കുടപ്പനക്കുന്ന് ശിവഗംഗ വനിതാ സ്വാശ്രയ സംഘത്തിന്റെ നേതൃത്വത്തില് നടക്കുന്ന ഔഷധക്കഞ്ഞി വിതരണം
തിരുവനന്തപുരം: സേവന പ്രവര്ത്തനത്തിന് കൈത്താങ്ങായി സേവാഭാരതിക്കൊപ്പം നിസ്വാര്ത്ഥമായി പ്രവര്ത്തിക്കുകയാണ് കുടപ്പനക്കുന്നിലെ ശിവഗംഗ വനിതാ സ്വാശ്രയസംഘം. കഴിഞ്ഞ മൂന്നുവര്ഷമായി കര്ക്കിടക മാസത്തില് സൗജന്യമായി കുടപ്പനക്കുന്ന് നിവാസികള്ക്ക് ഔഷധക്കഞ്ഞി നല്കിവരുന്നു. സേവാഭാരതിയും മരുത്വാഫാര്മയും സംയുക്തമായി കര്ക്കിടകം 1 മുതല് 31 വരെ നല്കിവരുന്ന ഔഷധക്കഞ്ഞി തയ്യാറാക്കുന്നതും വിതരണം ചെയ്യുന്നതും സംഘത്തിലെ 20 വനിതകളുടെ കൂട്ടായ്മയാണ്. ഏഴുവര്ഷത്തിനുമുമ്പ് സേവാഭാരതിയുടെ കീഴില് ആരംഭിച്ച വനിതാ സ്വാശ്രയസംഘം സമൂഹത്തില് വളരെയധികം സേവന പ്രവര്ത്തനങ്ങളാണ് ചെയ്തുവരുന്നത്. മെഡിക്കല് ക്യാമ്പുകള്, രോഗീപരിചരണം, സൗജന്യ പുസ്തകവിതരണം, അന്നദാന പദ്ധതി, ചികിത്സാധനസഹായം എന്നിവ ഇതില്പ്പെടുന്നു.
മരുത്വാഫാര്മ നല്കുന്ന ഉണക്കിപ്പൊടിച്ച ഇതുപതില്പ്പരം ഔഷധങ്ങളുടെ കൂട്ടും ഞവര അരി, കരിപ്പട്ടി, തേങ്ങാപ്പാല് എന്നിവയും ചേര്ത്ത് തയ്യാറാക്കുന്ന ഔഷധവിഭവം കഴിക്കാന് നൂറുകണക്കിനുപേര് വൈകുന്നേരം ഒത്തുകൂടുന്നു. ഔഷധക്കഞ്ഞിക്ക് ഒരുദിവസം മുപ്പതിനായിരത്തോളം രൂപ ചെലവ് വരുന്നുണ്ടെന്ന് സേവാഭാരതി വര്ക്കിംഗ് പ്രസിഡന്റ് എം. സന്തോഷ് പറഞ്ഞു.
കുടപ്പനക്കുന്ന് ശിവഗംഗ വനിതാ സ്വാശ്രയ സംഘത്തിന്റെ നേതൃത്വത്തില് നടക്കുന്ന ഔഷധക്കഞ്ഞി വിതരണം
