കോഴിക്കോട്: അബ്ദുല്ക്കരീം കൊലക്കേസില് പ്രതിക്ക് ജീവപര്യന്തം തടവും അഞ്ചു ലക്ഷം രൂപ പിഴയും ശിക്ഷ. വെള്ളിമാട്കുന്ന് മേലേ കാഞ്ഞിരത്തിങ്കല് മുഹമ്മദ് ജംഷീറിനെയാണ് (36) അഡീഷണല് സെഷന്സ് ജഡ്ജി ശങ്കരന് നായര് ശിക്ഷിച്ചത്. കരീമിന്റെ ഭാര്യ ഹസീനക്ക് പിഴ തുക നല്കിയില്ലെങ്കില് രണ്ടു വര്ഷം കൂടി തടവ് അനുഭവിക്കണം. കൊലക്കുറ്റത്തിന് ജീവപര്യന്തവും പിഴയും തെളിവ് നശിപ്പിച്ചതിന് മൂന്നുവര്ഷവുമാണ് തടവ് ശിക്ഷ വിധിച്ചത്. ഇവയെല്ലാം ഒന്നിച്ച് അനുഭവിച്ചാല് മതി 2009 മെയ് 15നാണ് പാളയം ജയന്തി ബില്ഡിങ്ങിന് സമീപത്തെ പാര്ക്കിങ് ഗ്രൗണ്ടില് നിന്ന് മാവൂര് ചെറൂപ്പ തത്താശേരി അബ്ദുല്കരീമിനെ (38) ബോധം കെടുത്തി വാഗണര് കാറില് കയറ്റി കൊണ്ടു പോവുന്നത്. തുടര്ന്ന് കൊടുവള്ളി നെല്ലാങ്കണ്ടിയില് ഓടയിലിട്ട് പെട്രോളൊഴിച്ച് കത്തിച്ചെന്നായിരുന്നു പ്രോസിക്യൂഷന് കേസ്.
മൃതദേഹം കണ്ടെത്തിയ സമയം മുതല് പോലീസിന്റെ കൂടെ സഹായിയായി നിന്ന ജംഷീറിനെ കയ്യിലെ മുറിവ് കണ്ട്സംശയിച്ചാണ് ചോദ്യം ചെയ്യുന്നത്. മൃതദേഹം ശ്മശാനത്തില് നിന്ന് പുറത്തെടുത്തു കരീമിന്റെ പല്ലിന്റെ അളവും പ്രതിയുടെ കയ്യിലെ മുറിവുമായി താരതമ്യം ചെയ്തു.
ഡെന്റല് കോളജ് പ്രിന്സിപ്പല് ആയിരുന്ന ഐപ്പ് വര്ഗീസായിരുന്നു ഇതിന് നേതൃത്വം നല്കിയത്. മുറിവ് കരീം കടിച്ചതു മൂലമുണ്ടായതാണെന്നായിരുന്നു റിപ്പോര്ടട്ട്. കരീമിന്റെ കുടുംബം ആവശ്യപ്പെട്ടതിനെ തുടര്ന്ന് സ്പെഷ്യല് പബ്ലിക്ക് പ്രോസിക്യൂട്ടറായി അഡ്വ. എം.കെ. കൃഷ്ണമോഹനെ സര്ക്കാര് നിയമിച്ചു. ശക്തമായ സാഹചര്യത്തെളിവുകളുടെ അടിസ്ഥാനത്തിലാണ് ഇപ്പോള് പ്രതിയെ ശിക്ഷിച്ചിരിക്കുന്നത്. ചേലേമ്പ്ര ബാങ്ക് കൊള്ളയിലും മറ്റൊരു കൊലപാതകത്തിലും ജംഷീറിനെതിരെ ആരോപണമുണ്ടായിരുന്നു. കരീമിന്റെയും ബന്ധുവായ റിയാസിന്റെയും രണ്ടു വസ്തുക്കള് ജംഷീറിന്റെ ബന്ധുവിന് വിറ്റിരുന്നു. അഡ്വാന്സ് നല്കിയെങ്കിലും സമയപരിധിക്കുള്ളില് ബാക്കി തുക നല്കിയില്ല. അതിനാല് വസ്തു രജിസ്റ്റര് ചെയ്യാന് കരീം തയ്യാറായില്ല. 2009 ഏപ്രിലിലായിരുന്നു ഈ സംഭവം. മുക്കം കറുത്തപറമ്പിലെ ഒരു വസ്തുവുമായി ബന്ധപ്പെട്ട് 13 ലക്ഷം രൂപ ജംഷീര് കരീമിന് നല്കാനുമുണ്ടായിരുന്നു. ഇതെല്ലാമാണ് കൊലപാതകത്തിന് കാരണമെന്ന് പ്രോസിക്യൂഷന് വാദിച്ചു.
