ഉയര്‍ന്നേക്കാമെന്നാണ് സൂചന.
ഹറം പള്ളിയുടെ പുനര്‍നിര്‍മ്മാണത്തിന് എത്തിച്ച ക്രെയിനാണ് കനത്ത മഴയിലും കാറ്റിലും തകര്‍ന്നു വീണത്. മസ്ജിദിന്റെ മേല്‍ക്കൂരയിലൂടെ ക്രെയിന്‍ തകര്‍ന്ന് വീഴുകയായിരുന്നു. ഹജ്ജ് തീര്‍ഥാടനത്തിന് ഒരുങ്ങുന്ന സമയത്താണ് വന്‍ ദുരന്തം. സൗദി സമയം വൈകിട്ട് അഞ്ചേമുക്കാലിന് പള്ളിയുടെ മൂന്നാം നിലയിലേക്ക് ക്രെയിന്‍ തകര്‍ന്നു വീഴുകയായിരുന്നുവെന്ന് അല്‍ജസീറ റിപ്പോര്‍ട്ടര്‍ ഹസന്‍ പട്ടേല്‍ പറഞ്ഞു. വൈകിട്ട് ആറരയ്‌ക്കുള്ള പ്രാര്‍ഥനയ്‌ക്ക് എത്തിയവരെക്കൊണ്ട് പള്ളിക്കകം നിറഞ്ഞിരുന്ന സമയത്താണ് അപകടം.
ക്രെയിന്‍ വീണതിനെ തുടര്‍ന്നുണ്ടായ തിക്കിലും തിരക്കിലും പെട്ടാണ് കൂടുതല്‍ പേരും അപകടത്തില്‍ പെട്ടത്. മക്കയിലെ അല്‍നൂര്‍, ശിശ ആശുപത്രികളിലാണ് പരിക്കേറ്റവരെ പ്രവേശിപ്പിച്ചിരിക്കുന്നത്. പരിക്കേറ്റവരില്‍ ഒമ്പത് ഭാരതീയരുള്ളതായി ഇന്ത്യന്‍ കോണ്‍സുലേറ്റ് സ്ഥിരീകരിച്ചു. ഭാരതത്തില്‍ നിന്നും ഡെപ്യൂട്ടേഷനില്‍ എത്തിയ ഡോക്ടര്‍മാരും മറ്റും ഇവരുടെ പരിചരണത്തിനായി കൂടെയുണ്ട്. മരണപ്പെട്ടവരില്‍ ഏതൊക്കെ രാജ്യക്കാരുണ്ട് എന്ന് അധികൃതര്‍ വെളിപ്പെടുത്തിയിട്ടില്ല.
അപകടത്തെ കുറിച്ച് അന്വേഷിക്കാനും പരിക്കേറ്റവര്‍ക്ക് അടിയന്തിര സഹായം എത്തിക്കാനും മക്കാ ഗവര്‍ണര്‍ ഖാലിദ് അല്‍ ഫൈസല്‍ രാജകുമാരന്‍ നിര്‍ദേശം നല്‍കി.
