ന്യൂദല്ഹി: മുംബൈ ഭീകരാക്രമണ കേസിലെ പ്രതി യാക്കൂബ് മേമന്റെ വധശിക്ഷ റിപ്പോര്ട്ട് ചെയ്തതിലെ വീഴ്ചയുടെ പേരില് മൂന്ന് ദേശീയ ചാനലുകള്ക്ക് വാര്ത്താവിതരണ പ്രക്ഷേപണ മന്ത്രാലയം നോട്ടീസയച്ചു. എന്ഡിടിവി, ആജ്തക്, എബിപി ന്യൂസ് എന്നീ സ്വകാര്യ വാര്ത്താചാനലുകള്ക്കാണ് നോട്ടീസ്.
പ്രോഗ്രാം കോഡിന്റെ ലംഘനം ഉള്പ്പെടെ മേമന്റെ വധശിക്ഷയുമായി ബന്ധപ്പെട്ട് ചാനലുകള് നടത്തിയ സംപ്രേഷണമാണ് കേന്ദ്രസര്ക്കാരിന്റെ നോട്ടീസിന് കാരണം. ചാനലുകള് ചെയ്ത തെറ്റിന് വിശദീകരണം ആവശ്യപ്പെട്ടാണ് നോട്ടീസ്. രാജ്യം തേടുന്ന അധോലോക നായകനും കുറ്റവാളിയുമായ ഛോട്ടാ ഷക്കീലുമായി ഫോണിലൂടെ അഭിമുഖം നടത്തിയതിനാണ് ആജ് തക്കിനും എബിപി ന്യൂസിനും നോട്ടീസ് ലഭിച്ചിരിക്കുന്നത്. സുപ്രീംകോടതിയെ അധിക്ഷേപിക്കുന്ന തരത്തില് ഛോട്ടാ ഷക്കീല് നടത്തിയ അഭിമുഖം അതേപടി സംപ്രേഷണം ചെയ്ത ചാനലുകളുടെ നടപടി അംഗീകരിക്കാനാവില്ലെന്ന് വാര്ത്താവിതരണ പ്രക്ഷേപണ മന്ത്രാലയം പറയുന്നു. ഒരേ ദിവസം തന്നെ നാല് ഹര്ജികള് തള്ളിയെന്നും കോടതികള് നീതി നല്കുന്നില്ലെന്നും ഛോട്ടാ ഷക്കീല് ആരോപിച്ചതും അതേപടി സംപ്രേഷണം ചെയ്തിരുന്നു.
യാക്കൂബ് മേമന്റെ അഭിഭാഷകന്റെ വിവാദ അഭിമുഖം സംപ്രേഷണം ചെയ്തതിനാണ് എന്ഡിടിവിക്ക് നോട്ടീസ് നല്കിയിരിക്കുന്നത്. 1994ലെ കേബിള്ടിവി നെറ്റ് വര്ക്ക് നിയമത്തിലെ റൂള് 6ലെ ഒന്നാം വകുപ്പ് ഡി,ജി,ഇ എന്നിവ പ്രകാരമാണ് നോട്ടീസ്. അപകീര്ത്തികരമായതും തെറ്റായതുമായ വാര്ത്തകള് പ്രചരിപ്പിക്കുക, അക്രമത്തിന് പ്രേരിപ്പിക്കുന്ന വിവരങ്ങള് നല്കുക, ദേശവിരുദ്ധ ശക്തികള്ക്ക് പ്രോത്സാഹനം നല്കുക, രാഷ്ട്രപതിയുടേയും നീതിന്യായ വ്യവസ്ഥയുടേയും ധാര്മ്മികത തകര്ക്കുക എന്നീ കുറ്റങ്ങളാണ് ചാനലുകള് ചെയ്തതെന്ന് നോട്ടീസ് വ്യക്തമാക്കുന്നു.
രാജ്യത്തെ 600ലധികം വരുന്ന ചാനലുകളുടെ ഉള്ളടക്കം സംബന്ധിച്ച് വാര്ത്താ വിതരണ പ്രക്ഷേപണ മന്ത്രാലയത്തിലെ മാധ്യമ നിരീക്ഷണകേന്ദ്രം 24 മണിക്കൂറും നിരീക്ഷണം നിര്വഹിക്കാറുണ്ട്. ഇതനുസരിച്ച് കണ്ടെത്തിയ ലംഘനങ്ങളുടെ പേരിലാണ് നോട്ടീസ്. കേന്ദ്രത്തിന്റെ നോട്ടീസിന് ചാനലുകള് നല്കുന്ന മറുപടി വാര്ത്താവിതരണ മന്ത്രാലയത്തിലെ അഡീഷണല് സെക്രട്ടറിയുടെ നേതൃത്വത്തിലുള്ള സമിതി യോഗം ചേര്ന്ന് വിലയിരുത്തി ചാനലിനെതിരായ നടപടി പ്രഖ്യാപിക്കും. ചിലപ്പോള് മിനിറ്റുകളോ മണിക്കൂറുകളോ ദിവസം മുഴുവനോ ചാനലിന്റെ പ്രക്ഷേപണം തടയാനും സാധിക്കും.
