പാലക്കാട്: നെല്ലറയുടെ കായിക വികസനത്തിന്റെ ഭാഗമായി സിന്തറ്റിക് ട്രാക്കിന്റെ നിര്മാണോദ്ഘാടനം കായിക വകുപ്പ് മന്ത്രി തിരുവഞ്ചൂര് രാധാകൃഷ്ണന് നിര്വഹിച്ചു. നിലവില് ട്രാക്കിന്റെ നിര്മ്മാണത്തിന് അഞ്ചു കോടി രൂപയാണ് സംസ്ഥാന സ്പോര്ട്സ് കൗണ്സിലിന്റെ വിഹിതത്തില് നിന്ന് കായിക വകുപ്പ് അനുവദിച്ചിട്ടുളളത്. നിര്മ്മാണം പുരോഗമിക്കുമ്പോള് രണ്ടു കോടി നല്കുമെന്നും മന്ത്രി അറിയിച്ചു.
കായിക രംഗത്തിന്റെ വളര്ച്ചക്കായി കായിക താരങ്ങളെ നമ്മുടെ മണ്ണില് നില നിര്ത്തണമെന്നും 2016- ലെ ഒളിമ്പിക്സില് പങ്കെടുക്കാന് പര്യാപ്തമാകും വിധം നമ്മുടെ കുട്ടികളെ ഉയര്ത്തിക്കൊണ്ടുവരേണ്ടതുണ്ടെന്നും അദ്ദേഹം പറഞ്ഞു.
മെഡിക്കല് കോളേജ് ഗ്രൗണ്ടില് നടന്ന ടങ്ങില് പട്ടികജാതി-ടൂറിസം വകുപ്പ് മന്ത്രി എ.പി.അനില്കുമാര് മുഖ്യാതിഥി ആയിരുന്നു. ഷാഫി പറമ്പില് എം.എല്.എ അദ്ധ്യക്ഷനായി. എം.ബി.രാജേഷ് എം. പി മുഖ്യ പ്രഭാഷണം നടത്തി. ജില്ലാ പഞ്ചായത്ത് പ്രസിഡണ്ട് ടി.എന്.കണ്ടമുത്തന്, നഗരസഭാ വിദ്യാഭ്യാസ ചെയര്മാന് കൃഷ്ണ കുമാര്, കാംകോ ഡയറക്ടര് എം.എം.ഹമീദ്, കെ.എസ്.ഐ.ഡി.സി ഡയറക്ടര് ഡോ. സിദ്ദിഖ് അഹമ്മദ്, നഗരസഭാ വാര്ഡ് കൗണ്സിലര് ലീലാമോഹന്, ജില്ലാ കളക്ടര് പി.മേരിക്കുട്ടി, പാലക്കാട് അത്ലറ്റിക് അസോസിയേഷന് ജില്ലാ പ്രസിഡന്റ് ടി. ഹരിദാസ്, മെഡിക്കല് കോളേജ് പ്രിന്സിപ്പാള് ടി.ബി.കൂലാസ്, വ്യാപാരി വ്യവസായ ഏകോപന സമിതി ജനറല് സെക്രട്ടറി ജോബി.വി.ചുങ്കത്ത്, മെഡിക്കല് കോളേജ് സ്പെഷ്യല് ഓഫീസര് എസ്.സുബ്ബയ്യ തുടങ്ങിയവര് സംബന്ധിച്ചു. ചടങ്ങില് സംബന്ധിച്ച കായികതാരങ്ങളായ അഞ്ജു ബോബി ജോര്ജ്ജ്, അര്ജ്ജുനാ അവാര്ഡ് ജേതാവ് പ്രീജാ ശ്രീധരന്, കാലിക്കറ്റ് യൂണിവേഴ്സിറ്റി അത്ലറ്റ് കോച്ചായിരുന്ന എസ്. എസ് കൈമള് എന്നിവരെ കായിക മന്ത്രി തിരുവഞ്ചൂര് രാധാകൃഷ്ണന് പൊന്നാട അണിയിച്ച് ആദരിച്ചു. ജില്ലയിലെ വിവിധ സ്കൂളുകളിലെ കായികാധ്യാപകര്, ദേശീയ ഗെയിംസ് താരങ്ങള് എന്നിവരെ അഞ്ജു ബോബി ജോര്ജ്ജ് ട്രോഫി നല്കി അഭിനന്ദിച്ചു.
